---
title: "മദ്യപാനം തടയാൻ ഭാര്യയെ പൂട്ടിയിട്ട് ഭർത്താവ്; 55-കാരിയെ റോഡരികിൽ ഉപേക്ഷിക്കപ്പെട്ട നിലയിൽ കണ്ടെത്തി "
english_title: "Husband locks wife in to stop her from drinking"
publisher: "truevisionnews.com"
canonical_url: "https://truevisionnews.com/news/350378/husband-locks-wife-in-to-stop-her-from-drinking"
published_at: "2026-03-29T09:36:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/69c8a5a4c6dc7_1.jpg"
keywords: []
---

# മദ്യപാനം തടയാൻ ഭാര്യയെ പൂട്ടിയിട്ട് ഭർത്താവ്; 55-കാരിയെ റോഡരികിൽ ഉപേക്ഷിക്കപ്പെട്ട നിലയിൽ കണ്ടെത്തി 

> **Lead Summary:** **പാലക്കാട്: [ **കൊല്ലങ്കോട് ആനമാറി റോഡരികിൽ കാലുകൾ ചങ്ങലയാൽ ബന്ധിക്കപ്പെട്ട നിലയിൽ ഒരു സ്ത്രീയെ കണ്ടെത്തിയത് നാട്ടുകാരെയും പോലീസിനെയും ഒരുപോലെ അമ്പരപ്പിച്ചു.

## Article Content

**പാലക്കാട്: [ **കൊല്ലങ്കോട് ആനമാറി റോഡരികിൽ കാലുകൾ ചങ്ങലയാൽ ബന്ധിക്കപ്പെട്ട നിലയിൽ ഒരു സ്ത്രീയെ കണ്ടെത്തിയത് നാട്ടുകാരെയും പോലീസിനെയും ഒരുപോലെ അമ്പരപ്പിച്ചു.

തമിഴ്‌നാട് നാമക്കൽ സ്വദേശിനിയായ അമ്പത്തിയഞ്ചുകാരിയെയാണ് ശനിയാഴ്ച ഉച്ചയോടെ ഇത്തരമൊരു ദുരവസ്ഥയിൽ കണ്ടെത്തിയത്. വിവരമറിഞ്ഞെത്തിയ അഗ്നിരക്ഷാസേന കട്ടർ ഉപയോഗിച്ച് ചങ്ങല മുറിച്ചുമാറ്റിയ ശേഷമാണ് ഇവരെ സ്വതന്ത്രയാക്കിയത്.

തുടർന്ന് നടന്ന പോലീസ് അന്വേഷണത്തിലാണ് സംഭവത്തിന് പിന്നിലെ ഞെട്ടിക്കുന്ന കാരണങ്ങൾ പുറത്തുവന്നത്. ഭാര്യയുടെ അമിത മദ്യപാനവും അതുണ്ടാക്കുന്ന കുടുംബപ്രശ്നങ്ങളുമാണ് താൻ ഇത്തരമൊരു പ്രവർത്തി ചെയ്യാൻ കാരണമെന്ന് ഭർത്താവ് പോലീസിന് മൊഴി നൽകി.

മദ്യപിച്ചു കഴിഞ്ഞാൽ ഭാര്യ പരിസരവാസികൾക്ക് ശല്യമുണ്ടാക്കാറുണ്ടെന്നും വിവസ്ത്രയായി പുറത്തിറങ്ങുന്നത് തടയാൻ മറ്റ് മാർഗമില്ലാത്തതിനാലാണ് ജോലിക്ക് പോകുമ്പോൾ പൂട്ടിയിട്ടതെന്നും ഇയാൾ പോലീസിനോട് വിശദീകരിച്ചു.

ഊട്ടറയിലെ ഒരു ഷെഡിൽ താമസിക്കുന്ന ഇവർക്കിടയിൽ മദ്യപാനത്തെച്ചൊല്ലി നിരന്തരം വഴക്കുകൾ പതിവായിരുന്നു. പൂട്ടിയിട്ട നിലയിൽ വീട്ടിൽ നിന്നും എങ്ങനെയോ പുറത്തുകടന്ന സ്ത്രീ ഒരു സ്കൂട്ടർ യാത്രക്കാരന്റെ സഹായത്തോടെയാണ് വർക്ക്‌ഷോപ്പിന് മുന്നിലെത്തിയത്.

സംഭവത്തിൽ ദമ്പതിമാരെ വിളിപ്പിച്ചു സംസാരിച്ച പോലീസ്, ഇനി ഇത്തരം പ്രവൃത്തികൾ ആവർത്തിക്കില്ലെന്ന ഉറപ്പിന്മേൽ കേസെടുക്കാതെ ഇവരെ വിട്ടയച്ചു. പ്രിൻസിപ്പൽ സബ് ഇൻസ്പെക്ടർ ശ്രീജിലിന്റെ നേതൃത്വത്തിലായിരുന്നു തുടർനടപടികൾ സ്വീകരിച്ചത്.

### Related Links & Sources
- [Original Story Source](https://truevisionnews.com/news/350378/husband-locks-wife-in-to-stop-her-from-drinking)