---
title: "ഇസ്രായേലിന് നേരെ ഇറാന്റെ മിസൈൽ വർഷം; 24 മണിക്കൂറിനിടെ 150 പേർക്ക് പരിക്ക്"
english_title: "Iran's missile attack on Israel; 150 injured in 24 hours"
publisher: "truevisionnews.com"
canonical_url: "https://truevisionnews.com/news/348810/irans-missile-attack-on-israel-150-injured-in-24-hours"
published_at: "2026-03-20T16:51:00+05:30"
category: "International"
language: "ml"
image: "https://cf.zdn.im/img/truevisionnews.com/0/image-uploads/69bd2e02ab2c9_17.jpg"
keywords: []
---

# ഇസ്രായേലിന് നേരെ ഇറാന്റെ മിസൈൽ വർഷം; 24 മണിക്കൂറിനിടെ 150 പേർക്ക് പരിക്ക്

> **Lead Summary:** ഇസ്രായേലിനെ ലക്ഷ്യമിട്ട് ഇറാൻ നടത്തുന്ന മിസൈൽ ആക്രമണങ്ങൾ അതിശക്തമായി തുടരുന്നു. കഴിഞ്ഞ 24 മണിക്കൂറിനിടെയുണ്ടായ ആക്രമണങ്ങളിൽ 150-ഓളം പേർക്ക് പരിക്കേറ്റതായി ഇസ്രായേൽ ആരോഗ്യ മന്ത്രാലയം ഔദ്യോഗികമായി സ്ഥിരീകരിച്ചു. സംഘർഷം ആരംഭിച്ചതിനുശേഷം ആകെ പരിക്കേറ്റവരുടെ എണ്ണം 4,000 കടന്നതായാണ് റിപ്പോർട്ട്. എന്നാൽ മരണസംഖ്യ സംബന്ധിച്ച കൃത്യമായ വിവരങ്ങൾ പുറത്തുവിടാൻ അധികൃതർ തയ്യാറായിട്ടില്ല.

## Article Content

ഇസ്രായേലിനെ ലക്ഷ്യമിട്ട് ഇറാൻ നടത്തുന്ന മിസൈൽ ആക്രമണങ്ങൾ അതിശക്തമായി തുടരുന്നു. കഴിഞ്ഞ 24 മണിക്കൂറിനിടെയുണ്ടായ ആക്രമണങ്ങളിൽ 150-ഓളം പേർക്ക് പരിക്കേറ്റതായി ഇസ്രായേൽ ആരോഗ്യ മന്ത്രാലയം ഔദ്യോഗികമായി സ്ഥിരീകരിച്ചു. സംഘർഷം ആരംഭിച്ചതിനുശേഷം ആകെ പരിക്കേറ്റവരുടെ എണ്ണം 4,000 കടന്നതായാണ് റിപ്പോർട്ട്. എന്നാൽ മരണസംഖ്യ സംബന്ധിച്ച കൃത്യമായ വിവരങ്ങൾ പുറത്തുവിടാൻ അധികൃതർ തയ്യാറായിട്ടില്ല.

ഇറാന്റെ ആയുധശേഖരം തീരുകയാണെന്ന ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിന്റെ പ്രസ്താവനയെ ഇറാൻ റെവല്യൂഷണറി ഗാർഡ് പൂർണ്ണമായും തള്ളി. യുദ്ധസാഹചര്യത്തിലും മിസൈലുകളുടെ നിർമ്മാണം തടസ്സമില്ലാതെ തുടരുകയാണെന്ന് ഐആർജിസി വ്യക്തമാക്കി. രാജ്യത്തിന് മേലുള്ള യുദ്ധഭീതി ഒഴിയുന്നത് വരെ പോരാട്ടം തുടരുമെന്നും തങ്ങളുടെ പക്കൽ ആവശ്യത്തിന് ആയുധശേഖരമുണ്ടെന്നും അവർ കൂട്ടിച്ചേർത്തു.

അതിനിടെ, ഇറാന്റെ വ്യോമാതിർത്തിയിൽ വെച്ച് അമേരിക്കയുടെ അത്യാധുനിക എഫ്-35 യുദ്ധവിമാനത്തിന് നേരെ ആക്രമണം നടത്തിയതായും ഐആർജിസി അവകാശപ്പെട്ടു. ഉപരിതലത്തിൽ നിന്ന് വിക്ഷേപിക്കാവുന്ന മിസൈൽ ഉപയോഗിച്ചാണ് വിമാനത്തെ ലക്ഷ്യം വെച്ചതെന്ന് ദൃശ്യങ്ങൾ സഹിതം ഇറാൻ അവകാശപ്പെടുന്നു. ആക്രമണത്തെത്തുടർന്ന് വിമാനം പശ്ചിമേഷ്യയിലെ സൈനിക താവളത്തിൽ അടിയന്തരമായി ലാൻഡ് ചെയ്തതായി അമേരിക്കൻ വൃത്തങ്ങളും സ്ഥിരീകരിച്ചിട്ടുണ്ട്.

മേഖലയിലെ സുരക്ഷ ശക്തമാക്കുന്നതിന്റെ ഭാഗമായി 4,000-ത്തോളം യുഎസ് മറൈനുകൾ വരും ആഴ്ചകളിൽ ഹോർമുസ് കടലിടുക്കിലേക്ക് എത്തുമെന്നാണ് സൂചന. ഹോർമുസിന്റെ നിയന്ത്രണം ഉറപ്പാക്കാനും ഇറാന്റെ തിരിച്ചടികൾ പ്രതിരോധിക്കാനുമാണ് ഈ നീക്കം. എന്നാൽ, ഹോർമുസിലേക്ക് സൈന്യത്തെ അയക്കണമെന്ന അമേരിക്കയുടെ നിർദ്ദേശത്തിന് നാറ്റോ സഖ്യകക്ഷികളിൽ നിന്ന് വേണ്ടത്ര പിന്തുണ ലഭിച്ചിട്ടില്ലെന്നത് ശ്രദ്ധേയമാണ്.

### Related Links & Sources
- [Original Story Source](https://truevisionnews.com/news/348810/irans-missile-attack-on-israel-150-injured-in-24-hours)