---
title: "'രാഷ്ട്രീയ പ്രേരിതം'; പിണറായി വിജയന്റെ വസതിയിലെ ഇ ഡി റെയ്ഡിനെ അപലപിച്ച് കമ്മ്യൂണിസ്റ്റ് പാര്‍ട്ടി ഓഫ് ബ്രിട്ടൻ"
english_title: "Content Highlights:- Communist Party Of Britain Condemns ED Raid On Pinarayi Vijayan Residence"
publisher: "truevisionnews.com"
canonical_url: "https://truevisionnews.com/news/362397/content-highlights-communist-party-of-britain-condemns-ed-raid-on-pinarayi-vijayan-residence"
published_at: "2026-05-29T06:09:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a18e0c7b449a_Communist_Party_Of_Britain.jpg"
keywords: ["Latest News", "Enforcement Directorate", "Pinarayi Vijayan", "Communist Party Of Britain"]
---

# 'രാഷ്ട്രീയ പ്രേരിതം'; പിണറായി വിജയന്റെ വസതിയിലെ ഇ ഡി റെയ്ഡിനെ അപലപിച്ച് കമ്മ്യൂണിസ്റ്റ് പാര്‍ട്ടി ഓഫ് ബ്രിട്ടൻ

> **Lead Summary:** തിരുവനന്തപുരം: പ്രതിപക്ഷ നേതാവ് പിണറായി വിജയന്റെ വസതിയില്‍ നടന്ന ഇ ഡി റെയ്ഡിനെ അപലപിച്ച് കമ്മ്യൂണിസ്റ്റ് പാര്‍ട്ടി ഓഫ് ബ്രിട്ടന്‍. പിണറായി വിജയന്റെ തിരുവനന്തപുരത്തെ വസതിയില്‍ രാഷ്ട്രീയ പ്രേരിതമായി സര്‍ക്കാര്‍ ഏജന്‍സികള്‍ നടത്തിയ റെയ്ഡിനെ അപലപിക്കുന്നുവെന്നാണ് കമ്മ്യൂണിസ്റ്റ് പാര്‍ട്ടി ഓഫ് ബ്രിട്ടന്‍ എക്‌സില്‍ പങ്കുവെച്ച പ്രസ്താവനയില്‍ പറഞ്ഞത്.

## Article Content

തിരുവനന്തപുരം: പ്രതിപക്ഷ നേതാവ് പിണറായി വിജയന്റെ വസതിയില്‍ നടന്ന ഇ ഡി റെയ്ഡിനെ അപലപിച്ച് കമ്മ്യൂണിസ്റ്റ് പാര്‍ട്ടി ഓഫ് ബ്രിട്ടന്‍. പിണറായി വിജയന്റെ തിരുവനന്തപുരത്തെ വസതിയില്‍ രാഷ്ട്രീയ പ്രേരിതമായി സര്‍ക്കാര്‍ ഏജന്‍സികള്‍ നടത്തിയ റെയ്ഡിനെ അപലപിക്കുന്നുവെന്നാണ് കമ്മ്യൂണിസ്റ്റ് പാര്‍ട്ടി ഓഫ് ബ്രിട്ടന്‍ എക്‌സില്‍ പങ്കുവെച്ച പ്രസ്താവനയില്‍ പറഞ്ഞത്.

പിണറായി വിജയന് പിന്തുണ അറിയിച്ച് ഡല്‍ഹിയിലെ ഇ ഡി ആസ്ഥാനത്തേയ്ക്ക് മാര്‍ച്ച് നടത്തിയ സിപിഐഎം നേതാക്കളെ അറസ്റ്റ് ചെയ്ത നടപടിയിലും കമ്മ്യൂണിസ്റ്റ് പാര്‍ട്ടി ഓഫ് ബ്രിട്ടന്‍ പ്രതിഷേധം അറിയിച്ചു.

