---
title: "എബോള: നദീതീരത്തു നിന്ന് ലോകത്തെ വിറപ്പിച്ച മഹാമാരിയുടെ കഥ, എന്താണ് എബോള വൈറസ്?"
english_title: "Main causes of Ebola virus"
publisher: "truevisionnews.com"
canonical_url: "https://truevisionnews.com/news/360806/main-causes-of-ebola-virus"
published_at: "2026-05-21T14:21:00+05:30"
category: "Health"
language: "ml"
image: "https://cf.zdn.im/img/truevisionnews.com/0/image-uploads/6a0ec85118dbe_sdgdefg.jpg"
keywords: ["Ebola Virus", "Health", "Infection", "Disease"]
---

# എബോള: നദീതീരത്തു നിന്ന് ലോകത്തെ വിറപ്പിച്ച മഹാമാരിയുടെ കഥ, എന്താണ് എബോള വൈറസ്?

> **Lead Summary:** **[** ഫിലോവിരിഡേ വൈറസ് കുടുംബത്തിൽ പെട്ട ഒരു ആർ.എൻ.എ വൈറസാണ് എബോള. മനുഷ്യരിലും മറ്റ് പ്രൈമേറ്റുകളിലും (കുരങ്ങുകൾ, ചിമ്പാൻസികൾ) , കഠിനമായ രക്തസ്രാവത്തോടു കൂടിയ പനിയായ എബോള ഹെമറാജിക് ഫീവർ ഉണ്ടാക്കാൻ ഈ വൈറസിന് ശേഷിയുണ്ട്. ബാധിക്കപ്പെടുന്നവരിൽ മരണനിരക്ക് വളരെ ഉയർന്നതാണ് ഏകദേശം 50% മുതൽ 90% വരെ.

## Article Content

**[** ഫിലോവിരിഡേ വൈറസ് കുടുംബത്തിൽ പെട്ട ഒരു ആർ.എൻ.എ വൈറസാണ് എബോള. മനുഷ്യരിലും മറ്റ് പ്രൈമേറ്റുകളിലും (കുരങ്ങുകൾ, ചിമ്പാൻസികൾ) , കഠിനമായ രക്തസ്രാവത്തോടു കൂടിയ പനിയായ എബോള ഹെമറാജിക് ഫീവർ ഉണ്ടാക്കാൻ ഈ വൈറസിന് ശേഷിയുണ്ട്. ബാധിക്കപ്പെടുന്നവരിൽ മരണനിരക്ക് വളരെ ഉയർന്നതാണ് ഏകദേശം 50% മുതൽ 90% വരെ.

1976-ൽ ആഫ്രിക്കൻ രാജ്യങ്ങളായ കോംഗോയിലും സുഡാനിലുമാണ് എബോള വൈറസ് രോഗം ആദ്യമായി തിരിച്ചറിഞ്ഞത്. കോംഗോയിലെ യംബുകു എന്ന ഗ്രാമത്തിന് സമീപത്തുകൂടി ഒഴുകുന്ന 'എബോള' എന്ന നദിയുടെ പേരിൽ നിന്നാണ് ഈ മാരക വൈറസിന് എബോള എന്ന പേര് ലഭിച്ചത്. ആദ്യമായി കണ്ടെത്തിയതിനു ശേഷം പലപ്പോഴായി ആഫ്രിക്കൻ രാജ്യങ്ങളിൽ ഈ രോഗം റിപ്പോർട്ട് ചെയ്യപ്പെട്ടിട്ടുണ്ടെങ്കിലും, ചരിത്രത്തിലെ ഏറ്റവും ഭീകരവും വ്യാപകവുമായ എബോള പൊട്ടിപ്പുറപ്പെടൽ ഉണ്ടായത് 2014-2016 കാലഘട്ടത്തിലാണ്. ഗിനിയ, ലൈബീരിയ, സിയറ ലിയോൺ തുടങ്ങിയ പശ്ചിമാഫ്രിക്കൻ രാജ്യങ്ങളെയാണ് ഈ മഹാമാരി അക്കാലത്ത് ഏറ്റവും കൂടുതൽ തകർത്തത്.

