---
title: "വിദ്യാർത്ഥികൾക്കിടയിൽ ചിക്കൻപോക്സ് പടരുന്നു; തിരുവനന്തപുരം യൂണിവേഴ്സിറ്റി കോളേജ് ഒരാഴ്ചത്തേയ്ക്ക് അടച്ചിടും "
english_title: "Chickenpox: Thiruvananthapuram University College to be closed for a week"
publisher: "truevisionnews.com"
canonical_url: "https://truevisionnews.com/news/344055/chickenpox-thiruvananthapuram-university-college-to-be-closed-for-a-week"
published_at: "2026-02-25T06:03:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/699e43ade3efb_px.jpg"
keywords: []
---

# വിദ്യാർത്ഥികൾക്കിടയിൽ ചിക്കൻപോക്സ് പടരുന്നു; തിരുവനന്തപുരം യൂണിവേഴ്സിറ്റി കോളേജ് ഒരാഴ്ചത്തേയ്ക്ക് അടച്ചിടും 

> **Lead Summary:** **തിരുവനന്തപുരം : ** വിദ്യാർഥികൾക്കിടയിൽ ചിക്കൻപോക്സ് പടരുന്ന സാഹചര്യത്തിൽ തിരുവനന്തപുരം യൂണിവേഴ്സിറ്റി കോളേജ് ഒരാഴ്ചത്തേയ്ക്ക് അടച്ചിടാൻ അധികൃതർ തീരുമാനിച്ചു. കോളേജിലെ വിവിധ ഡിപ്പാർട്ട്മെന്റുകളിലെ വിദ്യാർഥികൾക്കിടയിൽ രോഗബാധ റിപ്പോർട്ട് ചെയ്തതിനെത്തുടർന്നാണ് ഈ മുൻകരുതൽ നടപടി സ്വീകരിച്ചിരിക്കുന്നത്.

## Article Content

**തിരുവനന്തപുരം : ** വിദ്യാർഥികൾക്കിടയിൽ ചിക്കൻപോക്സ് പടരുന്ന സാഹചര്യത്തിൽ തിരുവനന്തപുരം യൂണിവേഴ്സിറ്റി കോളേജ് ഒരാഴ്ചത്തേയ്ക്ക് അടച്ചിടാൻ അധികൃതർ തീരുമാനിച്ചു. കോളേജിലെ വിവിധ ഡിപ്പാർട്ട്മെന്റുകളിലെ വിദ്യാർഥികൾക്കിടയിൽ രോഗബാധ റിപ്പോർട്ട് ചെയ്തതിനെത്തുടർന്നാണ് ഈ മുൻകരുതൽ നടപടി സ്വീകരിച്ചിരിക്കുന്നത്.

ഈ മാസം 25 മുതൽ മാർച്ച് 3 വരെയാണ് കോളേജിന് അവധി പ്രഖ്യാപിച്ചിരിക്കുന്നത്. ഈ കാലയളവിൽ റെഗുലർ ക്ലാസുകളോ മറ്റ് അക്കാദമിക് പ്രവർത്തനങ്ങളോ ഉണ്ടായിരിക്കില്ല. രോഗവ്യാപനം തടയുന്നതിന്റെ ഭാഗമായാണ് ക്ലാസുകൾ താൽക്കാലികമായി നിർത്തിവെച്ചിരിക്കുന്നത്. അവധി മൂലം നഷ്ടപ്പെടുന്ന ക്ലാസുകൾ പിന്നീട് പുനഃക്രമീകരിച്ച് നൽകുമെന്ന് കോളേജ് അധികൃതർ അറിയിച്ചു.

ചിക്കൻപോക്സ്: അറിയേണ്ട കാര്യങ്ങൾ

വേരിസെല്ല സോസ്റ്റർ എന്ന വൈറസ് മൂലമുണ്ടാകുന്ന അതിവേഗം പകരുന്ന ഒരു രോഗമാണ് ചിക്കൻപോക്സ്. പ്രധാനമായും വായുവിലൂടെയും രോഗബാധിതനായ വ്യക്തിയുടെ സ്പർശനത്തിലൂടെയുമാണ് ഇത് പകരുന്നത്.

പനി, കഠിനമായ ശരീരവേദന, തളർച്ച എന്നിവയോടെ തുടങ്ങി, പിന്നീട് ശരീരത്തിൽ ചുവന്ന തടിപ്പുകളും ദ്രാവകം നിറഞ്ഞ കുമിളകളും പ്രത്യക്ഷപ്പെടുന്നതാണ് ഇതിന്റെ പ്രധാന ലക്ഷണം. കുമിളകൾ ഉണങ്ങി പൊറ്റയാകുന്നത് വരെ രോഗിയിൽ നിന്ന് മറ്റുള്ളവരിലേക്ക് വൈറസ് പകരാൻ സാധ്യതയുണ്ട്.

**പ്രധാന ലക്ഷണങ്ങൾ**

കഠിനമായ പനിയും തലവേദനയും.

ശരീരത്തിൽ ചൊറിച്ചിലുള്ള ചുവന്ന കുമിളകൾ.

വിശപ്പില്ലായ്മയും അമിതമായ ക്ഷീണവും.

**ശ്രദ്ധിക്കേണ്ട കാര്യങ്ങൾ**

രോഗിയെ പ്രത്യേക മുറിയിൽ താമസിപ്പിക്കുക .

ധാരാളം പഴവർഗ്ഗങ്ങളും ദ്രവരൂപത്തിലുള്ള ഭക്ഷണങ്ങളും നൽകുക.

കുമിളകൾ പൊട്ടിക്കാതിരിക്കാൻ ശ്രദ്ധിക്കുക (ഇത് പാടുകൾ വരാൻ കാരണമാകും).

ലക്ഷണങ്ങൾ കണ്ടാലുടൻ സ്വയം ചികിത്സ ഒഴിവാക്കി ഡോക്ടറെ സമീപിക്കുക.

### Related Links & Sources
- [Original Story Source](https://truevisionnews.com/news/344055/chickenpox-thiruvananthapuram-university-college-to-be-closed-for-a-week)