---
title: "44 ലക്ഷം എവിടെ? ഡിവൈഎഫ്ഐയുടെ പുനരധിവാസ ഫണ്ടിനെച്ചൊല്ലി രാഷ്ട്രീയ പോര്; ഡിവൈഎഫ്ഐയും യൂത്ത് കോൺഗ്രസും നേർക്കുനേർ!"
english_title: "Youth Congress - DYFI fight over landslide rehabilitation fund collection"
publisher: "truevisionnews.com"
canonical_url: "https://truevisionnews.com/news/346050/youth-congress-dyfi-fight-over-landslide-rehabilitation-fund-collection"
published_at: "2026-03-06T16:10:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/69aaafbaddd98_23.jpg"
keywords: []
---

# 44 ലക്ഷം എവിടെ? ഡിവൈഎഫ്ഐയുടെ പുനരധിവാസ ഫണ്ടിനെച്ചൊല്ലി രാഷ്ട്രീയ പോര്; ഡിവൈഎഫ്ഐയും യൂത്ത് കോൺഗ്രസും നേർക്കുനേർ!

> **Lead Summary:** **കൽപ്പറ്റ: [ **വയനാട് പുനരധിവാസ നിധി സമാഹരണത്തെച്ചൊല്ലി കൽപ്പറ്റയിൽ യൂത്ത് കോൺഗ്രസും ഡിവൈഎഫ്ഐയും തമ്മിലുള്ള രാഷ്ട്രീയ പോര് മുറുകുന്നു. ഉരുൾപൊട്ടൽ ദുരിതാശ്വാസത്തിനായി ഡിവൈഎഫ്ഐ പിരിച്ചെടുത്ത തുകയിൽ സുതാര്യതയില്ലെന്ന ആരോപണവുമായി യൂത്ത് കോൺഗ്രസ് രംഗത്തെത്തിയതാണ് പുതിയ തർക്കങ്ങൾക്ക് വഴിവെച്ചത്.

## Article Content

**കൽപ്പറ്റ: [ **വയനാട് പുനരധിവാസ നിധി സമാഹരണത്തെച്ചൊല്ലി കൽപ്പറ്റയിൽ യൂത്ത് കോൺഗ്രസും ഡിവൈഎഫ്ഐയും തമ്മിലുള്ള രാഷ്ട്രീയ പോര് മുറുകുന്നു. ഉരുൾപൊട്ടൽ ദുരിതാശ്വാസത്തിനായി ഡിവൈഎഫ്ഐ പിരിച്ചെടുത്ത തുകയിൽ സുതാര്യതയില്ലെന്ന ആരോപണവുമായി യൂത്ത് കോൺഗ്രസ് രംഗത്തെത്തിയതാണ് പുതിയ തർക്കങ്ങൾക്ക് വഴിവെച്ചത്.

2025 മാർച്ചിൽ മുഖ്യമന്ത്രിയുടെ ദുരിതാശ്വാസ നിധിയിലേക്ക് (CMDRF) 20 കോടി രൂപ നൽകുമെന്ന് പ്രഖ്യാപിച്ച ഡിവൈഎഫ്ഐ, യഥാർത്ഥത്തിൽ ആ തുക കൈമാറിയില്ലെന്നും 44 ലക്ഷം രൂപയോളം ഇപ്പോഴും സംഘടനയുടെ കൈവശം വെച്ചിരിക്കുകയാണെന്നും യൂത്ത് കോൺഗ്രസ് ആരോപിക്കുന്നു.

എന്നാൽ, ഈ ആരോപണങ്ങളെ ശക്തമായി പ്രതിരോധിച്ച ഡിവൈഎഫ്ഐ, പണം കൈമാറിയതിന്റെ രസീതുകൾ സഹിതം വിശദീകരണവുമായി മുന്നോട്ടുവന്നു. ദുരിതാശ്വാസ നിധിയിലേക്ക് പണം നൽകുന്നതിന് പകരം വീടുകളുടെ സ്പോൺസർഷിപ്പിനായി ടൗൺഷിപ്പ് നിർമ്മാണത്തിലേക്ക് ഈ തുക മാറ്റുകയായിരുന്നുവെന്നാണ് ഡിവൈഎഫ്ഐയുടെ വിശദീകരണം.

കഴിഞ്ഞ വർഷം മെയ് മാസത്തിൽ 5 കോടി രൂപയും, ബാക്കി 15 കോടി രൂപ ഈ ജനുവരിയോടെയുമാണ് കൈമാറിയതെന്ന് സംഘടന വ്യക്തമാക്കുന്നു. കമ്പനികളും സംഘടനകളും നൽകുന്ന ഇത്തരം ഫണ്ടുകൾ വെബ്സൈറ്റിൽ 'സിഎസ്ആർ (CSR) ഫണ്ട്' എന്നാകും രേഖപ്പെടുത്തുകയെന്നും ടൗൺഷിപ്പുമായി ബന്ധപ്പെട്ട ഉദ്യോഗസ്ഥരും ഇതിനോടകം സ്ഥിരീകരിച്ചിട്ടുണ്ട്.

ഡിവൈഎഫ്ഐയുടെ വിശദീകരണം തൃപ്തികരമല്ലെന്നാണ് യൂത്ത് കോൺഗ്രസിന്റെ വാദം. പണം നൽകിയ രസീതുകളിൽ സിഎസ്ആർ ഫണ്ട് എന്ന് രേഖപ്പെടുത്തിയത് ദുരൂഹമാണെന്നും, 20 കോടി സംബന്ധിച്ച ചോദ്യങ്ങൾ ഉയർന്നപ്പോൾ മാത്രമാണ് ജനുവരിയിൽ വലിയൊരു തുക കൈമാറിയതെന്നും അവർ കുറ്റപ്പെടുത്തുന്നു.

കൂടാതെ, പിരിച്ചെടുത്ത 20 കോടി 44 ലക്ഷം രൂപയിൽ ബാക്കിയുള്ള 44 ലക്ഷത്തിന്റെ കണക്ക് എവിടെയെന്നും യൂത്ത് കോൺഗ്രസ് ചോദിക്കുന്നു. തങ്ങളുടെ കണക്കുകളെ ചോദ്യം ചെയ്യുന്ന യൂത്ത് കോൺഗ്രസ്, കോൺഗ്രസ് പാർട്ടി സമാഹരിച്ച ഫണ്ടിന്റെ വിവരങ്ങൾ പുറത്തുവിടാൻ തയ്യാറുണ്ടോ എന്ന വെല്ലുവിളിയാണ് ഡിവൈഎഫ്ഐ മറുപടിയായി ഉയർത്തുന്നത്.

### Related Links & Sources
- [Original Story Source](https://truevisionnews.com/news/346050/youth-congress-dyfi-fight-over-landslide-rehabilitation-fund-collection)