എബോള ഒരു വായുവിലൂടെ പകരുന്ന രോഗമല്ല മറിച്ച്, കാട്ടിലെ ഒരുതരം പഴംതീനി വവ്വാലുകളിൽ നിന്നാണ് ഈ വൈറസ് പ്രകൃതിദത്തമായി പടരുന്നതെന്ന് കരുതപ്പെടുന്നു. രോഗബാധയുള്ള വവ്വാലുകൾ, കുരങ്ങുകൾ എന്നിവയുടെ രക്തം, മാംസം, ശരീരസ്രവങ്ങൾ എന്നിവയുമായുള്ള സമ്പർക്കത്തിലൂടെയാണ് ഇത് മൃഗങ്ങളിൽ നിന്ന് മനുഷ്യരിലേക്ക് എത്തുന്നത്.

തുടർന്ന്, രോഗബാധിതനായ ഒരു വ്യക്തിയുടെ രക്തം, തുപ്പൽ, വിയർപ്പ്, മൂത്രം തുടങ്ങിയ ശരീരസ്രവങ്ങളുമായി നേരിട്ടോ, അവർ ഉപയോഗിച്ച വസ്ത്രങ്ങൾ, സൂചികൾ, കിടക്കകൾ എന്നിവ വഴിയോ രോഗം മനുഷ്യരിൽ നിന്ന് മനുഷ്യരിലേക്ക് വേഗത്തിൽ പകരുന്നു. വൈറസ് ശരീരത്തിൽ പ്രവേശിച്ച് 2 മുതൽ 21 ദിവസങ്ങൾക്കുള്ളിൽ കടുത്ത പനി, കഠിനമായ തലവേദന, തൊണ്ടവേദന, പേശിവേദന, ഛർദ്ദി, വയറിളക്കം, ചുവന്ന പാടുകൾ എന്നിവയ്ക്ക് പുറമെ ആന്തരികവും ബാഹ്യവുമായ രക്തസ്രാവം പോലുള്ള മാരകമായ രോഗലക്ഷണങ്ങൾ കണ്ടുതുടങ്ങാം.

എലിസ , പി.സി.ആർ തുടങ്ങിയ രക്തപരിശോധനകളിലൂടെയാണ് രോഗനിർണ്ണയം നടത്തുന്നത്. എബോളയ്ക്ക് കൃത്യമായ ഒറ്റമൂലി ചികിത്സയില്ലെങ്കിലും, ഒആർഎസ് നൽകി ശരീരത്തിലെ ജലാംശം നിലനിർത്തുന്നതുൾപ്പെടെയുള്ള സപ്പോർട്ടീവ് കെയറിലൂടെയും ലക്ഷണങ്ങൾക്കനുസരിച്ചുള്ള മരുന്നുകളിലൂടെയുമാണ് രോഗിയെ പരിചരിക്കുന്നത്.

കൂടാതെ, സമീപവർഷങ്ങളിൽ വികസിപ്പിച്ചെടുത്ത ഫലപ്രദമായ വാക്സിനുകളും (ഉദാഹരണത്തിന്: എർവെബോ വാക്സിൻ) മോണോക്ലോണൽ ആന്റിബോഡി മരുന്നുകളും മരണനിരക്ക് കുറയ്ക്കാൻ സഹായിക്കുന്നുണ്ട്.

സമ്പർക്കം പൂർണ്ണമായും ഒഴിവാക്കുക, ആരോഗ്യപ്രവർത്തകർ പി.പി.ഇ കിറ്റും ഗ്ലൗസും ധരിക്കുക, മരിച്ചവരുടെ മൃതദേഹങ്ങൾ സുരക്ഷിതമായി സംസ്കരിക്കുക, വവ്വാലുകൾ കടിച്ചിട്ട പഴങ്ങളോ കാട്ടുമൃഗങ്ങളുടെ മാംസമോ കഴിക്കാതിരിക്കുക, കൈകൾ സോപ്പുപയോഗിച്ച് വൃത്തിയായി കഴുകുക എന്നിവയാണ് പ്രധാന പ്രതിരോധ മാർഗ്ഗങ്ങൾ.

ആരോഗ്യമേഖലയ്ക്ക് വലിയൊരു ഭീഷണിയാണെങ്കിലും, കൃത്യമായ മുൻകരുതലുകളിലൂടെയും രോഗികളെ മാറ്റിപ്പാർപ്പിക്കുന്നതിലൂടെയും വ്യക്തിശുചിത്വം പാലിക്കുന്നതിലൂടെയും എബോള വ്യാപനം പൂർണ്ണമായി തടയാൻ സാധിക്കും.

### Related Links & Sources
- [Original Story Source](https://truevisionnews.com/news/360806/main-causes-of-ebola-virus)