---
title: "കാണാൻ സുന്ദരി, കഴിക്കാൻ അതിലേറെ രുചി! മാംഗോ ക്രേപ്പ് റോൾ ഇനി നിങ്ങളുടെ അടുക്കളയിലും!"
english_title: "Beautiful to look at, even more delicious to eat! Mango Crepe Roll is now in your kitchen!"
publisher: "truevisionnews.com"
canonical_url: "https://truevisionnews.com/news/359335/beautiful-to-look-at-even-more-delicious-to-eat-mango-crepe-roll-is-now-in-your-kitchen"
published_at: "2026-05-14T12:37:00+05:30"
category: "Cookery"
language: "ml"
image: "https://cf.zdn.im/img/truevisionnews.com/0/image-uploads/6a05751476d38_edf.jpg"
keywords: []
---

# കാണാൻ സുന്ദരി, കഴിക്കാൻ അതിലേറെ രുചി! മാംഗോ ക്രേപ്പ് റോൾ ഇനി നിങ്ങളുടെ അടുക്കളയിലും!

> **Lead Summary:** വേനൽക്കാലത്തിന് കുളിർമയേകാൻ മാമ്പഴം കൊണ്ട് തയ്യാറാക്കാവുന്ന ഏറ്റവും രുചികരവും വ്യത്യസ്തവുമായ ഒരു വിഭവമാണ് മാംഗോ ക്രേപ്പ് റോൾ. കുട്ടികൾക്കും മുതിർന്നവർക്കും ഒരുപോലെ ഇഷ്ടപ്പെടുന്ന ഈ ഡെസേർട്ട്, കാണാൻ വളരെ മനോഹരവും കഴിക്കാൻ നല്ല സോഫ്റ്റുമാണ്. കുറഞ്ഞ ചേരുവകൾ കൊണ്ട് വീട്ടിൽ തന്നെ ഇത് എങ്ങനെ റെസ്റ്റോറന്റ് സ്റ്റൈലിൽ തയ്യാറാക്കാമെന്ന് നോക്കാം.**

## Article Content

വേനൽക്കാലത്തിന് കുളിർമയേകാൻ മാമ്പഴം കൊണ്ട് തയ്യാറാക്കാവുന്ന ഏറ്റവും രുചികരവും വ്യത്യസ്തവുമായ ഒരു വിഭവമാണ് മാംഗോ ക്രേപ്പ് റോൾ. കുട്ടികൾക്കും മുതിർന്നവർക്കും ഒരുപോലെ ഇഷ്ടപ്പെടുന്ന ഈ ഡെസേർട്ട്, കാണാൻ വളരെ മനോഹരവും കഴിക്കാൻ നല്ല സോഫ്റ്റുമാണ്. കുറഞ്ഞ ചേരുവകൾ കൊണ്ട് വീട്ടിൽ തന്നെ ഇത് എങ്ങനെ റെസ്റ്റോറന്റ് സ്റ്റൈലിൽ തയ്യാറാക്കാമെന്ന് നോക്കാം.**

