---
title: "ഐപിഎൽ ഫൈനലിൽ ഇന്ന് ആർസിബി - ഗുജറാത്ത് ടൈറ്റൻസ് പോരാട്ടം; കളി മഴ കൊണ്ടുപോയാൽ കപ്പ് ആർക്ക്?"
english_title: "Who will win the cup if it rains in the IPL final"
publisher: "truevisionnews.com"
canonical_url: "https://truevisionnews.com/news/362925/who-will-win-the-cup-if-it-rains-in-the-ipl-final"
published_at: "2026-05-31T12:48:00+05:30"
category: "Sports"
language: "ml"
image: "https://cf.zdn.im/img/truevisionnews.com/0/image-uploads/6a1be11b1f937_12.jpg"
keywords: ["Latest News", "IPL Final", "Who will pour the cup if it rains"]
---

# ഐപിഎൽ ഫൈനലിൽ ഇന്ന് ആർസിബി - ഗുജറാത്ത് ടൈറ്റൻസ് പോരാട്ടം; കളി മഴ കൊണ്ടുപോയാൽ കപ്പ് ആർക്ക്?

> **Lead Summary:** **അഹമ്മദാബാദ്: [ **ഐപിഎൽ കിരീടപ്പോരാട്ടത്തിൽ നിലവിലെ ചാമ്പ്യന്മാരായ റോയൽ ചലഞ്ചേഴ്സ് ബെംഗളൂരുവും ഗുജറാത്ത് ടൈറ്റൻസും ഇന്ന് അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നേർക്കുനേർ വരുന്നു.

## Article Content

**അഹമ്മദാബാദ്: [ **ഐപിഎൽ കിരീടപ്പോരാട്ടത്തിൽ നിലവിലെ ചാമ്പ്യന്മാരായ റോയൽ ചലഞ്ചേഴ്സ് ബെംഗളൂരുവും ഗുജറാത്ത് ടൈറ്റൻസും ഇന്ന് അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നേർക്കുനേർ വരുന്നു.

തങ്ങളുടെ രണ്ടാം ഐപിഎൽ കിരീടം ലക്ഷ്യമിട്ടാണ് ഇരുടീമുകളും ഇന്നിറങ്ങുന്നത്. കഴിഞ്ഞ സീസണിൽ പഞ്ചാബ് കിങ്സിനെ വീഴ്ത്തിയാണ് ആർസിബി തങ്ങളുടെ കന്നി കിരീടം സ്വന്തമാക്കിയത്.

മറുഭാഗത്ത്, അരങ്ങേറ്റ സീസണായ 2022-ൽ ചാമ്പ്യന്മാരായ ഗുജറാത്ത് ടൈറ്റൻസ് അഞ്ച് വർഷത്തിനിടെ തങ്ങളുടെ മൂന്നാമത്തെ ഫൈനലിനാണ് ഇന്ന് തയ്യാറെടുക്കുന്നത്. വടക്ക്-പടിഞ്ഞാറൻ ഇന്ത്യയിൽ തുടരുന്ന കനത്ത മഴയും കൊടുങ്കറ്റും കാരണം ചണ്ഡീഗഢിൽ നിന്ന് അഹമ്മദാബാദിലേക്കുള്ള ഗുജറാത്ത് ടീമിന്റെ യാത്ര വൈകിയിരുന്നു.

ഇതോടെ, ഫൈനൽ മത്സരം മഴ മൂലം തടസ്സപ്പെട്ടാൽ എന്ത് സംഭവിക്കും എന്ന ആശങ്കയിലാണ് ക്രിക്കറ്റ് ആരാധകർ. എന്നാൽ, അക്യുവെതർ റിപ്പോർട്ടുകൾ പ്രകാരം ഇന്ന് അഹമ്മദാബാദിൽ മഴ പെയ്യാൻ 5 ശതമാനം സാധ്യത മാത്രമെയുള്ളൂവെന്നത് ആരാധകർക്ക് വലിയ ആശ്വാസമേകുന്ന വാർത്തയാണ്.

