---
title: "അറബിക് രുചിയുടെ രാജകുമാരൻ; വീട്ടിലുണ്ടാക്കാം മനംനിറയ്ക്കുന്ന ചിക്കൻ മജ്‌ബൂസ് വളരെ എളുപ്പത്തിൽ "
english_title: "How to prepare Chicken Majboos"
publisher: "truevisionnews.com"
canonical_url: "https://truevisionnews.com/news/348400/how-to-prepare-chicken-majboos"
published_at: "2026-03-18T13:52:00+05:30"
category: "Cookery"
language: "ml"
image: "https://cf.zdn.im/img/truevisionnews.com/0/image-uploads/69ba612997a43_13.jpg"
keywords: []
---

# അറബിക് രുചിയുടെ രാജകുമാരൻ; വീട്ടിലുണ്ടാക്കാം മനംനിറയ്ക്കുന്ന ചിക്കൻ മജ്‌ബൂസ് വളരെ എളുപ്പത്തിൽ 

> **Lead Summary:** **[** അറേബ്യൻ നാടുകളിൽ ഏറെ പ്രിയപ്പെട്ടതും രുചികരവുമായ വിഭവമാണ് മജ്‌ബൂസ്. ബിരിയാണിയോട് സാമ്യമുള്ളതാണെങ്കിലും ഇതിന്റെ മസാലക്കൂട്ടുകളും പാചകരീതിയും വ്യത്യസ്തമാണ്. 

## Article Content

**[** അറേബ്യൻ നാടുകളിൽ ഏറെ പ്രിയപ്പെട്ടതും രുചികരവുമായ വിഭവമാണ് മജ്‌ബൂസ്. ബിരിയാണിയോട് സാമ്യമുള്ളതാണെങ്കിലും ഇതിന്റെ മസാലക്കൂട്ടുകളും പാചകരീതിയും വ്യത്യസ്തമാണ്. 

**ആവശ്യമായ സാധനങ്ങൾ:**

***ചിക്കൻ: 1 കിലോ (വലിയ കഷ്ണങ്ങളാക്കിയത്)***

***ബസുമതി അരി: 3 കപ്പ്***

***സവാള: 3 എണ്ണം (ചെറുതായി അരിഞ്ഞത്)***

***തക്കാളി: 2 എണ്ണം (അരിഞ്ഞത്)***

***ഇഞ്ചി-വെളുത്തുള്ളി പേസ്റ്റ്: 2 ടേബിൾസ്പൂൺ***

***പച്ചമുളക്: 4-5 എണ്ണം***

***മജ്‌ബൂസ് മസാല: 2 ടേബിൾസ്പൂൺ (മല്ലിപ്പൊടി, ജീരകപ്പൊടി, കുരുമുളകുപൊടി, ഏലയ്ക്കപ്പൊടി, കറുവപ്പട്ട പൊടിച്ചത് എന്നിവയുടെ മിശ്രിതം)***

***ഉണങ്ങിയ നാരങ്ങ : 2 എണ്ണം***

***മല്ലിയില, പുതിനയില: ഒരു പിടി***

***നെയ്യ്/എണ്ണ: ആവശ്യത്തിന്***

***ഉപ്പ്: പാകത്തിന്***

***വെള്ളം: അരി വേവിക്കാൻ ആവശ്യമായ അളവിൽ***

**തയ്യാറാക്കുന്ന വിധം:**

ആദ്യമായി ബസുമതി അരി നന്നായി കഴുകി അരമണിക്കൂർ കുതിർക്കാൻ വെക്കുക. ഒരു വലിയ പാത്രത്തിൽ എണ്ണയോ നെയ്യോ ഒഴിച്ച് ചൂടാകുമ്പോൾ സവാള ചേർത്ത് വഴറ്റുക. സവാള പൊൻനിറമാകുമ്പോൾ ഇഞ്ചി-വെളുത്തുള്ളി പേസ്റ്റും പച്ചമുളകും ചേർത്ത് പച്ചമണം മാറുന്നത് വരെ ഇളക്കണം. ഇതിലേക്ക് തക്കാളി ചേർത്ത് നന്നായി ഉടയുന്നത് വരെ വേവിക്കുക.

തുടർന്ന് മജ്‌ബൂസ് മസാലയും പാകത്തിന് ഉപ്പും ചേർത്ത് നന്നായി ഇളക്കുക. ഇതിലേക്ക് കഴുകി വെച്ചിരിക്കുന്ന ചിക്കൻ കഷ്ണങ്ങൾ ചേർത്ത് മസാലയുമായി യോജിപ്പിക്കുക. ചിക്കൻ പകുതി വേവാകുമ്പോൾ ആവശ്യത്തിന് വെള്ളവും ഉണങ്ങിയ നാരങ്ങയും (നാരങ്ങയിൽ ചെറിയ തുളകൾ ഇടുന്നത് നല്ലതാണ്) ചേർത്ത് ചിക്കൻ പൂർണ്ണമായും വേവുന്നത് വരെ അടച്ചു വെക്കുക.

ചിക്കൻ വെന്തു കഴിഞ്ഞാൽ അവ പാത്രത്തിൽ നിന്നും കോരി മാറ്റുക. ഈ ചിക്കൻ കഷ്ണങ്ങൾ അല്പം മസാല പുരട്ടി എണ്ണയിൽ ഒന്ന് വറുത്തെടുക്കുന്നത് മജ്‌ബൂസിന് കൂടുതൽ രുചി നൽകും. ചിക്കൻ മാറ്റിയ ശേഷം പാത്രത്തിലുള്ള വെള്ളത്തിലേക്ക് കുതിർത്തു വെച്ച അരി ചേർക്കുക.

വെള്ളം വറ്റി അരി പാകത്തിന് വെന്തു വരുമ്പോൾ തീ കുറച്ച് പത്ത് മിനിറ്റ് ദം ചെയ്യുക. അരി വെന്തുകഴിഞ്ഞാൽ വറുത്തു വെച്ചിരിക്കുന്ന ചിക്കൻ കഷ്ണങ്ങളും മല്ലിയിലയും പുതിനയിലയും മുകളിൽ വിതറി വിളമ്പാവുന്നതാണ്.

### Related Links & Sources
- [Original Story Source](https://truevisionnews.com/news/348400/how-to-prepare-chicken-majboos)