---
title: "മുജ്തബ ഖമേനി എവിടെ? അഭ്യൂഹങ്ങൾക്കിടെ നിർണായക വെളിപ്പെടുത്തലുമായി റഷ്യ"
english_title: "Russia makes crucial revelation amid rumors"
publisher: "truevisionnews.com"
canonical_url: "https://truevisionnews.com/news/350909/russia-makes-crucial-revelation-amid-rumors"
published_at: "2026-04-01T11:35:00+05:30"
category: "International"
language: "ml"
image: "https://cf.zdn.im/img/truevisionnews.com/0/image-uploads/69ccb5d64c221_5.jpg"
keywords: []
---

# മുജ്തബ ഖമേനി എവിടെ? അഭ്യൂഹങ്ങൾക്കിടെ നിർണായക വെളിപ്പെടുത്തലുമായി റഷ്യ

> **Lead Summary:** **ടെഹ്റാൻ: [ **പശ്ചിമേഷ്യൻ യുദ്ധം രണ്ടാം മാസത്തിലേക്ക് കടക്കുമ്പോഴും ഇറാന്റെ പുതിയ പരമോന്നത നേതാവ് മുജ്തബ ഖമേനിയുടെ അസാന്നിധ്യം ആഗോളതലത്തിൽ വലിയ ചർച്ചകൾക്കും നിഗൂഢതകൾക്കും വഴിതുറക്കുകയാണ്.

## Article Content

**ടെഹ്റാൻ: [ **പശ്ചിമേഷ്യൻ യുദ്ധം രണ്ടാം മാസത്തിലേക്ക് കടക്കുമ്പോഴും ഇറാന്റെ പുതിയ പരമോന്നത നേതാവ് മുജ്തബ ഖമേനിയുടെ അസാന്നിധ്യം ആഗോളതലത്തിൽ വലിയ ചർച്ചകൾക്കും നിഗൂഢതകൾക്കും വഴിതുറക്കുകയാണ്.

മുൻ നേതാവ് അയത്തുള്ള അലി ഖമേനിയുടെ വിയോഗത്തിന് ശേഷം പിൻഗാമിയായി പ്രഖ്യാപിക്കപ്പെട്ട മുജ്തബ ഇതുവരെ പൊതുവേദികളിൽ പ്രത്യക്ഷപ്പെടാത്തതാണ് സംശയങ്ങൾക്ക് ആക്കം കൂട്ടുന്നത്. യുഎസ്-ഇസ്രയേൽ സഖ്യത്തിന്റെ ആക്രമണത്തിൽ അദ്ദേഹത്തിന് പരിക്കേറ്റതായും മറ്റും യുഎസ് പ്രസിഡന്റ് ഡൊണാൾഡ് ട്രംപ് ഉൾപ്പെടെയുള്ളവർ സംശയം പ്രകടിപ്പിച്ചിരുന്നു.

എന്നാൽ ഈ സാഹചര്യത്തിലാണ് മുജ്തബ ഇറാനിൽ തന്നെയുണ്ടെന്ന നിർണായക വിവരവുമായി റഷ്യൻ അംബാസഡർ അലക്‌സി ദെദോവ് രംഗത്തെത്തിയത്. മുജ്തബ ഖമേനി സുരക്ഷിതനായി ഇറാനിലുണ്ടെന്നും സുരക്ഷാ കാരണങ്ങളാലാണ് അദ്ദേഹം തൽക്കാലം പൊതുവേദികളിൽ നിന്ന് മാറിനിൽക്കുന്നതെന്നും റഷ്യൻ മാധ്യമമായ RTVI-ക്ക് നൽകിയ അഭിമുഖത്തിൽ ദെദോവ് വ്യക്തമാക്കി.

അദ്ദേഹം ചികിത്സയ്ക്കായി വിദേശത്ത് പോയിട്ടില്ലെന്നും രാജ്യത്ത് തന്നെ തുടരുന്നുണ്ടെന്നുമാണ് ഇറാനിയൻ നേതൃത്വം നൽകുന്ന വിശദീകരണം. മാർച്ച് മാസത്തിൽ അദ്ദേഹത്തിന്റേതായി ചില ഔദ്യോഗിക സന്ദേശങ്ങൾ പുറത്തുവന്നെങ്കിലും ദൃശ്യങ്ങൾ ലഭ്യമല്ലാത്തത് സാമൂഹ്യമാധ്യമങ്ങളിൽ വലിയ പരിഹാസങ്ങൾക്കും എഐ (AI) നിർമ്മിത വീഡിയോകളുടെ പ്രചാരണത്തിനും കാരണമായിട്ടുണ്ട്.

അതേസമയം, മുജ്തബയുടെ അദൃശ്യ സാന്നിധ്യം ഇറാന്റെ ഭരണനേതൃത്വത്തിലുള്ള അദ്ദേഹത്തിന്റെ സ്വാധീനത്തെക്കുറിച്ച് പാശ്ചാത്യ രാജ്യങ്ങൾക്കിടയിൽ ചോദ്യങ്ങൾ ഉയർത്തുന്നുണ്ട്. മുജ്തബ ജീവിച്ചിരിപ്പുണ്ടെങ്കിൽ പോലും രാജ്യത്തിന്റെ യഥാർത്ഥ നിയന്ത്രണം ഇപ്പോൾ ഇസ്ലാമിക് റെവല്യൂഷണറി ഗാർഡ് കോർപ്‌സിന്റെ (IRGC) കൈകളിലാണെന്നാണ് ഇസ്രയേൽ, യുഎസ് ഉദ്യോഗസ്ഥരുടെ വിലയിരുത്തൽ.

നേതൃമാറ്റത്തിന് ശേഷമുള്ള ഇറാന്റെ രാഷ്ട്രീയ ഭാവിയെക്കുറിച്ചുള്ള ആശങ്കകൾ നിലനിൽക്കെ, റഷ്യയുടെ ഈ വെളിപ്പെടുത്തൽ വരും ദിവസങ്ങളിൽ വലിയ പ്രാധാന്യത്തോടെയാണ് ലോകം വീക്ഷിക്കുന്നത്.

### Related Links & Sources
- [Original Story Source](https://truevisionnews.com/news/350909/russia-makes-crucial-revelation-amid-rumors)