---
title: "ഫുൾ എ പ്ലസ് മോഹം ഇനി കടമ്പ കടക്കണം! എസ്എസ്എൽസി മൂല്യനിർണയം കടുപ്പിക്കാൻ വിദ്യാഭ്യാസ വകുപ്പ്"
english_title: "Education Department to tighten SSLC evaluation"
publisher: "truevisionnews.com"
canonical_url: "https://truevisionnews.com/news/354137/education-department-to-tighten-sslc-evaluation"
published_at: "2026-04-19T09:14:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/69e44fced5034_xm.jpg"
keywords: []
---

# ഫുൾ എ പ്ലസ് മോഹം ഇനി കടമ്പ കടക്കണം! എസ്എസ്എൽസി മൂല്യനിർണയം കടുപ്പിക്കാൻ വിദ്യാഭ്യാസ വകുപ്പ്

> **Lead Summary:** **കാസര്‍കോട്: **സംസ്ഥാനത്ത് എസ്എസ്എൽസി പരീക്ഷയിൽ എല്ലാ വിഷയങ്ങൾക്കും എ പ്ലസ് നേടുന്നവരുടെ എണ്ണം കുറയ്ക്കാൻ ലക്ഷ്യമിട്ട് വിദ്യാഭ്യാസ വകുപ്പ് പുതിയ നീക്കങ്ങൾ ആരംഭിച്ചു. പരീക്ഷാ ചോദ്യങ്ങൾ കടുപ്പിച്ചതിന് പിന്നാലെ, ഉത്തരക്കടലാസ് മൂല്യനിർണയത്തിലും കർശനമായ മാനദണ്ഡങ്ങൾ പാലിക്കാനാണ് വകുപ്പിന്റെ പുതിയ നിർദേശം.

## Article Content

**കാസര്‍കോട്: **സംസ്ഥാനത്ത് എസ്എസ്എൽസി പരീക്ഷയിൽ എല്ലാ വിഷയങ്ങൾക്കും എ പ്ലസ് നേടുന്നവരുടെ എണ്ണം കുറയ്ക്കാൻ ലക്ഷ്യമിട്ട് വിദ്യാഭ്യാസ വകുപ്പ് പുതിയ നീക്കങ്ങൾ ആരംഭിച്ചു. പരീക്ഷാ ചോദ്യങ്ങൾ കടുപ്പിച്ചതിന് പിന്നാലെ, ഉത്തരക്കടലാസ് മൂല്യനിർണയത്തിലും കർശനമായ മാനദണ്ഡങ്ങൾ പാലിക്കാനാണ് വകുപ്പിന്റെ പുതിയ നിർദേശം.

ചോദ്യപേപ്പർ ഘടനയിൽ മാറ്റം വരുത്തിയും 20 ശതമാനം ചോദ്യങ്ങൾ സങ്കീർണമാക്കിയും ഫുൾ എ പ്ലസ് കുറക്കാൻ നേരത്തെയും വകുപ്പ് നടപടി എടുത്തിരുന്നു.ഇതിന് പിന്നാലെയാണ് മൂല്യനിർണയവും കടുപ്പിച്ചത്.

കഴിഞ്ഞ വ്യാഴാഴ്ചയാണ് എസ്എസ്എൽസി മൂല്യനിർണയം ആരംഭിച്ചത്. മൂല്യനിർണയം കടുപ്പിക്കണമെന്ന നിർദേശം അന്ന് വിദ്യാഭ്യാസ വകുപ്പ് നൽകുകയും ചെയ്തിട്ടുണ്ട്. മുഴുവൻ വിഷയത്തിൽ എ പ്ലസ് കിട്ടുന്ന വിദ്യാർഥികളുടെ എണ്ണം കൂടുന്നത് പലപ്പോഴും സർക്കാറിന് തലവേദനയാകാറുണ്ട്. മുൻ വർഷങ്ങളില്‍ മുഴുവൻ എ പ്ലസ് ലഭിച്ചിട്ടും പ്ലസ് ടുവിന് ആഗ്രഹിച്ച കോഴ്‌സിന് സീറ്റ് ലഭിക്കാത്തവരുടെ എണ്ണവും നിരവധിയായിരുന്നു. ഈ ഒരു സാഹചര്യത്തിലാണ് എ പ്ലസ് കുറക്കാനുള്ള തീരുമാനം വിദ്യാഭ്യാസ വകുപ്പ് എടുത്തതെന്നാണ് പുറത്ത് വരുന്ന വിവരം.

ഈ വർഷത്തെ പത്താം ക്ലാസ് പരീക്ഷയിൽ ചോദ്യപേപ്പറിലും അടിമുടി മാറ്റങ്ങളുണ്ടായിരുന്നു. അവസാനത്തെ 20 ശതമാനം ചോദ്യങ്ങളും സങ്കീർണമാക്കിയിരുന്നു. ഇതിനെതിരെ അധ്യാപകര്‍ പോലും രംഗത്തെത്തിയിരുന്നു. ഇതിന് പിന്നാലെയാണ് മൂല്യനിർണയവും കടുപ്പിക്കാൻ തീരുമാനിച്ചിരിക്കുന്നത്. അപൂർണമായ ഉത്തരങ്ങൾക്ക് അരമാർക്ക് നേരത്തെ നൽകിയിരുന്നു. എന്നാൽ ഇനി അതുപോലും നൽകേണ്ടെന്നാണ് നിർദേശം. പൂർണമായ ഉത്തരം എഴുതിയാൽ മാത്രം മുഴുവൻ മാർക്കും നൽകിയാൽ മതിയെന്നാണ് പുതിയ തീരുമാനം.

### Related Links & Sources
- [Original Story Source](https://truevisionnews.com/news/354137/education-department-to-tighten-sslc-evaluation)