---
title: "എബോള ഭീതി: കേന്ദ്ര സർക്കാരിന്റെ അടിയന്തര ഉന്നതതല യോഗം; സംസ്ഥാനങ്ങൾക്ക് കർശന ജാഗ്രതാ നിർദ്ദേശം, ഐസൊലേഷൻ വാർഡുകൾ ഒരുക്കും"
english_title: "Content Highlights:- Central government holds emergency high-level meeting; states issued strict alert, isolation wards to be set up"
publisher: "truevisionnews.com"
canonical_url: "https://truevisionnews.com/news/360738/content-highlights-central-government-holds-emergency-high-level-meeting-states-issued-strict-alert-isolation-wards-to-be-set-up"
published_at: "2026-05-21T10:44:00+05:30"
category: "National"
language: "ml"
image: "https://cf.zdn.im/img/truevisionnews.com/0/image-uploads/6a0e950a4290b_Central_government_holds_emergency_high-level_meeting;.jpg"
keywords: ["Latest News", "Health Ministry", "Ebola Virus", "Health Ministry Ebola Meeting", "India"]
---

# എബോള ഭീതി: കേന്ദ്ര സർക്കാരിന്റെ അടിയന്തര ഉന്നതതല യോഗം; സംസ്ഥാനങ്ങൾക്ക് കർശന ജാഗ്രതാ നിർദ്ദേശം, ഐസൊലേഷൻ വാർഡുകൾ ഒരുക്കും

> **Lead Summary:** ഡല്‍ഹി: ആഫ്രിക്കൻ രാജ്യങ്ങളിൽ എബോള വൈറസ് അതിവേഗം പടർന്നുപിടിക്കുന്ന പശ്ചാത്തലത്തിൽ, രാജ്യത്ത് മുൻകരുതൽ നടപടികൾ ശക്തമാക്കി കേന്ദ്ര സർക്കാർ. പ്രതിരോധ പ്രവർത്തനങ്ങൾ വിലയിരുത്തുന്നതിനായി കേന്ദ്ര ആരോഗ്യ സെക്രട്ടറിയുടെ അധ്യക്ഷതയിൽ അടിയന്തര ഉന്നതതല യോഗം ചേർന്നു. രാജ്യത്തെ മുഴുവൻ സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും ആരോഗ്യ സെക്രട്ടറിമാർ യോഗത്തിൽ പങ്കെടുത്തു.

## Article Content

ഡല്‍ഹി: ആഫ്രിക്കൻ രാജ്യങ്ങളിൽ എബോള വൈറസ് അതിവേഗം പടർന്നുപിടിക്കുന്ന പശ്ചാത്തലത്തിൽ, രാജ്യത്ത് മുൻകരുതൽ നടപടികൾ ശക്തമാക്കി കേന്ദ്ര സർക്കാർ. പ്രതിരോധ പ്രവർത്തനങ്ങൾ വിലയിരുത്തുന്നതിനായി കേന്ദ്ര ആരോഗ്യ സെക്രട്ടറിയുടെ അധ്യക്ഷതയിൽ അടിയന്തര ഉന്നതതല യോഗം ചേർന്നു. രാജ്യത്തെ മുഴുവൻ സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും ആരോഗ്യ സെക്രട്ടറിമാർ യോഗത്തിൽ പങ്കെടുത്തു.

വൈറസ് വ്യാപനം തടയുന്നതിനുള്ള പ്രതിരോധ നടപടികളും ഒരുക്കങ്ങളും യോഗം വിശദമായി വിലയിരുത്തി. ഇന്ത്യയിൽ ഇതുവരെ പുതിയ എബോള കേസുകളൊന്നും റിപ്പോർട്ട് ചെയ്തിട്ടില്ലെന്ന് കേന്ദ്ര ആരോഗ്യ മന്ത്രാലയം വ്യക്തമാക്കി. ആഫ്രിക്കൻ രാജ്യങ്ങളിലെ വൻ രോഗവ്യാപനം കണക്കിലെടുത്ത് ലോകാരോഗ്യ സംഘടന അന്താരാഷ്ട്ര ആരോഗ്യ അടിയന്തരാവസ്ഥ പ്രഖ്യാപിച്ച സാഹചര്യത്തിലാണ് കേന്ദ്ര സർക്കാർ അടിയന്തര യോഗം വിളിച്ചുചേർത്തത്.

മുൻകരുതൽ നടപടിയെന്ന നിലയിൽ രാജ്യത്തെ വിമാനത്താവളങ്ങളിലും തുറമുഖങ്ങളിലും നിരീക്ഷണ സംവിധാനങ്ങൾ ശക്തമാക്കാൻ നിർദേശം നൽകിയിട്ടുണ്ട്. ആശുപത്രികളിൽ പ്രത്യേക ഐസൊലേഷൻ വാർഡുകൾ സജ്ജമാക്കുക, സ്ക്രീനിങ്, ക്വാറന്റൈൻ, ടെസ്റ്റിങ് സംവിധാനങ്ങൾ ഉറപ്പാക്കുക തുടങ്ങിയ കാര്യങ്ങളിൽ പാലിക്കേണ്ട വിശദമായ സ്റ്റാൻഡേർഡ് ഓപ്പറേറ്റിങ് നടപടിക്രമങ്ങൾ കേന്ദ്രം സംസ്ഥാനങ്ങൾക്ക് കൈമാറി. മുൻപ് മറ്റ് പകർച്ചവ്യാധികൾ പടർന്നുപിടിച്ചപ്പോഴും ഇന്ത്യ സമാനമായ പ്രതിരോധ മുൻകരുതലുകൾ വിജയകരമായി സ്വീകരിച്ചിരുന്നു.

ആഫ്രിക്കൻ രാജ്യമായ ഡെമോക്രാറ്റിക് റിപ്പബ്ലിക് ഓഫ് കോംഗോയിലാണ് നിലവിൽ എബോള അതിരൂക്ഷമായിരിക്കുന്നത്. ഇവിടെ മാത്രം നിരവധി കേസുകളാണ് സ്ഥിരീകരിച്ചിട്ടുള്ളത്. കോംഗോയ്ക്ക് പുറമേ അയൽരാജ്യങ്ങളായ ഉഗാണ്ട, കെനിയ തുടങ്ങിയ ഇടങ്ങളിലേക്കും രോഗം പടർന്നിട്ടുണ്ട്. രോഗലക്ഷണങ്ങളോടെ നൂറുകണക്കിന് ആളുകളാണ് നിലവിൽ നിരീക്ഷണത്തിലുള്ളത്.

### Related Links & Sources
- [Original Story Source](https://truevisionnews.com/news/360738/content-highlights-central-government-holds-emergency-high-level-meeting-states-issued-strict-alert-isolation-wards-to-be-set-up)