ആവശ്യമായ സാധനങ്ങൾ:**

*മൈദ - 1 കപ്പ്*

*മുട്ട - 2 എണ്ണം*

*പാൽ - 1.5 കപ്പ്*

*പഞ്ചസാര - 2 ടേബിൾസ്പൂൺ*

*ഉപ്പ് - ഒരു നുള്ള്*

*ഉരുക്കിയ വെണ്ണ  - 2 ടേബിൾസ്പൂൺ*

*മഞ്ഞ ഫുഡ് കളർ - 2 തുള്ളി (നിർബന്ധമില്ല)*

*വിപ്പിംഗ് ക്രീം - 1 കപ്പ്*

*പഞ്ചസാര പൊടിച്ചത് - 2 ടേബിൾസ്പൂൺ*

*നന്നായി പഴുത്ത മാമ്പഴം - നീളത്തിൽ അരിഞ്ഞത്*

**തയ്യാറാക്കുന്ന വിധം:**

ക്രേപ്പ് ബാറ്റർ തയ്യാറാക്കാം ഒരു ബൗളിൽ മുട്ടയും പഞ്ചസാരയും ചേർത്ത് നന്നായി അടിച്ചെടുക്കുക. ഇതിലേക്ക് പാൽ, ഉരുക്കിയ വെണ്ണ, ഉപ്പ് എന്നിവ ചേർത്ത് ഇളക്കുക. അരിച്ചെടുത്ത മൈദ കുറേശ്ശെയായി ഇതിലേക്ക് ചേർത്ത് കട്ടകളില്ലാതെ യോജിപ്പിക്കുക (മിക്സിയിൽ അടിച്ചെടുത്താൽ കുറച്ചുകൂടി എളുപ്പമായിരിക്കും).

മാവ് അധികം കട്ടിയുള്ളതാകരുത്, ദോശമാവിനേക്കാൾ അയവുള്ളതായിരിക്കണം. ഇത് ഒരു അരിപ്പയിലൂടെ അരിച്ചെടുക്കുന്നത് കട്ടകൾ ഒഴിവാക്കാൻ സഹായിക്കും. ക്രേപ്പ് ചുട്ടെടുക്കാം ഒരു നോൺ-സ്റ്റിക് പാൻ അടുപ്പത്ത് വെച്ച് അല്പം വെണ്ണ തടവുക. ഒരു തവി മാവ് ഒഴിച്ച് പാൻ ചുറ്റിച്ച് നേർത്ത രീതിയിൽ പരത്തുക. തീ കുറച്ച് വെച്ച് ഒരു വശം മാത്രം വേവിച്ചെടുക്കുക (മുകൾ വശം ഉണങ്ങി വരുമ്പോൾ പാനിൽ നിന്ന് മാറ്റാം). തിരിച്ചിടേണ്ട ആവശ്യമില്ല. ബാക്കിയുള്ള മാവും ഇതുപോലെ തയ്യാറാക്കി തണുക്കാൻ വെക്കുക.

വിപ്പിംഗ് ക്രീം തയ്യാറാക്കാം നന്നായി തണുത്ത വിപ്പിംഗ് ക്രീമിലേക്ക് പൊടിച്ച പഞ്ചസാര ചേർത്ത് സ്റ്റിഫ് ആകുന്നത് വരെ (നന്നായി കട്ടിയാകുന്നത് വരെ) ബീറ്റ് ചെയ്തെടുക്കുക. റോൾ ചെയ്യാം തണുത്ത ഒരു ക്രേപ്പ് എടുത്ത് അതിന്റെ നടുവിലായി കുറച്ച് വിപ്പിംഗ് ക്രീം വെക്കുക. ക്രീമിന് മുകളിലായി നീളത്തിൽ അരിഞ്ഞ മാമ്പഴം വെക്കുക. ക്രേപ്പിന്റെ രണ്ട് വശങ്ങളും മടക്കിയ ശേഷം പായ റോൾ ചെയ്യുന്നതുപോലെ സാവധാനം റോൾ ചെയ്തെടുക്കുക.

തയ്യാറാക്കിയ റോളുകൾ ഒരു പാത്രത്തിലാക്കി 1-2 മണിക്കൂർ ഫ്രിഡ്ജിൽ വെച്ച് തണുപ്പിക്കുക. ഇത് ക്രീം സെറ്റാകാൻ സഹായിക്കും. തണുത്തതിന് ശേഷം പാതിയായി മുറിച്ച് വിളമ്പാം. സ്വാദിഷ്ടമായ മാംഗോ ക്രേപ്പ് റോൾ റെഡി!

**പ്രത്യേകം ശ്രദ്ധിക്കാൻ: **ക്രേപ്പ് നന്നായി തണുത്തതിന് ശേഷം മാത്രം ക്രീം നിറയ്ക്കുക, അല്ലാത്തപക്ഷം ക്രീം ഉരുകിപ്പോകാൻ സാധ്യതയുണ്ട്.

### Related Links & Sources
- [Original Story Source](https://truevisionnews.com/news/359335/beautiful-to-look-at-even-more-delicious-to-eat-mango-crepe-roll-is-now-in-your-kitchen)