---
title: "മരണത്തിന് തൊട്ടുമുമ്പ് കാറിടിപ്പിക്കാൻ ശ്രമം; ദാമ്പത്യത്തിലെ കൊടുംക്രൂരതയ്ക്ക് എട്ട് വർഷം തടവ് ശിക്ഷ വിധിച്ചു ഗ്ലാസ്ഗോ ഹൈക്കോടതി"
english_title: "Glasgow High Court sentences man to eight years in prison for marital cruelty"
publisher: "truevisionnews.com"
canonical_url: "https://truevisionnews.com/news/352781/glasgow-high-court-sentences-man-to-eight-years-in-prison-for-marital-cruelty"
published_at: "2026-04-11T10:15:00+05:30"
category: "International"
language: "ml"
image: "https://cf.zdn.im/img/truevisionnews.com/0/image-uploads/69d9d2251a01e_Glasgow_High_Court_sentences_man_to_eight_years_in_prison_for_marital_cruelty.jpg"
keywords: []
---

# മരണത്തിന് തൊട്ടുമുമ്പ് കാറിടിപ്പിക്കാൻ ശ്രമം; ദാമ്പത്യത്തിലെ കൊടുംക്രൂരതയ്ക്ക് എട്ട് വർഷം തടവ് ശിക്ഷ വിധിച്ചു ഗ്ലാസ്ഗോ ഹൈക്കോടതി

> **Lead Summary:** എഡിൻബർഗ്: സ്കോട്ട്‌ലൻഡിൽ ഭാര്യയുടെ ആത്മഹത്യയ്ക്ക് കാരണക്കാരനായ ഭർത്താവിന് എട്ട് വർഷം തടവ് ശിക്ഷ വിധിച്ചു. 2023 ജൂലൈയിൽ 28കാരിയായ കിംബർലി മിൽനെ ജീവനൊടുക്കിയ സംഭവത്തിലാണ് 40കാരനായ ഭർത്താവ് ലീ മിൽനെയെ ഗ്ലാസ്ഗോ ഹൈക്കോടതി ശിക്ഷിച്ചത്.

## Article Content

എഡിൻബർഗ്: സ്കോട്ട്‌ലൻഡിൽ ഭാര്യയുടെ ആത്മഹത്യയ്ക്ക് കാരണക്കാരനായ ഭർത്താവിന് എട്ട് വർഷം തടവ് ശിക്ഷ വിധിച്ചു. 2023 ജൂലൈയിൽ 28കാരിയായ കിംബർലി മിൽനെ ജീവനൊടുക്കിയ സംഭവത്തിലാണ് 40കാരനായ ഭർത്താവ് ലീ മിൽനെയെ ഗ്ലാസ്ഗോ ഹൈക്കോടതി ശിക്ഷിച്ചത്.

തുടർച്ചയായ ശാരീരികവും മാനസികവുമായ പീഡനങ്ങളിലൂടെ ഭാര്യയെ ആത്മഹത്യയിലേക്ക് തള്ളിവിട്ടു എന്ന കുറ്റത്തിനാണ് ഇയാൾക്കെതിരെ നടപടിയെടുത്തത്. ഒരാളുടെ ആത്മഹത്യയിൽ പങ്കാളിയെ കുറ്റക്കാരനായി കണ്ടെത്തി ശിക്ഷിക്കുന്ന സ്കോട്ട്‌ലൻഡിലെ ആദ്യത്തെ ചരിത്രപ്രധാനമായ വിധിയാണിത്. ഭാര്യയോട് ലീ മിൽനെ കാട്ടിയ ക്രൂരതകൾ കോടതി കൃത്യമായി വിലയിരുത്തിയാണ് ഈ വിധി പുറപ്പെടുവിച്ചത്.

18 മാസത്തെ ഇവരുടെ ദാമ്പത്യജീവിതത്തിൽ ലീ മിൽനെ ക്രൂരമായ പീഡനങ്ങളാണ് ഭാര്യയ്ക്ക് നൽകിയിരുന്നതെന്ന് പ്രോസിക്യൂട്ടർമാർ കോടതിയിൽ തെളിയിച്ചിരുന്നു. കഴുത്തിന് പിടിച്ചു ഞെരിക്കുക, മർദ്ദിച്ച് ബോധം കെടുത്തുക, ഭക്ഷണവും പണവും നൽകാതെ പൂട്ടിയിടുക തുടങ്ങിയ ശാരീരിക ഉപദ്രവങ്ങൾക്കൊപ്പം അവരെ മാനസികമായി തകർക്കുകയും ബന്ധുക്കളിൽ നിന്ന് അകറ്റുകയും ചെയ്തിരുന്നു. താൻ ഇല്ലെങ്കിൽ അയാൾ ആത്മഹത്യ ചെയ്യുമെന്ന് ഭീഷണിപ്പെടുത്തിയിരുന്നതിനാൽ അവൾക്ക് അയാളെ ഉപേക്ഷിച്ചു പോകാനും കഴിഞ്ഞിരുന്നില്ല.

യുവതി ആത്മഹത്യ ചെയ്ത ദിവസം ഇയാൾ അവരെ കാറിടിപ്പിക്കാൻ ശ്രമിക്കുന്ന ദൃശ്യങ്ങൾ സിസിടിവിയിൽ ലഭിച്ചിരുന്നു. പാർക്കിംഗ് സ്ഥലത്ത് വെച്ച് കാർ വേഗത്തിൽ യുവതിയുടെ നേരെ ഓടിച്ചടുപ്പിക്കുകയും അവസാന നിമിഷം വെട്ടിച്ചുമാറ്റുകയും ചെയ്ത് അവരെ ഭയപ്പെടുത്തിയിരുന്നു. ഇതിന് തൊട്ടുപിന്നാലെയാണ് കിംബർലി അടുത്തുള്ള പാലത്തിൽ നിന്ന് ചാടി ആത്മഹത്യ ചെയ്തത്. ശാരീരിക പീഡനങ്ങൾ മാത്രമല്ല ഒരാളെ മാനസികമായി തകർക്കുന്ന അധികാരപ്രയോഗങ്ങളും ആത്മഹത്യയ്ക്ക് കാരണമാകാമെന്നും അതിനാൽ തന്നെ ഇയാൾ ഭാര്യയുടെ മരണത്തിന് ഉത്തരവാദിയാണെന്നും കോടതി നിരീക്ഷിച്ചു.

### Related Links & Sources
- [Original Story Source](https://truevisionnews.com/news/352781/glasgow-high-court-sentences-man-to-eight-years-in-prison-for-marital-cruelty)