---
title: "കോൺ​ഗ്രസ് സ്ഥാനാ‌ർ‌ത്ഥിയെ കാണാനില്ലെന്ന് പരാതി, പ്രസിഡന്റ് ലോക്കപ്പിൽ,'സ്വയം ഒളിവിൽ പോയതെന്ന്' സ്ഥാനാർത്ഥി!"
english_title: "Congress candidate missing, candidate says he 'self-exiled' in presidential lockup!"
publisher: "truevisionnews.com"
canonical_url: "https://truevisionnews.com/news/353589/congress-candidate-missing-candidate-says-he-self-exiled-in-presidential-lockup"
published_at: "2026-04-16T11:55:00+05:30"
category: "National"
language: "ml"
image: "https://cf.zdn.im/img/truevisionnews.com/0/image-uploads/69e081699950e_ewrfd.jpg"
keywords: []
---

# കോൺ​ഗ്രസ് സ്ഥാനാ‌ർ‌ത്ഥിയെ കാണാനില്ലെന്ന് പരാതി, പ്രസിഡന്റ് ലോക്കപ്പിൽ,'സ്വയം ഒളിവിൽ പോയതെന്ന്' സ്ഥാനാർത്ഥി!

> **Lead Summary:** അഹമ്മദാബാദ്: **[**ഭാവ്‌നഗർ മുൻസിപ്പൽ കോർപ്പറേഷൻ തെരഞ്ഞെടുപ്പിലെ കോൺഗ്രസ് സ്ഥാനാർത്ഥിയെ തട്ടിക്കൊണ്ടുപോയെന്ന ആരോപണവും അതിന് പിന്നാലെ നടന്ന നാടകീയ സംഭവങ്ങളും ഗുജറാത്തിൽ വലിയ രാഷ്ട്രീയ വിവാദത്തിന് തിരിതെളിയിച്ചു .

## Article Content

അഹമ്മദാബാദ്: **[**ഭാവ്‌നഗർ മുൻസിപ്പൽ കോർപ്പറേഷൻ തെരഞ്ഞെടുപ്പിലെ കോൺഗ്രസ് സ്ഥാനാർത്ഥിയെ തട്ടിക്കൊണ്ടുപോയെന്ന ആരോപണവും അതിന് പിന്നാലെ നടന്ന നാടകീയ സംഭവങ്ങളും ഗുജറാത്തിൽ വലിയ രാഷ്ട്രീയ വിവാദത്തിന് തിരിതെളിയിച്ചു .

സ്വന്തം പാർട്ടിയുടെ സ്ഥാനാർത്ഥിയെ തട്ടിക്കൊണ്ടുപോയി എന്നാരോപിച്ച് ഭാവ്‌നഗർ സിറ്റി കോൺഗ്രസ് അധ്യക്ഷൻ മനോഹർസിങ് ഗോഹിലിനെ പൊലീസ് കസ്റ്റഡിയിലെടുത്തതാണ് സംഭവങ്ങളുടെ തുടക്കം. എന്നാൽ താൻ ആരും തട്ടിക്കൊണ്ടുപോയതല്ലെന്നും ജനാധിപത്യം സംരക്ഷിക്കാൻ സ്വയം ഒളിവിൽ പോയതാണെന്നും വെളിപ്പെടുത്തി സ്ഥാനാർത്ഥി ഭരത് രമേഷ് കാംബാദ് തന്നെ രംഗത്തെത്തിയതോടെ പൊലീസ് നടപടി പ്രതിസന്ധിയിലായി .