പുരോഗമന ജനകീയ ശക്തികള്‍ക്കെതിരെ വലതുപക്ഷ, യാഥാസ്ഥിതിക സര്‍ക്കാരുകള്‍ നിയമസംവിധാനങ്ങളെയും മറ്റും ആയുധമായി ഉപയോഗിക്കുന്നത് രാജ്യാന്തര പ്രതിഭാസമായി മാറിയിരിക്കുകയാണ്. ചെക്ക് റിപ്പബ്ലിക്ക് മുതല്‍ ജോര്‍ദാന്‍, കെനിയ തുടങ്ങി ഇപ്പോള്‍ ലോകത്തെ ഏറ്റവും വലിയ ജനാധിപത്യ രാജ്യമായ ഇന്ത്യയിലും ഇതാണ് കാണുന്നതെന്നും കമ്മ്യൂണിസ്റ്റ് പാര്‍ട്ടി ഓഫ് ബ്രിട്ടന്‍ കുറ്റപ്പെടുത്തി.

സംഘടന സ്വാതന്ത്ര്യം, അഭിപ്രായ സ്വാതന്ത്ര്യം, കമ്മ്യൂണിസ്റ്റുകള്‍ക്ക് സംഘടിക്കാനുള്ള രാഷ്ട്രീയ അവകാശം എന്നിവയ്ക്ക് നേരെ ഏജന്‍സികള്‍ വഴി ഇന്ത്യന്‍ ഭരണകൂടം നടത്തുന്ന ജനധിപത്യ വിരുദ്ധ ആക്രമണങ്ങളെ പ്രതിരോധിക്കാനുള്ള സിപിഐഎമ്മിന്റെ പോരാട്ടത്തോട് ഐക്യപ്പെടുന്നുവെന്നും കമ്മ്യൂണിസ്റ്റ് പാര്‍ട്ടി ഓഫ് ബ്രിട്ടന്‍ പ്രസ്താവനയില്‍ പറഞ്ഞു.

നൂറ് വര്‍ഷങ്ങള്‍ക്ക് മുന്‍പ് ബ്രിട്ടീഷ് സാമ്രാജ്യത്വത്തില്‍ നിന്ന് ഇന്ത്യയെ മോചിപ്പിക്കാനുള്ള സ്വാതന്ത്യ സമരത്തിന് തുടക്കം കുറിച്ച ഇന്ത്യയിലെ കമ്മ്യൂണിസ്റ്റുകള്‍ വലിയ തോതിലുള്ള അടിച്ചമര്‍ത്തലുകളാണ് നേരിട്ടത്. ഇന്ന് മോദി സര്‍ക്കാരിന്റെ ജനവിരുദ്ധ, തൊഴിലാളി വിരുദ്ധ നയങ്ങള്‍ക്കെതിരെയുള്ള പോരാട്ടങ്ങളില്‍ സിപിഐഎം തൊഴിലാളികള്‍ക്കും കര്‍ഷകര്‍ക്കുമൊപ്പം നിലകൊള്ളുന്നു.

തൊഴിലാളി വര്‍ഗത്തിന്റെ ഇടം തിരിച്ചുപിടിക്കാനുള്ള പോരാട്ടം ദീര്‍ഘമേറിയതായിരിക്കും. എന്നാല്‍ ഇന്ത്യന്‍ കമ്മ്യൂണിസ്റ്റുകളുടെ മുന്നേറ്റത്തിന്റെ വഴി തടസ്സമില്ലാതെ തുടരുക തന്നെ ചെയ്യുമെന്നും കമ്മ്യൂണിസ്റ്റ് പാര്‍ട്ടി ഓഫ് ബ്രിട്ടന്‍ പറഞ്ഞു. ജനറല്‍ സെക്രട്ടറി അലക്‌സ് ഗോര്‍ഡനും ഇന്റര്‍നാഷണല്‍ സെക്രട്ടറി കെവന്‍ നെല്‍സണും ചേര്‍ന്നാണ് പ്രസ്താവന പുറത്തിറക്കിയിരിക്കുന്നത്.

### Related Links & Sources
- [Original Story Source](https://truevisionnews.com/news/362397/content-highlights-communist-party-of-britain-condemns-ed-raid-on-pinarayi-vijayan-residence)