---
title: "26-ഓടെ കാലവർഷം എത്തും; മഴക്കൊപ്പം ശക്തമായ കാറ്റിനും സാധ്യത, തീരദേശത്തും മലയോരത്തും കനത്ത ജാഗ്രതാ നിർദ്ദേശം"
english_title: "CONTENT HIGHLIGHTS kerala Monsoon may arrive on the 26th"
publisher: "truevisionnews.com"
canonical_url: "https://truevisionnews.com/news/361048/content-highlights-monsoon-may-arrive-on-the-26th"
published_at: "2026-05-22T15:31:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a102b3da43fd_24.jpg"
keywords: ["Latest News", "Kerala Monsoon", "Cautionary Note", "Thiruvanandapuram"]
---

# 26-ഓടെ കാലവർഷം എത്തും; മഴക്കൊപ്പം ശക്തമായ കാറ്റിനും സാധ്യത, തീരദേശത്തും മലയോരത്തും കനത്ത ജാഗ്രതാ നിർദ്ദേശം

> **Lead Summary:** **തിരുവനന്തപുരം: [** അറബിക്കടലിന് മുകളിൽ ചക്രവാതച്ചുഴി രൂപപ്പെട്ടതിനെ തുടർന്ന് സംസ്ഥാനത്ത് വരും ദിവസങ്ങളിൽ മഴ കടുക്കുമെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്.

## Article Content

**തിരുവനന്തപുരം: [** അറബിക്കടലിന് മുകളിൽ ചക്രവാതച്ചുഴി രൂപപ്പെട്ടതിനെ തുടർന്ന് സംസ്ഥാനത്ത് വരും ദിവസങ്ങളിൽ മഴ കടുക്കുമെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്.

ഇതിനൊപ്പം കേരളത്തിനും തെക്കൻ തമിഴ്‌നാടിനും മുകളിലൂടെ കന്യാകുമാരി വരെ നീളുന്ന ന്യൂനമർദ്ദ പാത്തിയും സജീവമായിട്ടുണ്ട്. ഇതിന്റെ സ്വാധീനത്താൽ ഈ മാസം 26 വരെ കേരളത്തിൽ ഒറ്റപ്പെട്ടയിടങ്ങളിൽ ശക്തമായ മഴ തുടരാനാണ് സാധ്യത.

മഴ മുന്നറിയിപ്പിന്റെ ഭാഗമായി ഇന്ന് സംസ്ഥാനത്തെ എട്ട് ജില്ലകളിൽ പ്രത്യേക ജാഗ്രതാ നിർദ്ദേശം പുറപ്പെടുവിച്ചിട്ടുണ്ട്. കനത്ത മഴ സാധ്യത കണക്കിലെടുത്ത് ആലപ്പുഴ ജില്ലയിൽ ഇന്ന് ഓറഞ്ച് അലർട്ട് പ്രഖ്യാപിച്ചു.

ഇവിടെ ശക്തമായ മഴയ്‌ക്കൊപ്പം മണിക്കൂറിൽ വൻ വേഗതയിൽ കാറ്റ് വീശാനും സാധ്യതയുണ്ടെന്ന് അധികൃതർ വ്യക്തമാക്കുന്നു. ആലപ്പുഴയ്ക്ക് പുറമെ തിരുവനന്തപുരം, കൊല്ലം, പത്തനംതിട്ട, കോട്ടയം, ഇടുക്കി, എറണാകുളം, കോഴിക്കോട് എന്നീ ഏഴ് ജില്ലകളിൽ ഇന്ന് യെല്ലോ അലർട്ടും പ്രഖ്യാപിച്ചിട്ടുണ്ട്.

ഈ മാസം 26-ഓടെ സംസ്ഥാനത്ത് ഇത്തവണത്തെ കാലവർഷം (എടവപ്പാതി) എത്തിച്ചേരുമെന്നാണ് പ്രവചനം. ചക്രവാതച്ചുഴിയുടെയും ന്യൂനമർദ്ദ പാത്തിയുടെയും പശ്ചാത്തലത്തിൽ നിലവിൽ ലഭിക്കുന്ന വേനൽമഴയ്ക്ക് പിന്നാലെ, കാലവർഷം കൂടി എത്തുന്നതോടെ വരും ദിവസങ്ങളിൽ കേരളത്തിൽ മഴ പെയ്ത്ത് കൂടുതൽ ശക്തമാകുമെന്നാണ് കാലാവസ്ഥാ നിരീക്ഷകർ നൽകുന്ന സൂചന.

താഴ്ന്ന പ്രദേശങ്ങളിലുള്ളവരും മലയോര മേഖലയിലുള്ളവരും ജാഗ്രത പാലിക്കണമെന്ന് ദുരന്തനിവാരണ അതോറിറ്റി അറിയിച്ചു.

### Related Links & Sources
- [Original Story Source](https://truevisionnews.com/news/361048/content-highlights-monsoon-may-arrive-on-the-26th)