---
title: "സ്വർണവില കുതിച്ചുയരും; ഇറക്കുമതി തീരുവ 15 ശതമാനമാക്കി കേന്ദ്രം"
english_title: "Gold prices will soar"
publisher: "truevisionnews.com"
canonical_url: "https://truevisionnews.com/news/359044/gold-prices-will-soar"
published_at: "2026-05-13T09:28:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a03f72278ea0_1.jpg"
keywords: []
---

# സ്വർണവില കുതിച്ചുയരും; ഇറക്കുമതി തീരുവ 15 ശതമാനമാക്കി കേന്ദ്രം

> **Lead Summary:** **തിരുവനന്തപുരം: [ **രാജ്യത്തെ വിദേശനാണ്യ കരുതൽ ശേഖരം സംരക്ഷിക്കുന്നതിനും രൂപയുടെ മൂല്യം വർദ്ധിപ്പിക്കുന്നതിനുമായി കേന്ദ്ര സർക്കാർ സ്വർണം, വെള്ളി ഇറക്കുമതി തീരുവ ഗണ്യമായി ഉയർത്തിയിരിക്കുന്നു.

## Article Content

**തിരുവനന്തപുരം: [ **രാജ്യത്തെ വിദേശനാണ്യ കരുതൽ ശേഖരം സംരക്ഷിക്കുന്നതിനും രൂപയുടെ മൂല്യം വർദ്ധിപ്പിക്കുന്നതിനുമായി കേന്ദ്ര സർക്കാർ സ്വർണം, വെള്ളി ഇറക്കുമതി തീരുവ ഗണ്യമായി ഉയർത്തിയിരിക്കുന്നു.

നേരത്തെ 6 ശതമാനമായിരുന്ന തീരുവ ഒറ്റയടിക്ക് 15 ശതമാനമായാണ് വർദ്ധിപ്പിച്ചത്. സ്വർണ ഉപഭോഗം കുറയ്ക്കണമെന്ന പ്രധാനമന്ത്രി നരേന്ദ്ര മോദിയുടെ പ്രത്യേക നിർദ്ദേശത്തിന് പിന്നാലെയാണ് ഈ നടപടി.

പുതിയ നിരക്ക് പ്രകാരം 10 ശതമാനം അടിസ്ഥാന കസ്റ്റംസ് ഡ്യൂട്ടിയും 5 ശതമാനം അഗ്രികൾച്ചർ സെസ്സും ഉൾപ്പെടെയാണ് ഈ നികുതി ഈടാക്കുന്നത്. ഇതോടെ വരും ദിവസങ്ങളിൽ സ്വർണവിലയിൽ വലിയ വർദ്ധനവുണ്ടാകാനാണ് സാധ്യത.

വിദേശനാണ്യത്തിന്റെ ഒഴുക്ക് നിയന്ത്രിക്കാൻ പൗരന്മാർ ഒരു വർഷത്തേക്ക് സ്വർണം വാങ്ങുന്നത് ഒഴിവാക്കണമെന്നും പെട്രോൾ, ഡീസൽ ഉപയോഗത്തിൽ സ്വയം നിയന്ത്രണം ഏർപ്പെടുത്തണമെന്നും പ്രധാനമന്ത്രി ആഹ്വാനം ചെയ്തിട്ടുണ്ട്.

അന്താരാഷ്ട്ര തലത്തിൽ പശ്ചിമേഷ്യൻ സംഘർഷം നിലനിൽക്കുന്ന പശ്ചാത്തലത്തിൽ വിദേശ യാത്രകൾ പരിമിതപ്പെടുത്താനും വർക്ക് ഫ്രം ഹോം രീതി പ്രോത്സാഹിപ്പിക്കാനും അദ്ദേഹം നിർദ്ദേശിച്ചു.

സ്വർണ നിക്ഷേപത്തോടുള്ള താല്പര്യം വർദ്ധിച്ചതിനെ തുടർന്ന് കഴിഞ്ഞ പാദത്തിൽ ഇന്ത്യയിലെ ഗോൾഡ് ഇടിഎഫുകളിൽ വൻ വർദ്ധനവ് രേഖപ്പെടുത്തിയിരുന്നു. എന്നാൽ ഇറക്കുമതി തീരുവ വർദ്ധിപ്പിച്ചത് സ്വർണ കള്ളക്കടത്ത് വർദ്ധിപ്പിക്കാൻ ഇടയാക്കുമെന്ന ആശങ്കയും വിപണി വിദഗ്ധർ പങ്കുവെക്കുന്നുണ്ട്.

### Related Links & Sources
- [Original Story Source](https://truevisionnews.com/news/359044/gold-prices-will-soar)