തട്ടിക്കൊണ്ടുപോകൽ ആരോപണത്തിൽ കുടുങ്ങിയ കോൺഗ്രസ് അധ്യക്ഷനെ ഒടുവിൽ പോലീസ് വിട്ടയച്ചു. സ്ഥാനാർത്ഥി നേരിട്ട് വിശദീകരണവുമായി രംഗത്തെത്തിയതോടെയാണ് കേസിൽ വഴിത്തിരിവുണ്ടായത് ഭരത് കാംബാദിനെ കാണാനില്ലെന്ന് സഹോദരൻ നൽകിയ പരാതിയിലാണ് പോലീസ് കേസെടുത്തത്. ഇതിന്റെ അടിസ്ഥാനത്തിൽ കോൺഗ്രസ് അധ്യക്ഷൻ മനോഹർസിങ് ഗോഹിലിനെ ചോദ്യം ചെയ്യാൻ സ്റ്റേഷനിലെത്തിച്ചു.

പത്രിക പിൻവലിക്കാൻ സമ്മർദ്ദമുണ്ടാകുമെന്ന് ഭയന്നാണ് താൻ ഭാവ്‌നഗറിൽ നിന്ന് മാറിനിന്നതെന്ന് ഭരത് കാംബാദ് വെളിപ്പെടുത്തി. അയൽ ജില്ലയായ അമ്രേലിയിലായിരുന്നു അദ്ദേഹം ഉണ്ടായിരുന്നത്. താൻ സ്വന്തം ഇഷ്ടപ്രകാരമാണ് മാറിയതെന്ന് വ്യക്തമാക്കി അദ്ദേഹം സത്യവാങ്മൂലവും വീഡിയോയും പുറത്തുവിട്ടു. സ്ഥാനാർത്ഥിയുടെ വെളിപ്പെടുത്തലോടെ തട്ടിക്കൊണ്ടുപോകൽ കേസ് നിലനിൽക്കില്ലെന്ന് കണ്ട പോലീസ് കോൺഗ്രസ് അധ്യക്ഷനെ വിട്ടയച്ചു.

സംഭവത്തിൽ ബിജെപിക്കെതിരെ കടുത്ത വിമർശനവുമായി കോൺഗ്രസ് എംപി ശക്തിസിങ് ഗോഹിൽ രംഗത്തെത്തി. കോൺഗ്രസ് സ്ഥാനാർത്ഥികളെ പത്രിക പിൻവലിക്കാൻ പ്രേരിപ്പിക്കുന്നതിനായി ബിജെപി തരംതാണ രാഷ്ട്രീയം കളിക്കുകയാണെന്ന് അദ്ദേഹം ആരോപിച്ചു. അധികാര ദുർവിനിയോഗത്തിന്റെ അങ്ങേയറ്റമാണിതെന്നും സ്ഥാനാർത്ഥിയുടെ സഹോദരനെ തെറ്റിദ്ധരിപ്പിച്ച് പരാതി നൽകുകയായിരുന്നുവെന്നും അദ്ദേഹം കൂട്ടിച്ചേർത്തു.

ഇതേസമയം, കച്ച് ജില്ലയിലെ രാപ്പർ താലൂക്ക് പഞ്ചായത്ത് സ്ഥാനാർത്ഥിയായ രാജേഷ് കേശവ് ഭിലിനെ തട്ടിക്കൊണ്ടുപോയതായി മറ്റൊരു പരാതി കൂടി ലഭിച്ചിട്ടുണ്ട്. പട്ടികവർഗ്ഗ വിഭാഗത്തിൽപ്പെട്ട ഈ സ്ഥാനാർത്ഥിക്കായുള്ള തെരച്ചിൽ പൊലീസ് ഊർജ്ജിതമാക്കിയിരിക്കുകയാണ്. സ്ഥാനാർത്ഥികളെ കാണാതാകുന്നത് തുടരുന്ന സാഹചര്യത്തിൽ വരും ദിവസങ്ങളിൽ ഗുജറാത്തിൽ രാഷ്ട്രീയ പോരാട്ടം കടുക്കുമെന്നുറപ്പാണ്.

### Related Links & Sources
- [Original Story Source](https://truevisionnews.com/news/353589/congress-candidate-missing-candidate-says-he-self-exiled-in-presidential-lockup)