---
title: "പശ്ചിമേഷ്യയിൽ യുദ്ധം, കത്താതെ അടുക്കളകൾ; പാചകവാതകത്തിന് പകരക്കാരനായി ഇൻഡക്ഷൻ കുക്കറുകൾ, വിപണിയിൽ വൻ കുതിപ്പ്!"
english_title: "Induction cookers as a replacement for cooking gas"
publisher: "truevisionnews.com"
canonical_url: "https://truevisionnews.com/news/347051/induction-cookers-as-a-replacement-for-cooking-gas"
published_at: "2026-03-11T15:13:00+05:30"
category: "Business"
language: "ml"
image: "https://cf.zdn.im/img/truevisionnews.com/0/image-uploads/69b13967def15_17.jpg"
keywords: []
---

# പശ്ചിമേഷ്യയിൽ യുദ്ധം, കത്താതെ അടുക്കളകൾ; പാചകവാതകത്തിന് പകരക്കാരനായി ഇൻഡക്ഷൻ കുക്കറുകൾ, വിപണിയിൽ വൻ കുതിപ്പ്!

> **Lead Summary:** **[**പശ്ചിമേഷ്യൻ യുദ്ധത്തെത്തുടർന്ന് പാചകവാതക വിതരണം സ്തംഭിച്ചതോടെ വീടുകളിലെയും ഹോട്ടലുകളിലെയും അടുക്കളകൾ പുതിയ രീതികളിലേക്ക് ചുവടുമാറുകയാണ്. ഗ്യാസ് സിലിണ്ടറുകൾക്ക് കടുത്ത ക്ഷാമം നേരിട്ടതോടെ പകരക്കാരനായി ഇലക്ട്രിക് ഇൻഡക്ഷൻ കുക്കറുകളെയാണ് ജനങ്ങൾ ഇപ്പോൾ ആശ്രയിക്കുന്നത്.

## Article Content

**[**പശ്ചിമേഷ്യൻ യുദ്ധത്തെത്തുടർന്ന് പാചകവാതക വിതരണം സ്തംഭിച്ചതോടെ വീടുകളിലെയും ഹോട്ടലുകളിലെയും അടുക്കളകൾ പുതിയ രീതികളിലേക്ക് ചുവടുമാറുകയാണ്. ഗ്യാസ് സിലിണ്ടറുകൾക്ക് കടുത്ത ക്ഷാമം നേരിട്ടതോടെ പകരക്കാരനായി ഇലക്ട്രിക് ഇൻഡക്ഷൻ കുക്കറുകളെയാണ് ജനങ്ങൾ ഇപ്പോൾ ആശ്രയിക്കുന്നത്.

ഈ പെട്ടെന്നുള്ള മാറ്റം ഇലക്ട്രോണിക്സ് വിപണിയിൽ വൻ കുതിച്ചുചാട്ടത്തിനാണ് വഴിവെച്ചിരിക്കുന്നത്. പ്രാദേശിക കടകളിലും ആമസോൺ, ഫ്ലിപ്കാർട്ട് തുടങ്ങിയ ഓൺലൈൻ പ്ലാറ്റ്‌ഫോമുകളിലും ഇൻഡക്ഷൻ അടുപ്പുകൾ വാങ്ങാൻ വൻ തിരക്കാണ് അനുഭവപ്പെടുന്നത്.

കഴിഞ്ഞ കുറച്ചുദിവസങ്ങൾക്കിടയിൽ ഫ്ലിപ്കാർട്ടിൽ ഇൻഡക്ഷൻ കുക്കറുകളുടെ വിൽപന മൂന്നിരട്ടിയായി വർധിച്ചപ്പോൾ, ആമസോൺ ഇന്ത്യയിൽ ആവശ്യകതയിൽ 20 ഇരട്ടിയുടെ അവിശ്വസനീയമായ വർധനവാണ് രേഖപ്പെടുത്തിയിരിക്കുന്നത്.

ഡൽഹി, കൊൽക്കത്ത, ഉത്തർപ്രദേശ്, മുംബൈ തുടങ്ങിയ പ്രധാന നഗരങ്ങളിലെല്ലാം സമാനമായ സാഹചര്യമാണുള്ളത്. ഗ്യാസ് ലഭ്യത കുറഞ്ഞതോടെ മറ്റ് വഴികളില്ലാതെ ജനങ്ങൾ കൂട്ടത്തോടെ വൈദ്യുതി അടുപ്പുകളിലേക്ക് മാറുന്നതായി വ്യാപാരികൾ സാക്ഷ്യപ്പെടുത്തുന്നു.

ഗാർഹിക ഉപഭോക്താക്കൾ മാത്രമല്ല, വാണിജ്യ ആവശ്യങ്ങൾക്കുള്ള പാചകവാതകം മുടങ്ങിയതോടെ ഹോട്ടലുടമകളും വലിയ പ്രതിസന്ധിയിലാണ്. വലിയ അളവിൽ പാചകം ചെയ്യാൻ സഹായിക്കുന്ന ഉയർന്ന ശേഷിയുള്ള ഇൻഡക്ഷൻ സംവിധാനങ്ങൾ തേടി നിരവധി ഹോട്ടൽ ഉടമകൾ വിപണിയെ സമീപിക്കുന്നുണ്ട്.

വരും ദിവസങ്ങളിലും ഇന്ധന പ്രതിസന്ധി തുടരുകയാണെങ്കിൽ ഇൻഡക്ഷൻ അടുപ്പുകളുടെ വിൽപന ഇനിയും റെക്കോർഡുകൾ ഭേദിക്കുമെന്നാണ് വിപണി വിദഗ്ധരുടെ വിലയിരുത്തൽ.

### Related Links & Sources
- [Original Story Source](https://truevisionnews.com/news/347051/induction-cookers-as-a-replacement-for-cooking-gas)