---
title: "ഗുജറാത്ത് തീരത്ത് അതിസാഹസിക ലഹരിവേട്ട; പാക് തുറമുഖത്ത് നിന്നെത്തിയ കപ്പലിൽ നിന്ന് ആയിരം കോടിയുടെ കൊക്കെയ്ൻ പിടിച്ചു"
english_title: "content highlights:- Cocaine worth Rs 1,000 crore seized from ship arriving from Pakistani port"
publisher: "truevisionnews.com"
canonical_url: "https://truevisionnews.com/news/362122/content-highlights-cocaine-worth-rs-1000-crore-seized-from-ship-arriving-from-pakistani-port"
published_at: "2026-05-27T14:08:00+05:30"
category: "National"
language: "ml"
image: "https://cf.zdn.im/img/truevisionnews.com/0/image-uploads/6a16add175118_18.jpg"
keywords: ["Latest News", "Gujrat", "Pakisthan", "Cocaine"]
---

# ഗുജറാത്ത് തീരത്ത് അതിസാഹസിക ലഹരിവേട്ട; പാക് തുറമുഖത്ത് നിന്നെത്തിയ കപ്പലിൽ നിന്ന് ആയിരം കോടിയുടെ കൊക്കെയ്ൻ പിടിച്ചു

> **Lead Summary:** **കച്ച്:[ **രാജ്യത്തെ ഞെട്ടിച്ചുകൊണ്ട് ഗുജറാത്ത് തീരത്ത് അന്താരാഷ്ട്ര വിപണിയിൽ ആയിരം കോടി രൂപയിലധികം വിലമതിക്കുന്ന വൻ കൊക്കെയ്ൻ ശേഖരം പിടികൂടി.

## Article Content

**കച്ച്:[ **രാജ്യത്തെ ഞെട്ടിച്ചുകൊണ്ട് ഗുജറാത്ത് തീരത്ത് അന്താരാഷ്ട്ര വിപണിയിൽ ആയിരം കോടി രൂപയിലധികം വിലമതിക്കുന്ന വൻ കൊക്കെയ്ൻ ശേഖരം പിടികൂടി.

പാകിസ്ഥാനിലെ പോർട്ട് ഖാസിമിൽ നിന്നും പുറപ്പെട്ട് ഗുജറാത്ത് തീരത്തേക്ക് എത്തിയ, ഒരു യൂറോപ്യൻ രാജ്യത്തിന്റെ ഉടമസ്ഥതയിലുള്ള കപ്പലിൽ നിന്നാണ് ഇന്ത്യൻ കോസ്റ്റ് ഗാർഡും ഗുജറാത്ത് ഭീകരവിരുദ്ധ സേനയും (എ.ടി.എസ്) ചേർന്ന് നൂറ് കിലോഗ്രാമിലധികം വരുന്ന മയക്കുമരുന്ന് വേട്ട നടത്തിയത്.

പടിഞ്ഞാറൻ സമുദ്ര അതിർത്തിയിൽ അടുത്ത കാലത്തുണ്ടായ ഏറ്റവും വലിയ ലഹരിവേട്ടയാണിത്. രഹസ്യ വിവരത്തിന്റെ അടിസ്ഥാനത്തിൽ കടലിൽ വെച്ച് കപ്പൽ വളഞ്ഞ് സംയുക്തമായി നടത്തിയ അതിസാഹസികമായ ഓപ്പറേഷനിലാണ് ഈ ലഹരിശേഖരം കണ്ടെത്തിയത്.

സംഭവവുമായി ബന്ധപ്പെട്ട് കപ്പലിലുണ്ടായിരുന്ന ഒരാളെ സുരക്ഷാ ഉദ്യോഗസ്ഥർ അറസ്റ്റ് ചെയ്തിട്ടുണ്ട്. ഈ അന്താരാഷ്ട്ര ലഹരിക്കടത്തിന് പിന്നിൽ പ്രവർത്തിച്ച മാഫിയകളെയും, മയക്കുമരുന്ന് എത്തിക്കാൻ ലക്ഷ്യമിട്ട വിതരണ ശൃംഖലകളെയും കേന്ദ്രീകരിച്ച് അന്വേഷണ ഏജൻസികൾ വിപുലമായ അന്വേഷണം ആരംഭിച്ചു കഴിഞ്ഞു.

രാജ്യത്ത് കഴിഞ്ഞ ഒരൊറ്റ ആഴ്ചയ്ക്കുള്ളിൽ റിപ്പോർട്ട് ചെയ്യപ്പെടുന്ന മൂന്നാമത്തെ വലിയ കൊക്കെയ്ൻ വേട്ടയാണിത് എന്നതും അധികൃതരെ ആശങ്കപ്പെടുത്തുന്നുണ്ട്. ഇതിന് തൊട്ടുമുൻപ് മേയ് 23-ന് എത്യോപ്യയിലെ അഡിസ് അബാബയിൽ നിന്നും മുംബൈ വിമാനത്താവളത്തിൽ എത്തിയ ഒരു ദമ്പതികളെ സംശയത്തിന്റെ അടിസ്ഥാനത്തിൽ പിടികൂടിയിരുന്നു.

തുടർന്ന് നടത്തിയ പരിശോധനയിൽ ഇവർ കൊക്കെയ്ൻ അടങ്ങിയ 84 ഗുളികകൾ വിഴുങ്ങിയതായി കണ്ടെത്തുകയും ഇവരുടെ ശരീരത്തിൽ നിന്നും 1.40 കിലോഗ്രാം മയക്കുമരുന്ന് പുറത്തെടുക്കുകയും ചെയ്തു.

അതിനും മുൻപ് മേയ് 19-ന് ഇതേ റൂട്ടിൽ മുംബൈയിൽ എത്തിയ ആഫ്രിക്കൻ സ്വദേശിയിൽ നിന്നും ഒരു സ്ത്രീയിൽ നിന്നുമായി 4.25 കോടി രൂപ വിലമതിക്കുന്ന കൊക്കെയ്ൻ അടങ്ങിയ 63 ഗുളികകളും പിടിച്ചെടുത്തിരുന്നു.

ഈ രണ്ട് സംഭവങ്ങളിലുമായി നാല് പേരെയാണ് പോലീസ് അറസ്റ്റ് ചെയ്തത്. വിമാനത്താവളങ്ങൾ കേന്ദ്രീകരിച്ചുള്ള ലഹരിക്കടത്ത് തുടരുന്നതിനിടയിലാണ് ഇപ്പോൾ സമുദ്രമാർഗ്ഗം കടത്താൻ ശ്രമിച്ച ആയിരം കോടിയുടെ വൻ ലഹരിശേഖരം ഗുജറാത്ത് തീരത്ത് വെച്ച് സുരക്ഷാ സേന തകർത്തത്.

### Related Links & Sources
- [Original Story Source](https://truevisionnews.com/news/362122/content-highlights-cocaine-worth-rs-1000-crore-seized-from-ship-arriving-from-pakistani-port)