---
title: "കോംഗോയിൽ വൻ അക്രമം; എബോള ബാധിച്ച മൃതദേഹം വിട്ടുനൽകാത്തതിനെച്ചൊല്ലി ചികിത്സാ കേന്ദ്രം ജനങ്ങൾ തീയിട്ടു നശിപ്പിച്ചു"
english_title: "content highlights People set fire to a treatment center in Congo"
publisher: "truevisionnews.com"
canonical_url: "https://truevisionnews.com/news/361004/content-highlights-people-set-fire-to-a-treatment-center-in-congo"
published_at: "2026-05-22T13:32:00+05:30"
category: "International"
language: "ml"
image: "https://cf.zdn.im/img/truevisionnews.com/0/image-uploads/6a100e3badaca_17.jpg"
keywords: ["Latest News", "Kinshasa", "Ebola disease"]
---

# കോംഗോയിൽ വൻ അക്രമം; എബോള ബാധിച്ച മൃതദേഹം വിട്ടുനൽകാത്തതിനെച്ചൊല്ലി ചികിത്സാ കേന്ദ്രം ജനങ്ങൾ തീയിട്ടു നശിപ്പിച്ചു

> **Lead Summary:** **കിൻഷസ: [ **ഡെമോക്രാറ്റിക് റിപ്പബ്ലിക് ഓഫ് കോംഗോയിൽ എബോള ബാധിച്ച് മരിച്ചയാളുടെ മൃതദേഹം വിട്ടുകൊടുക്കാത്തതിനെ ചൊല്ലിയുണ്ടായ തർക്കത്തിനൊടുവിൽ ചികിത്സാ കേന്ദ്രം ജനക്കൂട്ടം അക്രമാസക്തമായി തീയിട്ടു നശിപ്പിച്ചു.

## Article Content

**കിൻഷസ: [ **ഡെമോക്രാറ്റിക് റിപ്പബ്ലിക് ഓഫ് കോംഗോയിൽ എബോള ബാധിച്ച് മരിച്ചയാളുടെ മൃതദേഹം വിട്ടുകൊടുക്കാത്തതിനെ ചൊല്ലിയുണ്ടായ തർക്കത്തിനൊടുവിൽ ചികിത്സാ കേന്ദ്രം ജനക്കൂട്ടം അക്രമാസക്തമായി തീയിട്ടു നശിപ്പിച്ചു.

ഇറ്റൂരി പ്രവിശ്യയിലെ റാംപാര നഗരത്തിൽ വ്യാഴാഴ്ചയാണ് അന്താരാഷ്ട്ര ആരോഗ്യപ്രവർത്തകരെയും സുരക്ഷാസേനയെയും ഞെട്ടിച്ച സംഭവം അരങ്ങേറിയത്. എബോള ബാധിച്ച് മരണപ്പെട്ട ഒരു പ്രാദേശിക ഫുട്ബോൾ കളിക്കാരന്റെ മൃതദേഹം പരമ്പരാഗത ചടങ്ങുകളോടെ സംസ്കരിക്കാൻ സുഹൃത്തുക്കൾക്കും ബന്ധുക്കൾക്കും വിട്ടുനൽകാൻ അധികൃതർ വിസമ്മതിച്ചതാണ് കനത്ത അക്രമത്തിന് കാരണമായത്.

എബോള ബാധിതരുടെ മൃതദേഹങ്ങളിൽ നിന്ന് രോഗം അതിവേഗം പടരാൻ സാധ്യതയുള്ളതിനാൽ കർശനമായ ആരോഗ്യ സുരക്ഷാ മാനദണ്ഡങ്ങൾ പാലിച്ച് മാത്രമേ സംസ്കാരം നടത്താവൂ എന്ന് അധികൃതർ നിലപാടെടുത്തു.

എന്നാൽ, തങ്ങളുടെ പ്രിയപ്പെട്ടവന് അവസാന കർമ്മങ്ങൾ ചെയ്യാനുള്ള അനുമതി നിഷേധിച്ചത് ക്രൂരതയാണെന്ന് ആരോപിച്ച് ഒരുകൂട്ടം യുവാക്കൾ കേന്ദ്രത്തിലേക്ക് ഇരച്ചുകയറുകയായിരുന്നു.

ആരോഗ്യപ്രവർത്തകർക്കും എബോള പ്രതിരോധ പ്രവർത്തനങ്ങൾക്കുമെതിരെ പ്രദേശവാസികൾക്കിടയിൽ നിലനിൽക്കുന്ന കടുത്ത അവിശ്വാസവും പ്രതിഷേധവും ജ്വലിപ്പിക്കുന്നതായിരുന്നു തുടർന്നങ്ങോട്ടുള്ള സംഭവങ്ങൾ.

കേന്ദ്രത്തിനുള്ളിലേക്ക് അതിക്രമിച്ചു കയറിയ അക്രമികൾ വിലപിടിപ്പുള്ള മെഡിക്കൽ ഉപകരണങ്ങളും സാധനങ്ങളും തല്ലിത്തകർക്കുകയും എബോള രോഗികളെ പാർപ്പിച്ചിരുന്ന താൽക്കാലിക ടെന്റുകൾക്ക് തീയിടുകയും ചെയ്തു.

അക്രമത്തിനിടെ അന്ന് സംസ്കരിക്കാനായി പ്രത്യേകമായി സൂക്ഷിച്ചിരുന്ന ഒരു മൃതദേഹവും ടെന്റുകൾക്കൊപ്പം പൂർണ്ണമായി കത്തിയമർന്നു. സ്ഥിതിഗതികൾ നിയന്ത്രണവിധേയമാക്കാൻ പോലീസ് കണ്ണീർവാതകം പ്രയോഗിക്കുകയും ആകാശത്തേക്ക് വെടിയുതിർക്കുകയും ചെയ്തെങ്കിലും പ്രകോപിതരായ ജനക്കൂട്ടത്തെ തടഞ്ഞുനിർത്താനായില്ല.

ജീവന് ഭീഷണിയുയർന്നതോടെ സന്നദ്ധപ്രവർത്തകർ വാഹനങ്ങളിൽ അവിടെനിന്നും അടിയന്തരമായി രക്ഷപ്പെടുകയായിരുന്നു. ആക്രമണം നടക്കുമ്പോൾ കേന്ദ്രത്തിൽ ചികിത്സയിലുണ്ടായിരുന്ന ആറ് എബോള രോഗികളെ ഉദ്യോഗസ്ഥർ അതീവ സുരക്ഷിതമായി മറ്റൊരു ആശുപത്രിയിലേക്ക് മാറ്റിപ്പാർപ്പിച്ചു.

### Related Links & Sources
- [Original Story Source](https://truevisionnews.com/news/361004/content-highlights-people-set-fire-to-a-treatment-center-in-congo)