---
title: "യുഎഇ പ്രസിഡന്റിനെ വിളിച്ച് പ്രധാനമന്ത്രി മോദി; സമാധാനം പുനഃസ്ഥാപിക്കാൻ സംയുക്ത നീക്കം"
english_title: "PM Modi calls UAE President; joint move to restore peace"
publisher: "truevisionnews.com"
canonical_url: "https://truevisionnews.com/news/348303/pm-modi-calls-uae-president-joint-move-to-restore-peace"
published_at: "2026-03-17T23:03:00+05:30"
category: "National"
language: "ml"
image: "https://cf.zdn.im/img/truevisionnews.com/0/image-uploads/69b990c714ab7_23.jpg"
keywords: []
---

# യുഎഇ പ്രസിഡന്റിനെ വിളിച്ച് പ്രധാനമന്ത്രി മോദി; സമാധാനം പുനഃസ്ഥാപിക്കാൻ സംയുക്ത നീക്കം

> **Lead Summary:** പശ്ചിമേഷ്യയിൽ യുദ്ധസമാനമായ സാഹചര്യം തുടരുന്നതിനിടെ യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാനുമായി പ്രധാനമന്ത്രി നരേന്ദ്ര മോദി ടെലിഫോണിൽ സംസാരിച്ചു. മേഖലയിലെ സുരക്ഷാ സ്ഥിതിഗതികൾ വിലയിരുത്തിയ ഇരു നേതാക്കളും സമാധാനം തിരികെ കൊണ്ടുവരാൻ ഒത്തൊരുമിച്ച് പ്രവർത്തിക്കുമെന്ന് വ്യക്തമാക്കി. യുഎഇയിൽ നടന്ന ആക്രമണങ്ങളെ അപലപിച്ച പ്രധാനമന്ത്രി, ഹോർമുസ് കടലിടുക്ക് വഴിയുള്ള നാവിക ഗതാഗതത്തിന്റെ സുരക്ഷയെക്കുറിച്ചും പ്രസിഡന്റുമായി ചർച്ച ചെയ്തു.

## Article Content

പശ്ചിമേഷ്യയിൽ യുദ്ധസമാനമായ സാഹചര്യം തുടരുന്നതിനിടെ യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാനുമായി പ്രധാനമന്ത്രി നരേന്ദ്ര മോദി ടെലിഫോണിൽ സംസാരിച്ചു. മേഖലയിലെ സുരക്ഷാ സ്ഥിതിഗതികൾ വിലയിരുത്തിയ ഇരു നേതാക്കളും സമാധാനം തിരികെ കൊണ്ടുവരാൻ ഒത്തൊരുമിച്ച് പ്രവർത്തിക്കുമെന്ന് വ്യക്തമാക്കി. യുഎഇയിൽ നടന്ന ആക്രമണങ്ങളെ അപലപിച്ച പ്രധാനമന്ത്രി, ഹോർമുസ് കടലിടുക്ക് വഴിയുള്ള നാവിക ഗതാഗതത്തിന്റെ സുരക്ഷയെക്കുറിച്ചും പ്രസിഡന്റുമായി ചർച്ച ചെയ്തു.

ഗൾഫ് മേഖലയിൽ ആശങ്ക പടർത്തി പതിനെട്ടാം ദിവസവും ആക്രമണങ്ങൾ തുടരുകയാണ്. പുലർച്ചെ ദുബായ്, അബുദാബി എന്നിവിടങ്ങൾ ലക്ഷ്യമാക്കി മൂന്ന് തവണ ആക്രമണശ്രമങ്ങൾ ഉണ്ടായി. ഇതിനെത്തുടർന്ന് യുഎഇ വ്യോമാതിർത്തി ഒരു മണിക്കൂറോളം അടച്ചിട്ടു. അബുദാബിയിലെ ഷാഹ് ഓയിൽ ഫീൽഡിലും ഫുജൈറയിലെ ഇൻഡസ്ട്രിയൽ സോണിലും തീപിടുത്തമുണ്ടായി. അബുദാബിയിലെ ബനിയാസ് ജനവാസ മേഖലയിൽ മിസൈൽ അവശിഷ്ടങ്ങൾ പതിച്ചുണ്ടായ അപകടത്തിൽ ഒരു പാകിസ്ഥാൻ സ്വദേശി കൊല്ലപ്പെട്ടു.

സൗദി അറേബ്യയുടെ വിവിധ ഭാഗങ്ങളിലായി 40 ഡ്രോണുകൾ തകർത്തതായി പ്രതിരോധ മന്ത്രാലയം അറിയിച്ചു. ഖത്തറിലും ആക്രമണശ്രമങ്ങൾ റിപ്പോർട്ട് ചെയ്തിട്ടുണ്ട്. കുവൈറ്റിൽ ഹിസ്ബുല്ലയുമായി ബന്ധമുള്ള 16 പേരെ അധികൃതർ പിടികൂടി. സുരക്ഷാ മുൻകരുതലിന്റെ ഭാഗമായി യുഎഇയിലെ സ്കൂളുകളും സർവ്വകലാശാലകളും ഏപ്രിൽ ആദ്യവാരം വരെ ഓൺലൈൻ ക്ലാസുകൾ തുടരാൻ തീരുമാനിച്ചു.

### Related Links & Sources
- [Original Story Source](https://truevisionnews.com/news/348303/pm-modi-calls-uae-president-joint-move-to-restore-peace)