ആകാശം നേരിയ തോതിൽ മേഘാവൃതമായിരിക്കുമെങ്കിലും മത്സരം പൂർണ്ണമായി തടസപ്പെടാൻ സാധ്യതയില്ലെന്നാണ് പ്രവചനം. എങ്കിലും അപ്രതീക്ഷിതമായി മഴ വില്ലനായാൽ വിജയികളെ നിർണ്ണയിക്കാൻ വ്യക്തമായ നിയമങ്ങളുണ്ട്.

മുൻപത്തെ മത്സരങ്ങൾക്ക് റിസർവ് ഡേ ഉണ്ടായിരുന്നില്ലെങ്കിലും ഫൈനലിനായി ബിസിസിഐ ജൂൺ 1 തിങ്കളാഴ്ച റിസർവ് ദിനമായി പ്രഖ്യാപിച്ചിട്ടുണ്ട്. ഇന്ന് മത്സരം ആരംഭിച്ച് മഴയോ മറ്റ് കാരണങ്ങളോ കൊണ്ട് തടസ്സപ്പെടുകയാണെങ്കിൽ, മത്സരം എവിടെയാണോ നിർത്തിയത് അവിടെയുള്ള സ്കോറിൽ നിന്ന് തന്നെ തിങ്കളാഴ്ച പുനരാരംഭിക്കും.

ഇനി റിസർവ് ദിനമായ തിങ്കളാഴ്ചയും കനത്ത മഴ കാരണം ഒരു പന്ത് പോലും എറിയാൻ സാധിക്കാതെ മത്സരം പൂർണ്ണമായി ഉപേക്ഷിക്കേണ്ടി വന്നാൽ, റോയൽ ചലഞ്ചേഴ്സ് ബെംഗളൂരുവിനെ ചാമ്പ്യന്മാരായി പ്രഖ്യാപിക്കും.

ലീഗ് ഘട്ടത്തിലെ പോയിന്റ് ടേബിളിൽ ഗുജറാത്ത് ടൈറ്റൻസിനേക്കാൾ മുകളിലായി ഫിനിഷ് ചെയ്തത് ആർസിബി ആയതിനാലാണ് നിയമം അവർക്ക് അനുകൂലമാകുന്നത്. ഒന്നാം ക്വാളിഫയറിൽ ഗുജറാത്തിനെ 92 റൺസിന് തകർത്താണ് ആർസിബി നേരിട്ട് ഫൈനലിൽ എത്തിയത്.

ആ മത്സരത്തിൽ പരാജയപ്പെട്ട ഗുജറാത്ത്, രണ്ടാം ക്വാളിഫയറിൽ രാജസ്ഥാൻ റോയൽസിനെ 7 വിക്കറ്റിന് തകർത്താണ് ഫൈനലിലേക്ക് യോഗ്യത നേടിയത്. ഇന്ന് കിരീടം നേടാനായാൽ ആർസിബി നായകൻ രജത് പാടിദാറിനെ കാത്തിരിക്കുന്നത് ചരിത്രനേട്ടമാണ്.

ചെന്നൈ സൂപ്പർ കിങ്സിന്റെ എം.എസ് ധോണിക്കും മുംബൈ ഇന്ത്യൻസന്റെ രോഹിത് ശർമ്മയ്ക്കും ശേഷം ഐപിഎല്ലിൽ ക്യാപ്റ്റൻ എന്ന നിലയിൽ തുടർച്ചയായി രണ്ട് കിരീടങ്ങൾ നേടുന്ന മൂന്നാമത്തെ മാത്രം താരം എന്ന പദവി പാടിദാറിന് സ്വന്തമാകും.

എന്തായാലും കാര്യമായ മഴ ഭീഷണി നിലവിലില്ലാത്തതിനാൽ ഇന്ന് നരേന്ദ്ര മോദി സ്റ്റേഡിയത്തിൽ പൂർണ്ണമായ 20 ഓവർ തീയതി പോരാട്ടം തന്നെ കാണാനാകും എന്ന പ്രതീക്ഷയിലാണ് കായികലോകം.

### Related Links & Sources
- [Original Story Source](https://truevisionnews.com/news/362925/who-will-win-the-cup-if-it-rains-in-the-ipl-final)