---
title: "ഇങ്ങനെ ഒരു തവണ ഉണ്ടാക്കി നോക്കൂ, പിന്നെ എപ്പോഴും ഇതേ ഉണ്ടാക്കൂ; സീക്രട്ട് ചെമ്മീൻ മാങ്ങാ കറി റെസിപ്പി"
english_title: "Secret Shrimp Mango Curry Recipe"
publisher: "truevisionnews.com"
canonical_url: "https://truevisionnews.com/news/363204/secret-shrimp-mango-curry-recipe-"
published_at: "2026-06-01T17:09:00+05:30"
category: "Cookery"
language: "ml"
image: "https://cf.zdn.im/img/truevisionnews.com/0/image-uploads/6a1d7017d0cdb_Shrimp_Mango_Curry_Recipe.jpg"
keywords: ["Cookery", "Chemmeen Manga Curry", "Kerala Prawn Curry"]
---

# ഇങ്ങനെ ഒരു തവണ ഉണ്ടാക്കി നോക്കൂ, പിന്നെ എപ്പോഴും ഇതേ ഉണ്ടാക്കൂ; സീക്രട്ട് ചെമ്മീൻ മാങ്ങാ കറി റെസിപ്പി

> **Lead Summary:** കേരളീയരുടെ പ്രിയപ്പെട്ട വിഭവങ്ങളിലൊന്നായ, നല്ല നാടൻ ചെമ്മീൻ മാങ്ങാ കറി തനി നാടൻ രുചിയിൽ എങ്ങനെയുണ്ടാക്കാമെന്ന് താഴെ വിവരിക്കുന്നു. ചൂട് ചോറിനൊപ്പം കഴിക്കാൻ ഇത് ഉത്തമമാണ്.

## Article Content

കേരളീയരുടെ പ്രിയപ്പെട്ട വിഭവങ്ങളിലൊന്നായ, നല്ല നാടൻ ചെമ്മീൻ മാങ്ങാ കറി തനി നാടൻ രുചിയിൽ എങ്ങനെയുണ്ടാക്കാമെന്ന് താഴെ വിവരിക്കുന്നു. ചൂട് ചോറിനൊപ്പം കഴിക്കാൻ ഇത് ഉത്തമമാണ്.

**ആവശ്യമായ സാധനങ്ങൾ**

ചെമ്മീൻ (വൃത്തിയാക്കിയത്): 250 ഗ്രാം

പച്ചമാങ്ങ: 1 വലുത് (നീളത്തിൽ കഷണങ്ങളാക്കിയത്)

തേങ്ങ ചിരകിയത്: 1 കപ്പ്

ചുവന്നുള്ളി: 6-8 എണ്ണം

പച്ചമുളക്: 3-4 എണ്ണം (നടുവെ കീറിയത്)

ഇഞ്ചി: 1 ചെറിയ കഷണം (നീളത്തിൽ അരിഞ്ഞത്)

മുളകുപൊടി: 1 ടേബിൾ സ്പൂൺ

മഞ്ഞൾപ്പൊടി: 1/2 ടീസ്പൂൺ

ഉലുവപ്പൊടി: 1/4 ടീസ്പൂൺ

വെളിച്ചെണ്ണ: 2 ടേബിൾ സ്പൂൺ

കടുക്: 1 ടീസ്പൂൺ

വറ്റൽമുളക്: 2 എണ്ണം

കറിവേപ്പില: 2 തണ്ട്

ഉപ്പ്: ആവശ്യത്തിന്

വെള്ളം: ആവശ്യത്തിന്

**തയാറാക്കുന്ന വിധം**

ചിരകിയ തേങ്ങയോടൊപ്പം മഞ്ഞൾപ്പൊടി, 3 ചുവന്നുള്ളി എന്നിവ ചേർത്ത് മിക്സിയിൽ നന്നായി വെണ്ണ പോലെ അരച്ചെടുക്കുക. (ആവശ്യമെങ്കിൽ അല്പം വെള്ളം ചേർക്കാം).

ഒരു മൺചട്ടിയിൽ (അല്ലെങ്കിൽ പാത്രത്തിൽ) വൃത്തിയാക്കി വെച്ച ചെമ്മീൻ, പച്ചമാങ്ങ കഷണങ്ങൾ, ഇഞ്ചി, പച്ചമുളക്, മുളകുപൊടി, ആവശ്യത്തിന് ഉപ്പ്, കറിവേപ്പില എന്നിവ ചേർക്കുക. ഇതിലേക്ക് ഒരു കപ്പ് വെള്ളം ഒഴിച്ച് അടച്ചുവെച്ച് മിതമായ തീയിൽ വേവിക്കുക. മാങ്ങയും ചെമ്മീനും വേഗത്തിൽ വെന്തു കിട്ടും.

ചെമ്മീനും മാങ്ങയും വെന്തു വരുമ്പോൾ നമ്മൾ തയാറാക്കി വെച്ചിരിക്കുന്ന തേങ്ങ അരപ്പ് ഇതിലേക്ക് ചേർക്കുക. ചട്ടി ചെറുതായി ചുഴറ്റി കൊടുക്കുക (തവിയിട്ട് ഒരുപാട് ഇളക്കിയാൽ മാങ്ങ ഉടഞ്ഞുപോകും). തീ കുറച്ചുവെച്ച് കറി ചെറുതായി തിളച്ചു വരുമ്പോൾ (തുടർച്ചയായി തിളപ്പിക്കരുത്, അരപ്പ് പിരിഞ്ഞുപോകും) ഉലുവപ്പൊടി ചേർത്ത് തീ ഓഫ് ചെയ്യാം.

മറ്റൊരു ചെറിയ പാനിൽ വെളിച്ചെണ്ണ ചൂടാക്കി കടുക് പൊട്ടിക്കുക. അതിലേക്ക് ബാക്കിയുള്ള ചുവന്നുള്ളി അരിഞ്ഞത്, വറ്റൽമുളക്, കറിവേപ്പില എന്നിവ ചേർത്ത് മൂപ്പിക്കുക. ഇത് തയാറാക്കി വെച്ചിരിക്കുന്ന കറിയിലേക്ക് ഒഴിച്ച് അടച്ചുവെക്കുക.

### Related Links & Sources
- [Original Story Source](https://truevisionnews.com/news/363204/secret-shrimp-mango-curry-recipe-)