---
title: "കപ്പലുകൾ തടയും, ഇന്ധനവില കുതിക്കും: ആഗോള സമ്പദ്‌വ്യവസ്ഥയെ ഞെട്ടിക്കാൻ ഇറാന്റെ പടപ്പുറപ്പാട്"
english_title: "Iran's aggression could shock the global economy"
publisher: "truevisionnews.com"
canonical_url: "https://truevisionnews.com/news/347161/irans-aggression-could-shock-the-global-economy"
published_at: "2026-03-12T09:08:00+05:30"
category: "International"
language: "ml"
image: "https://cf.zdn.im/img/truevisionnews.com/0/image-uploads/69b235a735906_news1.jpg"
keywords: []
---

# കപ്പലുകൾ തടയും, ഇന്ധനവില കുതിക്കും: ആഗോള സമ്പദ്‌വ്യവസ്ഥയെ ഞെട്ടിക്കാൻ ഇറാന്റെ പടപ്പുറപ്പാട്

> **Lead Summary:** **ടെഹ്‌റാൻ: [ **പശ്ചിമേഷ്യയിൽ ഇറാനും അമേരിക്ക-ഇസ്രായേൽ സഖ്യവും തമ്മിലുള്ള സൈനിക നീക്കങ്ങൾ ശക്തമായതോടെ ലോകം കടുത്ത സാമ്പത്തിക പ്രതിസന്ധിയിലേക്കെന്ന് സൂചന.

## Article Content

**ടെഹ്‌റാൻ: [ **പശ്ചിമേഷ്യയിൽ ഇറാനും അമേരിക്ക-ഇസ്രായേൽ സഖ്യവും തമ്മിലുള്ള സൈനിക നീക്കങ്ങൾ ശക്തമായതോടെ ലോകം കടുത്ത സാമ്പത്തിക പ്രതിസന്ധിയിലേക്കെന്ന് സൂചന.

ഹോർമുസ് കടലിടുക്കിലൂടെയുള്ള എണ്ണക്കപ്പലുകളുടെ യാത്ര തടയുമെന്ന് ഇറാൻ ഇസ്‌ലാമിക് റെവല്യൂഷണറി ഗാർഡ് (ഐആർജിസി) പ്രഖ്യാപിച്ചതോടെ അന്താരാഷ്ട്ര വിപണിയിൽ എണ്ണവില കുതിച്ചുയരാൻ സാധ്യതയേറി.

അമേരിക്കയുമായും ഇസ്രായേലുമായും സഹകരിക്കുന്ന രാജ്യങ്ങളുടെ കപ്പലുകളെ ലക്ഷ്യം വെക്കുമെന്നാണ് ഇറാന്റെ മുന്നറിയിപ്പ്. മേഖലയിലെ സംഘർഷം തുടർന്നാൽ എണ്ണവില ബാരലിന് 200 ഡോളർ വരെ എത്തിയേക്കാമെന്നും, വിപണിയിലെ സുരക്ഷ ഉറപ്പാക്കാതെ വില കുറയ്ക്കാൻ കഴിയില്ലെന്നും ഇറാൻ വ്യക്തമാക്കിയിട്ടുണ്ട്.

ലോകത്തെ എണ്ണ വിതരണത്തിന്റെ അഞ്ചിലൊന്ന് ഭാഗവും കടന്നുപോകുന്ന തന്ത്രപ്രധാനമായ ഹോർമുസ് കടലിടുക്കിലെ അനിശ്ചിതത്വം ആഗോള വിപണിയെ കടുത്ത ആശങ്കയിലാക്കുന്നു. ഫെബ്രുവരി 28-ന് ആരംഭിച്ച യുദ്ധം പരിഹാരമില്ലാതെ തുടരുന്നതിനിടെ, കഴിഞ്ഞ ബുധനാഴ്ച മൂന്ന് കപ്പലുകൾക്ക് നേരെ ആക്രമണമുണ്ടായതും ഭീതി വർധിപ്പിച്ചിട്ടുണ്ട്.

എന്നാൽ, ഈ ഭീഷണികൾക്കിടയിലും കപ്പൽ ഗതാഗതം തടസ്സപ്പെടരുതെന്ന നിലപാടിലാണ് അമേരിക്കൻ പ്രസിഡന്റ് ഡൊണാൾഡ് ട്രംപ്. അതേസമയം, ഗൾഫ് മേഖലയിലെ സമാധാനം തകർക്കുന്ന രീതിയിലുള്ള ഇറാന്റെ സൈനിക ഇടപെടലുകൾക്കെതിരെ ഐക്യരാഷ്ട്രസഭ സുരക്ഷാ സമിതി ശക്തമായ പ്രമേയം പാസാക്കി.

ബഹ്‌റൈൻ അവതരിപ്പിച്ച പ്രമേയത്തെ സമിതിയിലെ 15-ൽ 13 അംഗരാജ്യങ്ങളും പിന്തുണച്ചു. എന്നാൽ റഷ്യയും ചൈനയും വോട്ടെടുപ്പിൽ നിന്ന് വിട്ടുനിന്നു. ഇറാന്റെ നടപടികൾ അന്താരാഷ്ട്ര നിയമങ്ങളുടെ ലംഘനമാണെന്ന് പ്രമേയം കുറ്റപ്പെടുത്തുമ്പോഴും, ഇറാന് നേരെ അമേരിക്കയും ഇസ്രായേലും നടത്തുന്ന സൈനിക നീക്കങ്ങളെക്കുറിച്ച് പ്രമേയം മൗനം പാലിക്കുന്നത് ശ്രദ്ധേയമാണ്.

### Related Links & Sources
- [Original Story Source](https://truevisionnews.com/news/347161/irans-aggression-could-shock-the-global-economy)