---
title: "'ബുദ്ധനും ബോട്ടിനും ഒരേ മനസ്സ്; ജപ്പാനിലെ ക്ഷേത്രങ്ങളിൽ ഇനി എഐ സന്യാസിമാരുടെ കാലം'"
english_title: "AI monks in temples in Japan"
publisher: "truevisionnews.com"
canonical_url: "https://truevisionnews.com/news/344607/ai-monks-in-temples-in-japan"
published_at: "2026-02-27T15:25:00+05:30"
category: "International"
language: "ml"
image: "https://cf.zdn.im/img/truevisionnews.com/0/image-uploads/69a16a6528e61_tru19.jpg"
keywords: []
---

# 'ബുദ്ധനും ബോട്ടിനും ഒരേ മനസ്സ്; ജപ്പാനിലെ ക്ഷേത്രങ്ങളിൽ ഇനി എഐ സന്യാസിമാരുടെ കാലം'

> **Lead Summary:** **[ **വിശ്വാസവും ആധുനിക സാങ്കേതികവിദ്യയും കൈകോർക്കുന്ന കാഴ്ചയ്ക്കാണ് ജപ്പാൻ സാക്ഷ്യം വഹിക്കുന്നത്. കുറഞ്ഞുവരുന്ന സന്യാസിമാരുടെ എണ്ണവും വിശ്വാസികളുടെ കൊഴിഞ്ഞുപോക്കും പരിഹരിക്കാൻ ലക്ഷ്യമിട്ട്, നിർമ്മിത ബുദ്ധിയിൽ പ്രവർത്തിക്കുന്ന 'ബുദ്ധറോയിഡ്' എന്ന റോബോട്ട് സന്യാസിയെ ജപ്പാൻ അവതരിപ്പിച്ചു.

## Article Content

**[ **വിശ്വാസവും ആധുനിക സാങ്കേതികവിദ്യയും കൈകോർക്കുന്ന കാഴ്ചയ്ക്കാണ് ജപ്പാൻ സാക്ഷ്യം വഹിക്കുന്നത്. കുറഞ്ഞുവരുന്ന സന്യാസിമാരുടെ എണ്ണവും വിശ്വാസികളുടെ കൊഴിഞ്ഞുപോക്കും പരിഹരിക്കാൻ ലക്ഷ്യമിട്ട്, നിർമ്മിത ബുദ്ധിയിൽ പ്രവർത്തിക്കുന്ന 'ബുദ്ധറോയിഡ്' എന്ന റോബോട്ട് സന്യാസിയെ ജപ്പാൻ അവതരിപ്പിച്ചു.

ക്യോട്ടോ സർവകലാശാലയും പ്രമുഖ ടെക് കമ്പനികളായ ടെറാവേഴ്സ്, എക്സ്നോവ എന്നിവരും ചേർന്നാണ് ഈ വിപ്ലവകരമായ മാറ്റത്തിന് തുടക്കമിട്ടിരിക്കുന്നത്. ക്യോട്ടോയിലെ പ്രസിദ്ധമായ ഷോറെൻ-ഇൻ ക്ഷേത്രത്തിലാണ് ഈ എഐ സന്യാസി തന്റെ സേവനം ആരംഭിച്ചിരിക്കുന്നത്.

മനുഷ്യ സന്യാസിമാരെപ്പോലെ തന്നെ ശാന്തമായി നടക്കാനും വന്ദിക്കാനും കൈകൾ കൂപ്പി അനുഗ്രഹിക്കാനും കഴിയുന്ന രീതിയിലാണ് യൂണിട്രി റോബോട്ടിക്സ് ഇതിന്റെ ഹാർഡ്‌വെയർ തയ്യാറാക്കിയിരിക്കുന്നത്.

'ബുദ്ധബോട്ട് പ്ലസ്' എന്ന ജനറേറ്റീവ് എഐ മോഡലിന്റെ കരുത്തിലാണ് ഇത് പ്രവർത്തിക്കുന്നത്. ബുദ്ധമത ഗ്രന്ഥങ്ങളിൽ പ്രത്യേക പരിശീലനം ലഭിച്ച ഈ റോബോട്ടിന്, വിശ്വാസികളുടെ വ്യക്തിപരമായ പ്രശ്നങ്ങൾക്കും സാമൂഹികമായ ആകുലതകൾക്കും തത്സമയം മറുപടി നൽകാൻ സാധിക്കും.

മുമ്പ് 2019-ൽ അവതരിപ്പിക്കപ്പെട്ട 'മിന്ദാർ' എന്ന റോബോട്ടിൽ നിന്നും വ്യത്യസ്തമായി, സ്വന്തമായി ചിന്തിച്ച് സംഭാഷണങ്ങളിൽ ഏർപ്പെടാൻ ബുദ്ധറോയിഡിന് കഴിയുമെന്നതാണ് ഇതിന്റെ പ്രത്യേകത.

ജപ്പാൻ നേരിടുന്ന ഗുരുതരമായ സാമൂഹിക പ്രതിസന്ധികൾക്കുള്ള ഒരു ശാസ്ത്രീയ പരിഹാരമായാണ് ഗവേഷകർ ഇതിനെ കാണുന്നത്. ജനസംഖ്യയിലെ കുറവും യുവാക്കൾ മതപരമായ കാര്യങ്ങളിൽ നിന്ന് അകന്നുപോകുന്നതും കാരണം 2040-ഓടെ ജപ്പാനിലെ 30 ശതമാനത്തോളം ക്ഷേത്രങ്ങൾ അടച്ചുപൂട്ടേണ്ടി വരുമെന്നാണ് റിപ്പോർട്ടുകൾ സൂചിപ്പിക്കുന്നത്.

ഈ സാഹചര്യത്തിൽ, ഡിജിറ്റൽ ലോകത്തെ ആത്മീയതയുമായി ബന്ധിപ്പിക്കാനും വരുംതലമുറയ്ക്ക് മതപരമായ പാരമ്പര്യങ്ങൾ പകർന്നുനൽകാനും ഇത്തരം എഐ സന്യാസിമാർക്ക് കഴിയുമെന്ന് ഡെവലപ്പർമാർ വിശ്വസിക്കുന്നു.

### Related Links & Sources
- [Original Story Source](https://truevisionnews.com/news/344607/ai-monks-in-temples-in-japan)