---
title: "പാകിസ്താൻ പ്രകോപനം തുടരുന്നു: കൊൽക്കത്ത വരെ ആക്രമിക്കുമെന്ന് പാക് പ്രതിരോധ മന്ത്രി; കനത്ത തിരിച്ചടി നേരിടേണ്ടി വരുമെന്ന് രാജ്നാഥ് സിങ്"
english_title: "Pakistan Defense Minister says it will attack even Kolkata"
publisher: "truevisionnews.com"
canonical_url: "https://truevisionnews.com/news/351638/pakistan-defense-minister-says-it-will-attack-even-kolkata"
published_at: "2026-04-05T09:49:00+05:30"
category: "National"
language: "ml"
image: "https://cf.zdn.im/img/truevisionnews.com/0/image-uploads/69d1e3447ac2e_6.jpg"
keywords: []
---

# പാകിസ്താൻ പ്രകോപനം തുടരുന്നു: കൊൽക്കത്ത വരെ ആക്രമിക്കുമെന്ന് പാക് പ്രതിരോധ മന്ത്രി; കനത്ത തിരിച്ചടി നേരിടേണ്ടി വരുമെന്ന് രാജ്നാഥ് സിങ്

> **Lead Summary:** **കറാച്ചി:[ **ഭാവിയിൽ ഇന്ത്യയുടെ ഭാഗത്തുനിന്നുള്ള ഏതൊരു നീക്കത്തിനും അതിർത്തിയിൽ ഒതുങ്ങാത്ത ശക്തമായ തിരിച്ചടി നൽകുമെന്ന് പാകിസ്താൻ പ്രതിരോധ മന്ത്രി ഖവാജ ആസിഫ് ഭീഷണി മുഴക്കി.

## Article Content

**കറാച്ചി:[ **ഭാവിയിൽ ഇന്ത്യയുടെ ഭാഗത്തുനിന്നുള്ള ഏതൊരു നീക്കത്തിനും അതിർത്തിയിൽ ഒതുങ്ങാത്ത ശക്തമായ തിരിച്ചടി നൽകുമെന്ന് പാകിസ്താൻ പ്രതിരോധ മന്ത്രി ഖവാജ ആസിഫ് ഭീഷണി മുഴക്കി.

സിയാൽകോട്ടിൽ മാധ്യമപ്രവർത്തകരോട് സംസാരിക്കവെ, കൊൽക്കത്ത ഉൾപ്പെടെയുള്ള ദൂരെയുള്ള ഇന്ത്യൻ നഗരങ്ങളിൽ വരെ കടന്നുകയറി പ്രഹരമേൽപ്പിക്കുമെന്നാണ് അദ്ദേഹം മുന്നറിയിപ്പ് നൽകിയത്.

ഇന്ത്യ ഒരു വ്യാജ ഓപ്പറേഷന് (False Flag Operation) പദ്ധതിയിടുന്നതായി സൂചനയുണ്ടെന്ന് ആരോപിച്ച പാക് മന്ത്രി, ഇതിനായി തടവിലുള്ള പാക് പൗരന്മാരെയോ സ്വന്തം ആളുകളെയോ ഉപയോഗിച്ച് മൃതദേഹങ്ങൾ സൃഷ്ടിക്കാൻ ഇന്ത്യ ശ്രമിച്ചേക്കുമെന്നും കുറ്റപ്പെടുത്തി.

എന്നാൽ ഈ ആരോപണങ്ങൾ ശരിവെക്കുന്ന തെളിവുകളൊന്നും അദ്ദേഹം ഹാജരാക്കിയില്ല. യുദ്ധമുണ്ടായാൽ അത് നിശ്ചിത ചുറ്റളവിൽ പരിമിതപ്പെടുത്തില്ലെന്നും ഇന്ത്യൻ മണ്ണിൽ കയറി വീടുകൾക്കുള്ളിൽ വരെ ആക്രമണം നടത്തുമെന്നും ഖവാജ ആസിഫ് കൂട്ടിച്ചേർത്തു.

പാകിസ്താന്റെ പ്രകോപനപരമായ ഈ ഭീഷണികൾക്ക് 'ഓപ്പറേഷൻ സിന്ദൂർ' ഓർമിപ്പിച്ചുകൊണ്ട് അതിശക്തമായ ഭാഷയിലാണ് ഇന്ത്യ മറുപടി നൽകിയത്. പാകിസ്താന്റെ ഭാഗത്തുനിന്ന് ഏതെങ്കിലും തരത്തിലുള്ള നീക്കമുണ്ടായാൽ നിർണായകമായ തിരിച്ചടി നേരിടേണ്ടി വരുമെന്ന് ഇന്ത്യൻ പ്രതിരോധ മന്ത്രി രാജ്നാഥ് സിങ് മുന്നറിയിപ്പ് നൽകി.

2025 ഏപ്രിലിൽ പഹൽഗാമിലുണ്ടായ ഭീകരാക്രമണത്തിന് പിന്നാലെ ഇന്ത്യ നടത്തിയ പ്രത്യാക്രമണം ഒരു തുടക്കം മാത്രമാണെന്നും അത് അവസാനിച്ചിട്ടില്ലെന്നും അദ്ദേഹം വ്യക്തമാക്കി. അതിർത്തി കടന്നുള്ള ഭീഷണികളെ വകവെക്കില്ലെന്നും രാജ്യത്തിന്റെ സുരക്ഷ ഉറപ്പാക്കാൻ ഇന്ത്യ സജ്ജമാണെന്നും അദ്ദേഹം കൂട്ടിച്ചേർത്തു.

### Related Links & Sources
- [Original Story Source](https://truevisionnews.com/news/351638/pakistan-defense-minister-says-it-will-attack-even-kolkata)