---
title: "വിവാഹത്തിന് ഒരുങ്ങാൻ സ്പായിൽ പോയി; കണ്ണൂർ കൂത്തുപറമ്പിൽ തിളച്ച വെള്ളം മുഖത്ത് വീണ് വരന് പൊള്ളലേറ്റതായി പരാതി, ഗുരുതര അനാസ്ഥ"
english_title: " complaint was filed that a groom was burned after boiling water fell on his face in a salon in Koothuparamba "
publisher: "truevisionnews.com"
canonical_url: "https://truevisionnews.com/news/352681/complaint-was-filed-that-a-groom-was-burned-after-boiling-water-fell-on-his-face-in-a-salon-in-koothuparamba"
published_at: "2026-04-10T15:57:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/69d8d09d7dfc1_complaint.jpg"
keywords: []
---

# വിവാഹത്തിന് ഒരുങ്ങാൻ സ്പായിൽ പോയി; കണ്ണൂർ കൂത്തുപറമ്പിൽ തിളച്ച വെള്ളം മുഖത്ത് വീണ് വരന് പൊള്ളലേറ്റതായി പരാതി, ഗുരുതര അനാസ്ഥ

> **Lead Summary:** **കണ്ണൂർ : ( **[www.truevisionnews.com]** )** സലൂണിലെ അനാസ്ഥ കാരണം യുവാവിന്റെ മുഖത്ത് പൊള്ളലേറ്റതായി പരാതി. കൂത്തുപറമ്പിലെ ബോധീസ് സ്പാ ആൻഡ് സലൂണിൽ നിന്നാണ് കൂത്തുപറമ്പ് സ്വദേശിയായ ഷിബിൽ മുസ്തഫക്ക് പൊള്ളലേറ്റത്. 2026 ഏപ്രിൽ 2-ന് ആയിരുന്നു സംഭവം.

## Article Content

**കണ്ണൂർ : ( **[www.truevisionnews.com]** )** സലൂണിലെ അനാസ്ഥ കാരണം യുവാവിന്റെ മുഖത്ത് പൊള്ളലേറ്റതായി പരാതി. കൂത്തുപറമ്പിലെ ബോധീസ് സ്പാ ആൻഡ് സലൂണിൽ നിന്നാണ് കൂത്തുപറമ്പ് സ്വദേശിയായ ഷിബിൽ മുസ്തഫക്ക് പൊള്ളലേറ്റത്. 2026 ഏപ്രിൽ 2-ന് ആയിരുന്നു സംഭവം.

വിവാഹത്തിന് രണ്ട് ദിവസം മുമ്പ് സൗന്ദര്യപരിചരണത്തിനായി സലൂണിൽ പോയപ്പോഴാണ് സംഭവം ഉണ്ടായത്. സേവനത്തിനിടെ സ്റ്റീം മെഷീൻ തെറ്റായി കൈകാര്യം ചെയ്തതിനെ തുടർന്ന് തിളച്ച വെള്ളം മുഖത്ത് വീണ് ഗുരുതരമായ പൊള്ളലേക്കുകയായിരുന്നു. സ്ഥാപനത്തിലെ സ്റ്റാഫായ ദിപിൻ തനിക്കു വെറും അഞ്ച് മാസത്തെ പരിചയമാത്രമാണെന്നും ആവശ്യമായ പരിശീലനം ലഭിച്ചിട്ടില്ലെന്നും സമ്മതിച്ചതായും പരാതിയിൽ ചൂണ്ടിക്കാട്ടുന്നു.

ഇത് യോഗ്യതയില്ലാത്ത ജീവനക്കാരെ ഉപയോഗിക്കുന്നതിന്റെ വ്യക്തമായ ഉദാഹരണമാണെന്ന് ആരോപണം ഉയരുന്നു. സംഭവത്തിന് പിന്നാലെ സലൂൺ സ്റ്റാഫിന്റെ പെരുമാറ്റവും മോശമായി. ആദ്യ ശുശ്രൂഷ നൽകുന്നതിനുപകരം, വേദന കുറയ്ക്കാൻ ഐസ് ആവശ്യപ്പെട്ടപ്പോൾ സ്റ്റാഫ് ചിരിച്ച് പ്രതികരിച്ചതായി പരാതിയിൽ പറയുന്നു.

കൂടാതെ സലൂൺ ഉടമസ്ഥർ പ്രശ്നത്തിൽ ഇടപെടുകയോ ഉത്തരവാദിത്തം ഏറ്റെടുക്കുകയോ ചെയ്തിട്ടില്ലെന്നും ആരോപിക്കുന്നു. സംഭവത്തെ തുടർന്ന് യുവാവ് ശാരീരികമായും മാനസികമായും വലിയ ബുദ്ധിമുട്ടുകൾ അനുഭവിക്കേണ്ടി വന്നതായി അറിയുന്നു. വിവാഹവുമായി ബന്ധപ്പെട്ട ചടങ്ങുകളിൽ മുഖമാസ്‌ക് ധരിക്കേണ്ടി വന്നതും, സലൂൺ നിർദേശിച്ച ക്രീമുകൾ ഉപയോഗിച്ചതിലൂടെ അണുബാധകൾ ഉണ്ടായെന്നതുമാണ് റിപ്പോർട്ട്.

ഇപ്പോൾ മുഖത്തും കണ്ണുകളിലും ഉണ്ടായ പരിക്കുകൾക്ക് ചികിത്സയിൽ തുടരുകയാണ്. വായ്ക്ക് സമീപമുള്ള പരിക്ക് കാരണം സാധാരണ രീതിയിൽ ഭക്ഷണം കഴിക്കാനും യുവാവിന് ബുദ്ധിമുട്ട് നേരിടുന്നുണ്ട്. സംഭവവുമായി ബന്ധപ്പെട്ട ഫോട്ടോകളും തെളിവുകളും അധികൃതർക്കു സമർപ്പിച്ചിട്ടുണ്ടെന്നും, സലൂണിനെതിരെ കർശന നടപടി സ്വീകരിക്കണമെന്നും ആവശ്യപ്പെട്ടിട്ടുണ്ട്. ഭാവിയിൽ ഇത്തരം അനാസ്ഥകൾ ആവർത്തിക്കാതിരിക്കാനുള്ള നടപടികൾ സ്വീകരിക്കണമെന്നും പരാതിയിൽ പറയുന്നു.

### Related Links & Sources
- [Original Story Source](https://truevisionnews.com/news/352681/complaint-was-filed-that-a-groom-was-burned-after-boiling-water-fell-on-his-face-in-a-salon-in-koothuparamba)