---
title: "ഭൂമിയുടേത് പോലുള്ള മാന്ത്രിക വലയം ചൊവ്വയ്ക്കുമുണ്ടോ? നാസയുടെ 'മാവെൻ' ദൗത്യത്തിൽ പുതിയ വഴിത്തിരിവ്"
english_title: "Content Highlights: - NASA's 'MAVEN' makes new discovery about Mars' atmosphere"
publisher: "truevisionnews.com"
canonical_url: "https://truevisionnews.com/news/362637/Content-Highlights-nasas-maven-makes-new-discovery-about-mars-atmosphere"
published_at: "2026-05-30T09:39:00+05:30"
category: "International"
language: "ml"
image: "https://cf.zdn.im/img/truevisionnews.com/0/image-uploads/6a1a63bb4ff0c_MARS.jpg"
keywords: ["LATEST NEWS", "NASA", "MAVEN", "MARS"]
---

# ഭൂമിയുടേത് പോലുള്ള മാന്ത്രിക വലയം ചൊവ്വയ്ക്കുമുണ്ടോ? നാസയുടെ 'മാവെൻ' ദൗത്യത്തിൽ പുതിയ വഴിത്തിരിവ്

> **Lead Summary:** വാഷിംഗ്ടൺ: **[**ചൊവ്വാഗ്രഹത്തിന്റെ അന്തരീക്ഷത്തെക്കുറിച്ചുള്ള ശാസ്ത്രലോകത്തിന്റെ പരമ്പരാഗത ധാരണകളെ തിരുത്തിക്കുറിച്ചുകൊണ്ട് നാസയുടെ 'മാവെൻ' ദൗത്യത്തിൽ നിന്ന് പുതിയ കണ്ടെത്തൽ. ഭൂമിയെപ്പോലെ ശക്തമായ ആഗോള കാന്തികക്ഷേത്രം ചൊവ്വയ്ക്കില്ലെന്നും, അതുമൂലമാണ് കോടിക്കണക്കിന് വർഷങ്ങൾക്ക് മുമ്പ് ചൊവ്വയുടെ അന്തരീക്ഷം ബഹിരാകാശത്തിലേക്ക് ചോർന്നുപോയതെന്നുമാണ് ശാസ്ത്രലോകം ഇതുവരെ വിശ്വസിച്ചിരുന്നത്. എന്നാൽ പുതിയ പഠനങ്ങൾ ഇതിനപ്പുറമുള്ള ചില സത്യങ്ങളിലേക്ക് വിരൽ ചൂണ്ടുന്നു.

## Article Content

വാഷിംഗ്ടൺ: **[**ചൊവ്വാഗ്രഹത്തിന്റെ അന്തരീക്ഷത്തെക്കുറിച്ചുള്ള ശാസ്ത്രലോകത്തിന്റെ പരമ്പരാഗത ധാരണകളെ തിരുത്തിക്കുറിച്ചുകൊണ്ട് നാസയുടെ 'മാവെൻ' ദൗത്യത്തിൽ നിന്ന് പുതിയ കണ്ടെത്തൽ. ഭൂമിയെപ്പോലെ ശക്തമായ ആഗോള കാന്തികക്ഷേത്രം ചൊവ്വയ്ക്കില്ലെന്നും, അതുമൂലമാണ് കോടിക്കണക്കിന് വർഷങ്ങൾക്ക് മുമ്പ് ചൊവ്വയുടെ അന്തരീക്ഷം ബഹിരാകാശത്തിലേക്ക് ചോർന്നുപോയതെന്നുമാണ് ശാസ്ത്രലോകം ഇതുവരെ വിശ്വസിച്ചിരുന്നത്. എന്നാൽ പുതിയ പഠനങ്ങൾ ഇതിനപ്പുറമുള്ള ചില സത്യങ്ങളിലേക്ക് വിരൽ ചൂണ്ടുന്നു.

