---
title: "ബംഗ്ലാദേശിൽ അഞ്ചാംപനി പടരുന്നു: 250 മരണം; ഇന്ത്യക്കും ലോകാരോഗ്യ സംഘടനയുടെ ജാഗ്രതാ നിർദ്ദേശം"
english_title: "Measles outbreak in Bangladesh"
publisher: "truevisionnews.com"
canonical_url: "https://truevisionnews.com/news/356087/measles-outbreak-in-bangladesh"
published_at: "2026-04-29T09:44:00+05:30"
category: "International"
language: "ml"
image: "https://cf.zdn.im/img/truevisionnews.com/0/image-uploads/69f185ea37da5_3.jpg"
keywords: []
---

# ബംഗ്ലാദേശിൽ അഞ്ചാംപനി പടരുന്നു: 250 മരണം; ഇന്ത്യക്കും ലോകാരോഗ്യ സംഘടനയുടെ ജാഗ്രതാ നിർദ്ദേശം

> **Lead Summary:** **ബംഗ്ലാദേശ്: [ **ബംഗ്ലാദേശിൽ അഞ്ചാംപനി (മീസിൽസ്) പടർന്നുപിടിക്കുന്നത് അയൽരാജ്യങ്ങൾക്കും വലിയ ആശങ്കയാകുന്നു. കുട്ടികളുൾപ്പെടെ 250 പേർ ഇതിനോടകം രോഗം ബാധിച്ച് മരണമടഞ്ഞതായാണ് റിപ്പോർട്ടുകൾ.

## Article Content

**ബംഗ്ലാദേശ്: [ **ബംഗ്ലാദേശിൽ അഞ്ചാംപനി (മീസിൽസ്) പടർന്നുപിടിക്കുന്നത് അയൽരാജ്യങ്ങൾക്കും വലിയ ആശങ്കയാകുന്നു. കുട്ടികളുൾപ്പെടെ 250 പേർ ഇതിനോടകം രോഗം ബാധിച്ച് മരണമടഞ്ഞതായാണ് റിപ്പോർട്ടുകൾ.

രാജ്യത്തെ വാക്സിനേഷൻ പ്രവർത്തനങ്ങളിൽ സംഭവിച്ച ഗുരുതരമായ പാളിച്ചകളാണ് രോഗവ്യാപനം ഇത്രയധികം രൂക്ഷമാകാൻ കാരണമെന്നാണ് വിലയിരുത്തപ്പെടുന്നത്. രാഷ്ട്രീയ അസ്ഥിരതയും ഭരണപരമായ പിഴവുകളും മൂലം കഴിഞ്ഞ വർഷങ്ങളിൽ വാക്സിനേഷൻ നിരക്ക് വലിയതോതിൽ ഇടിഞ്ഞിരുന്നു.

2025-ൽ വാക്സിനേഷൻ എടുത്ത കുട്ടികളുടെ നിരക്ക് 59.6 ശതമാനമായി കുറഞ്ഞതും 2020-ന് ശേഷം വിപുലമായ പ്രതിരോധ യജ്ഞങ്ങൾ നടക്കാത്തതും സാഹചര്യം വഷളാക്കി. രാജ്യത്തെ 64 ജില്ലകളിൽ 58 എണ്ണത്തിലും രോഗം പടർന്നുപിടിച്ചിട്ടുണ്ടെന്ന് ലോകാരോഗ്യ സംഘടന (WHO) മുന്നറിയിപ്പ് നൽകുന്നു.

മാർച്ച് പകുതിയോടെ മരണസംഖ്യ ഉയരാൻ തുടങ്ങിയതായും റിപ്പോർട്ടുകളുണ്ട്. രോഗബാധിതരിൽ ഭൂരിഭാഗവും 14 വയസ്സിൽ താഴെയുള്ള കുട്ടികളാണ്. താരിഖ് റഹ്‌മാന്റെ നേതൃത്വത്തിലുള്ള ബിഎൻപി സർക്കാർ അടിയന്തര വാക്സിനേഷൻ നടപടികൾ ആരംഭിച്ചിട്ടുണ്ടെങ്കിലും വ്യാപനത്തിന്റെ തോത് നിയന്ത്രിക്കുക എന്നത് വലിയ വെല്ലുവിളിയാണ്.

ഇന്ത്യയുമായി അതിർത്തി പങ്കിടുന്ന ജഷോർ, ചപ്പായ് നവാബ്ഗഞ്ച് തുടങ്ങിയ പ്രദേശങ്ങളിൽ രോഗം കൂടുതലായി റിപ്പോർട്ട് ചെയ്യുന്നത് ഇന്ത്യക്കും മ്യാൻമറിനും ഭീഷണിയുയർത്തുന്നുണ്ട്. അന്താരാഷ്ട്ര യാത്രാ കേന്ദ്രങ്ങളായ ധാക്ക, ചട്ടോഗ്രാം എന്നിവിടങ്ങളിൽ നിന്നുള്ള യാത്രക്കാർ വഴി രോഗം മറ്റു രാജ്യങ്ങളിലേക്ക് പടരാൻ സാധ്യതയുണ്ടെന്ന് ലോകാരോഗ്യ സംഘടന ചൂണ്ടിക്കാട്ടുന്നു.

എങ്കിലും ബംഗ്ലാദേശിലെ ഈ സാഹചര്യം ഇന്ത്യയിൽ ഒരു വലിയ പകർച്ചവ്യാധിക്ക് കാരണമാകാൻ സാധ്യത കുറവാണെന്നാണ് വിദഗ്ധരുടെ വിലയിരുത്തൽ. ഇന്ത്യയിലെ വാക്സിനേഷൻ പ്രതിരോധം വളരെ ശക്തമാണ്.

2024-25 കാലയളവിലെ കണക്കുകൾ പ്രകാരം 90 ശതമാനത്തിലധികം കുട്ടികളും കൃത്യമായി വാക്സിൻ സ്വീകരിച്ചിട്ടുണ്ട്. 2026 അവസാനത്തോടെ രാജ്യത്തുനിന്ന് അഞ്ചാംപനിയും റുബെല്ലയും പൂർണ്ണമായും തുടച്ചുനീക്കുക എന്ന ലക്ഷ്യത്തോടെയുള്ള ശക്തമായ പ്രവർത്തനങ്ങളാണ് ഇന്ത്യയിൽ നടക്കുന്നത്.

### Related Links & Sources
- [Original Story Source](https://truevisionnews.com/news/356087/measles-outbreak-in-bangladesh)