കുടയുണ്ടോ... വൈകുന്നേരം മഴ ഉറപ്പാ; അടുത്ത 3 മണിക്കൂറിൽ ഈ ജില്ലകളിൽ മഴയെത്തും, 27 വരെ ജാഗ്രതാ നിർദ്ദേശം

തിരുവനന്തപുരം: (truevisionnews.com) സംസ്ഥാനത്ത് വരുംദിവസങ്ങളിൽ മഴ ശക്തമാകാൻ സാധ്യതയുള്ളതിനാൽ വിവിധ ജില്ലകളിൽ കേന്ദ്ര കാലാവസ്ഥ വകുപ്പ് യെല്ലോ അലർട്ട് പ്രഖ്യാപിച്ചു.

ഇന്ന് ഒൻപത് ജില്ലകളിലാണ് ജാഗ്രതാ നിർദ്ദേശമുള്ളത്. കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, തൃശൂർ, കോഴിക്കോട്, കണ്ണൂർ, കാസർകോട് എന്നീ ജില്ലകളിലാണ് ഇന്ന് മഞ്ഞ അലർട്ട് ഏർപ്പെടുത്തിയിരിക്കുന്നത്.

നാളെ ഞായറാഴ്ച പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂർ എന്നീ ആറ് ജില്ലകളിൽ മഴ മുന്നറിയിപ്പുണ്ട്. വരും ദിവസങ്ങളിലും മഴ തുടരുമെന്നാണ് സൂചന. തിങ്കളാഴ്ച മലപ്പുറം, കോഴിക്കോട്, വയനാട് ഉൾപ്പെടെ ഒൻപത് ജില്ലകളിലും, ചൊവ്വാഴ്ച തെക്കൻ കേരളത്തിലെ മൂന്ന് ജില്ലകളിലും, ബുധനാഴ്ച തിരുവനന്തപുരം മുതൽ എറണാകുളം വരെയുള്ള ആറ് ജില്ലകളിലും യെല്ലോ അലർട്ട് പ്രഖ്യാപിച്ചിട്ടുണ്ട്.

ഈ മാസം 27-ാം തീയതി വരെ വിവിധ ജില്ലകളിൽ കനത്ത ജാഗ്രത തുടരും. അടുത്ത മൂന്ന് മണിക്കൂറിൽ തിരുവനന്തപുരം, കൊല്ലം, ആലപ്പുഴ, കോട്ടയം, എറണാകുളം, തൃശൂർ ജില്ലകളിൽ ഒറ്റപ്പെട്ടയിടങ്ങളിൽ ഇടിമിന്നലോട് കൂടിയ നേരിയതോ ഇടത്തരമോ ആയ മഴയ്ക്കൊപ്പം മണിക്കൂറിൽ 40 കിലോമീറ്റർ വരെ വേഗതയിൽ ശക്തമായ കാറ്റും വീശിയടിച്ചേക്കാം.

Also read: സേവനങ്ങൾ വേഗത്തിൽ...! 2.5 ലക്ഷം ഭൂമി തരംമാറ്റ അപേക്ഷകൾ തീർപ്പാക്കാൻ ലക്ഷ്യം; റവന്യൂ വകുപ്പിന്റെ 100 ദിന കർമ്മപദ്ധതി പ്രഖ്യാപിച്ച് മന്ത്രി എ.പി. അനിൽകുമാർ

മറ്റ് ജില്ലകളിൽ ഒറ്റപ്പെട്ടയിടങ്ങളിൽ നേരിയ മഴയ്ക്കുള്ള സാധ്യതയുണ്ടെന്നും കാലാവസ്ഥാ കേന്ദ്രം വ്യക്തമാക്കി. വരും ദിവസങ്ങളിൽ കാറ്റിന്റെ വേഗത വർദ്ധിക്കാൻ സാധ്യതയുണ്ട്. ഇതനുസരിച്ച് സംസ്ഥാനത്ത് ഒറ്റപ്പെട്ടയിടങ്ങളിൽ ഈ മാസം 26 വരെ ശക്തമായ ഇടിമിന്നലിനൊപ്പം മണിക്കൂറിൽ 40 മുതൽ 50 കിലോമീറ്റർ വരെ വേഗതയിൽ വീശിയടിക്കാവുന്ന ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നൽകുന്നു.

Content Highlight: Meteorological Department announces yellow alert

#Latest News #Kerala Monsoon #Thiruvanandapuram #Alert