**എന്താണ് 'സ്വാൻ-വുൾഫ് പ്രതിഭാസം'?**

പ്രശസ്ത ശാസ്ത്ര ജേർണലായ 'നേച്ചർ കമ്മ്യൂണിക്കേഷൻസി'ൽ പ്രസിദ്ധീകരിച്ച പഠനത്തിലാണ് 'സ്വാൻ-വുൾഫ് പ്രതിഭാസം' (Zwan-Wolf phenomenon) ആദ്യമായി ഭൂമിക്ക് പുറത്തൊരു ഗ്രഹത്തിൽ കണ്ടെത്തിയതായി ശാസ്ത്രജ്ഞർ സ്ഥിരീകരിച്ചത്.

സൂര്യനിൽ നിന്നുള്ള ചാർജ്ജ് ചെയ്ത കണങ്ങളും  ഗ്രഹത്തിന് ചുറ്റുമുള്ള കാന്തിക തടസ്സങ്ങളും തമ്മിൽ കൂട്ടിയിടിക്കുമ്പോൾ പ്ലാസ്മ സങ്കോചിച്ച് 'ഫ്ലക്സ് ട്യൂബ്' (Flux tube) എന്ന പ്രത്യേക ഘടന രൂപപ്പെടുന്ന പ്രതിഭാസമാണിത്.

 1976-ൽ സിദ്ധാന്തമായി അവതരിപ്പിക്കപ്പെട്ട ഈ പ്രതിഭാസം, ഭൂമിയെപ്പോലെ ശക്തമായ കാന്തികക്ഷേത്രമുള്ള ഗ്രഹങ്ങളിൽ മാത്രമേ സംഭവിക്കൂ എന്നായിരുന്നു ശാസ്ത്രജ്ഞർ കരുതിയിരുന്നത്. എന്നാൽ കാന്തികക്ഷേത്രമില്ലാത്ത ചൊവ്വയിലും ഇത് നടക്കുന്നുണ്ടെന്ന് ഇപ്പോൾ തെളിഞ്ഞിരിക്കുകയാണ്. വെസ്റ്റ് വർജീനിയ സർവ്വകലാശാലയിലെ ഗവേഷകനായ ക്രിസ്റ്റഫർ ഫൗളറുടെ നേതൃത്വത്തിലുള്ള സംഘമാണ് ഈ കണ്ടെത്തലിന് പിന്നിൽ.

2023 ഡിസംബറിൽ ചൊവ്വയിലുണ്ടായ അതിശക്തമായ ഒരു സൗരകൊടുങ്കാറ്റിനിടയിലെ (Solar storm) കാന്തിക ഡാറ്റകൾ പരിശോധിച്ചപ്പോഴാണ് ശാസ്ത്രജ്ഞർ ഈ അസാധാരണ പ്രതിഭാസം തിരിച്ചറിഞ്ഞത്. സാധാരണ സാഹചര്യങ്ങളിൽ വളരെ ദുർബലമായിരിക്കുന്ന ഈ പ്രക്രിയ, ശക്തമായ സൗരകൊടുങ്കാറ്റുകൾ ഉണ്ടാകുമ്പോൾ മാത്രമാണ് വ്യക്തമായി ദൃശ്യമാകുന്നത്.

**എന്തുകൊണ്ട് ഈ പഠനം പ്രധാനം?**

ചൊവ്വയിൽ മാത്രമല്ല, സ്വന്തമായി കാന്തികക്ഷേത്രമില്ലാത്ത ശുക്രൻ (Venus), ശനിയുടെ ഉപഗ്രഹമായ ടൈറ്റൻ (Titan) തുടങ്ങിയ പ്രപഞ്ചവസ്തുക്കളുടെ അന്തരീക്ഷത്തെയും അവയിലെ സൗരക്കാറ്റിന്റെ സ്വാധീനത്തെയും കുറിച്ച് പഠിക്കാൻ ഈ കണ്ടെത്തൽ സഹായിക്കും. ഭാവിയിൽ ഗ്രഹങ്ങളുടെ അന്തരീക്ഷ നാശത്തെക്കുറിച്ചും ബഹിരാകാശ കാലാവസ്ഥയെക്കുറിച്ചുമുള്ള ഗവേഷണങ്ങൾക്ക് ഈ പഠനം വലിയ ഊർജ്ജമാകും.

### Related Links & Sources
- [Original Story Source](https://truevisionnews.com/news/362637/Content-Highlights-nasas-maven-makes-new-discovery-about-mars-atmosphere)