---
title: "യുദ്ധഭീതിയിൽ മിഡിൽ ഈസ്റ്റ്; മുന്നറിയിപ്പുകൾ കാറ്റിൽപ്പറത്തി, ഉപരോധം ലംഘിച്ച് ഇറാനിലേക്ക് നീങ്ങിയ ചരക്കുകപ്പലിന് നേരെ യുഎസ് മിസൈലാക്രമണം"
english_title: "US missile attack on cargo ship headed to Iran"
publisher: "truevisionnews.com"
canonical_url: "https://truevisionnews.com/news/362869/us-missile-attack-on-cargo-ship-headed-to-iran"
published_at: "2026-05-31T09:50:00+05:30"
category: "International"
language: "ml"
image: "https://cf.zdn.im/img/truevisionnews.com/0/image-uploads/6a1bb77a172e2_us_iran.jpg"
keywords: ["Latest News", "Washington", "US-IRAN War", "Missile attack"]
---

# യുദ്ധഭീതിയിൽ മിഡിൽ ഈസ്റ്റ്; മുന്നറിയിപ്പുകൾ കാറ്റിൽപ്പറത്തി, ഉപരോധം ലംഘിച്ച് ഇറാനിലേക്ക് നീങ്ങിയ ചരക്കുകപ്പലിന് നേരെ യുഎസ് മിസൈലാക്രമണം

> **Lead Summary:** **വാഷിങ്ടൺ: [ **യുഎസ് ഏർപ്പെടുത്തിയ നാവിക ഉപരോധം ലംഘിച്ച് ഇറാനിയൻ തുറമുഖത്തേക്ക് പ്രവേശിക്കാൻ ശ്രമിച്ച ചരക്കുകപ്പലിന് നേരെ അമേരിക്കൻ സൈന്യം മിസൈലാക്രമണം നടത്തി.

## Article Content

**വാഷിങ്ടൺ: [ **യുഎസ് ഏർപ്പെടുത്തിയ നാവിക ഉപരോധം ലംഘിച്ച് ഇറാനിയൻ തുറമുഖത്തേക്ക് പ്രവേശിക്കാൻ ശ്രമിച്ച ചരക്കുകപ്പലിന് നേരെ അമേരിക്കൻ സൈന്യം മിസൈലാക്രമണം നടത്തി.

ഗൾഫ് ഓഫ് ഒമാനിൽ വെച്ച് ഗാംബിയൻ പതാകയേന്തിയ 'ലിയാൻ സ്റ്റാർ' എന്ന കപ്പലിന് നേരെയാണ് യുഎസ് സെൻട്രൽ കമാൻഡ് ആക്രമണം നടത്തിയത്. അന്താരാഷ്ട്ര സമുദ്രാതിർത്തിയിലൂടെ നീങ്ങുകയായിരുന്ന കപ്പലിന്റെ എഞ്ചിൻ റൂമിലാണ് മിസൈൽ പതിച്ചത്.

ആക്രമണത്തിന് മുൻപായി കപ്പലിന് ഇരുപതിലധികം തവണ മുന്നറിയിപ്പ് നൽകിയിരുന്നുവെന്നും എന്നാൽ ഇറാനിയൻ തുറമുഖങ്ങൾക്കുമേലുള്ള ഉപരോധം അവഗണിച്ചുകൊണ്ട് കപ്പൽ മുന്നോട്ട് നീങ്ങിയതിനാലാണ് സൈനിക നടപടി സ്വീകരിക്കേണ്ടി വന്നതെന്നും യുഎസ് സെൻട്രൽ കമാൻഡ് പ്രസ്താവനയിൽ വ്യക്തമാക്കി.

അമേരിക്കയും ഇറാനും തമ്മിൽ നിലവിൽ വെടിനിർത്തൽ കരാർ നിലനിൽക്കെയാണ് ഈ നാവിക ആക്രമണം ഉണ്ടായിരിക്കുന്നത്. മിസൈലാക്രമണത്തിൽ എഞ്ചിൻ തകരാറിലായതോടെ കപ്പൽ കടലിൽ നിശ്ചലമായ അവസ്ഥയിലാണ്.

കപ്പൽ നിലവിൽ ഇറാനിലേക്ക് നീങ്ങുന്നില്ലെങ്കിലും യുഎസ് സൈന്യം ഇതിനുള്ളിൽ പ്രവേശിച്ചിട്ടില്ലെന്ന് അസോസിയേറ്റഡ് പ്രസ് റിപ്പോർട്ട് ചെയ്തു. കഴിഞ്ഞ ഫെബ്രുവരിയിൽ അമേരിക്കയും ഇസ്രയേലും നടത്തിയ ആക്രമണങ്ങളെത്തുടർന്ന് ഇറാൻ ഹോർമുസ് കടലിടുക്ക് അടച്ചതോടെയാണ് യുഎസ് കടുത്ത നാവിക ഉപരോധം ഏർപ്പെടുത്തിയത്.

ഈ ഉപരോധം നിലവിൽ വന്നതിന് ശേഷം ഇറാനിലേക്ക് നീങ്ങിയ ആറ് കപ്പലുകളാണ് യുഎസ് സൈന്യം ഇതുവരെ തടഞ്ഞത്. കൂടാതെ 116-ലധികം കപ്പലുകളെ മറ്റ് ദിശകളിലേക്ക് വഴിതിരിച്ചുവിടുകയും ചെയ്തിട്ടുണ്ട്.

മേഖലയിലെ സംഘർഷം കുറയ്ക്കുന്നതിനായുള്ള വെടിനിർത്തൽ കാലാവധി നീട്ടുന്നതിനെക്കുറിച്ചുള്ള ചർച്ചകൾ പുരോഗമിക്കുന്നതിനിടയിലാണ് പുതിയ സൈനിക നടപടി ഉണ്ടായിരിക്കുന്നത്.

### Related Links & Sources
- [Original Story Source](https://truevisionnews.com/news/362869/us-missile-attack-on-cargo-ship-headed-to-iran)