---
title: "'ശത്രുക്കൾ വന്നാൽ ഒറ്റ വെടിക്ക് തീർക്കാം'; കിം ജോങ് ഉന്നിന് റൈഫിൾ സമ്മാനിച്ച് ബെലാറസ് പ്രസിഡന്റ്"
english_title: "Belarus President presents rifle to Kim Jong Un"
publisher: "truevisionnews.com"
canonical_url: "https://truevisionnews.com/news/350079/belarus-president-presents-rifle-to-kim-jong-un"
published_at: "2026-03-27T16:10:00+05:30"
category: "International"
language: "ml"
image: "https://cf.zdn.im/img/truevisionnews.com/0/image-uploads/69c660a06724d_222.jpg"
keywords: []
---

# 'ശത്രുക്കൾ വന്നാൽ ഒറ്റ വെടിക്ക് തീർക്കാം'; കിം ജോങ് ഉന്നിന് റൈഫിൾ സമ്മാനിച്ച് ബെലാറസ് പ്രസിഡന്റ്

> **Lead Summary:** **പ്യോങ്യാങ്:[ ** ഉത്തരകൊറിയൻ ഭരണാധികാരി കിം ജോങ് ഉന്നും ബെലാറസ് പ്രസിഡന്റ് അലക്‌സാണ്ടർ ലുകാഷെങ്കോയും തമ്മിലുള്ള കൂടിക്കാഴ്ചയിൽ ശ്രദ്ധേയമായി വിചിത്രമായ സമ്മാനക്കൈമാറ്റങ്ങൾ.

## Article Content

**പ്യോങ്യാങ്:[ ** ഉത്തരകൊറിയൻ ഭരണാധികാരി കിം ജോങ് ഉന്നും ബെലാറസ് പ്രസിഡന്റ് അലക്‌സാണ്ടർ ലുകാഷെങ്കോയും തമ്മിലുള്ള കൂടിക്കാഴ്ചയിൽ ശ്രദ്ധേയമായി വിചിത്രമായ സമ്മാനക്കൈമാറ്റങ്ങൾ.

അത്യാധുനിക സാങ്കേതികവിദ്യയുള്ള ഒരു റൈഫിളാണ് കിമ്മിന് ലുകാഷെങ്കോ സമ്മാനമായി നൽകിയത്. ശത്രുക്കൾ വന്നാൽ ഉപയോഗിക്കാമെന്ന തമാശയോടെയാണ് അദ്ദേഹം ഈ ആയുധം കൈമാറിയത്.

ഇതിന് പകരമായി രത്നങ്ങൾ പതിപ്പിച്ച ഉടവാളും ലുകാഷെങ്കോയുടെ ചിത്രം കൊത്തിയ പൂപ്പാത്രവും സ്വർണ്ണ ഉപഹാരങ്ങളുമാണ് കിം ജോങ് ഉൻ തിരിച്ചു നൽകിയത്. ഇരുരാജ്യങ്ങളും തമ്മിലുള്ള പുതിയ സൗഹൃദ ഉടമ്പടിയിൽ ഒപ്പിടുന്നതിന്റെ ഭാഗമായാണ് ഈ അപൂർവ്വമായ ഉപഹാരങ്ങൾ കൈമാറിയത്.

റഷ്യയുടെ യുക്രെയ്ൻ അധിനിവേശത്തെ പിന്തുണയ്ക്കുന്നതിന്റെ പേരിൽ പാശ്ചാത്യ രാജ്യങ്ങളുടെ കടുത്ത ഉപരോധം നേരിടുന്ന രാജ്യങ്ങളാണ് ഉത്തരകൊറിയയും ബെലാറസും. ഈ സാഹചര്യത്തിൽ പാശ്ചാത്യ സമ്മർദ്ദങ്ങളെ ഒന്നിച്ച് പ്രതിരോധിക്കാനും സഹകരണം ശക്തമാക്കാനും ഇരുനേതാക്കളും ധാരണയിലെത്തി.

അന്താരാഷ്ട്ര നിയമങ്ങൾ ലംഘിക്കപ്പെടുന്ന കാലത്ത് രാജ്യങ്ങളുടെ പരമാധികാരം സംരക്ഷിക്കാൻ പരസ്പര സഹകരണം അത്യാവശ്യമാണെന്ന് ലുകാഷെങ്കോ ചടങ്ങിൽ വ്യക്തമാക്കി. ഉത്തരകൊറിയയെ കാത്തിരിക്കുന്നത് മഹത്തായ ഭാവിയാണെന്നും അദ്ദേഹം കൂട്ടിച്ചേർത്തു.

സൗഹൃദ ഉടമ്പടിയുടെ ഭാഗമായി കൃഷി, വിവരസാങ്കേതികവിദ്യ, പൊതുജനാരോഗ്യം തുടങ്ങിയ മേഖലകളിൽ വരും വർഷങ്ങളിൽ സഹകരിക്കാൻ ഇരുരാജ്യങ്ങളും തീരുമാനിച്ചിട്ടുണ്ട്. ഉഭയകക്ഷി ബന്ധം മെച്ചപ്പെടുത്താൻ ഈ കൂടിക്കാഴ്ച സഹായിക്കുമെന്ന് കിം ജോങ് ഉന്നും പ്രതികരിച്ചു.

പാശ്ചാത്യ രാജ്യങ്ങളുടെ ഉപരോധങ്ങൾക്കിടയിലും തങ്ങളുടെ നിലപാടുകളിൽ ഉറച്ചുനിൽക്കുമെന്ന പ്രഖ്യാപനം കൂടിയായി ഈ പുതിയ നയതന്ത്ര നീക്കം മാറിയിരിക്കുകയാണ്.

### Related Links & Sources
- [Original Story Source](https://truevisionnews.com/news/350079/belarus-president-presents-rifle-to-kim-jong-un)