---
title: "മഴപ്പേടി ഒഴിയുന്നു; അഹമ്മദാബാദിൽ ഇന്ന് ഇന്ത്യ-ദക്ഷിണാഫ്രിക്ക സൂപ്പർ 8 പോരാട്ടം; അഭിഷേകിന് അഗ്നിപരീക്ഷ"
english_title: "India-South Africa Super 8 clash in Ahmedabad today"
publisher: "truevisionnews.com"
canonical_url: "https://truevisionnews.com/news/343462/india-south-africa-super-8-clash-in-ahmedabad-today"
published_at: "2026-02-22T09:23:00+05:30"
category: "Sports"
language: "ml"
image: "https://cf.zdn.im/img/truevisionnews.com/0/image-uploads/699a7dfed5d09_tru2.jpg"
keywords: []
---

# മഴപ്പേടി ഒഴിയുന്നു; അഹമ്മദാബാദിൽ ഇന്ന് ഇന്ത്യ-ദക്ഷിണാഫ്രിക്ക സൂപ്പർ 8 പോരാട്ടം; അഭിഷേകിന് അഗ്നിപരീക്ഷ

> **Lead Summary:** **അഹമ്മദാബാദ്: [[truevisionnews.com]] **അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ ഇന്ന് നടക്കാനിരിക്കുന്ന ഇന്ത്യ-ദക്ഷിണാഫ്രിക്ക സൂപ്പർ 8 പോരാട്ടം ക്രിക്കറ്റ് പ്രേമികൾ ഉറ്റുനോക്കുമ്പോൾ, ഏവരുടെയും കണ്ണുകൾ ആകാശത്തേക്കാണ്.

## Article Content

**അഹമ്മദാബാദ്: [[truevisionnews.com]] **അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ ഇന്ന് നടക്കാനിരിക്കുന്ന ഇന്ത്യ-ദക്ഷിണാഫ്രിക്ക സൂപ്പർ 8 പോരാട്ടം ക്രിക്കറ്റ് പ്രേമികൾ ഉറ്റുനോക്കുമ്പോൾ, ഏവരുടെയും കണ്ണുകൾ ആകാശത്തേക്കാണ്.

കഴിഞ്ഞ ദിവസം കൊളംബോയിൽ നടന്ന ന്യൂസിലൻഡ്-പാകിസ്ഥാൻ മത്സരം മഴമൂലം ഉപേക്ഷിക്കേണ്ടി വന്നത് ആരാധകരിൽ ആശങ്കയുണ്ടാക്കിയെങ്കിലും, അഹമ്മദാബാദിൽ നിന്ന് വരുന്നത് ശുഭവാർത്തകളാണ്.

മത്സരസമയത്തോ അതിന് മുന്നോടിയായോ മഴ പെയ്യാൻ സാധ്യതയില്ലെന്നും 24 മുതൽ 29 ഡിഗ്രി സെൽഷ്യസ് വരെയായിരിക്കും താപനിലയെന്നും കാലാവസ്ഥാ പ്രവചനങ്ങൾ സൂചിപ്പിക്കുന്നു. എങ്കിലും അന്തരീക്ഷത്തിലെ ഈർപ്പം രാത്രിയിൽ പന്തെറിയുന്ന ബൗളർമാർക്ക് നേരിയ വെല്ലുവിളി ഉയർത്തിയേക്കാം.

സൂപ്പർ 8 ഘട്ടത്തിൽ ഓരോ ടീമിനും മൂന്ന് മത്സരങ്ങൾ മാത്രമാണുള്ളതെന്നിരിക്കെ, പോയിന്റ് പങ്കിടുന്നത് സെമി സാധ്യതകളെ ബാധിക്കുമെന്നതിനാൽ ഇന്നത്തെ മത്സരഫലം ഇരുടീമുകൾക്കും നിർണ്ണായകമാണ്.

ഗ്രൂപ്പ് ഘട്ടത്തിൽ പാകിസ്ഥാനെയും യുഎസ്എയെയും അടക്കം പരാജയപ്പെടുത്തി മികച്ച ഫോമിലുള്ള സൂര്യകുമാർ യാദവും സംഘവും ആത്മവിശ്വാസത്തോടെയാണ് ദക്ഷിണാഫ്രിക്കയെ നേരിടുന്നത്. കഴിഞ്ഞ വർഷം ദക്ഷിണാഫ്രിക്കയെ അവരുടെ നാട്ടിൽ പോയി തകർത്ത ചരിത്രവും ഇന്ത്യയ്ക്ക് കരുത്താകും.

ഇഷാൻ കിഷന്റെ തകർപ്പൻ ഫോം ഇന്ത്യയ്ക്ക് കരുത്താകുമ്പോൾ, തുടർച്ചയായി പരാജയപ്പെടുന്ന യുവതാരം അഭിഷേക് ശർമ്മയ്ക്ക് ഇന്ന് തന്റെ സ്ഥാനം നിലനിർത്താൻ തിളങ്ങിയേ തീരൂ. സഞ്ജു സാംസൺ പകരക്കാരനായി പുറത്തിരിക്കുന്നത് അഭിഷേകിന് മേൽ വലിയ സമ്മർദ്ദമുണ്ടാക്കുന്നുണ്ട്.

മറുഭാഗത്ത്, കഴിഞ്ഞ ലോകകപ്പിലെ റണ്ണറപ്പുകളായ ദക്ഷിണാഫ്രിക്ക ശക്തമായ തിരിച്ചുവരവിനുള്ള തയ്യാറെടുപ്പിലാണ്. ക്വിന്റൺ ഡി കോക്ക്, എയ്ഡൻ മാർക്രം എന്നിവർ നൽകുന്ന തുടക്കത്തിന് ശേഷം ഡേവിഡ് മില്ലറും യുവതാരങ്ങളായ ഡെവാൾഡ് ബ്രെവിസ്, ട്രിസ്റ്റൻ സ്റ്റബ്സ് എന്നിവരും തകർത്തടിക്കുമെന്നാണ് പ്രോട്ടീസിന്റെ പ്രതീക്ഷ.

മഴ വില്ലനാകാത്ത ഒരു ആവേശപ്പോരാട്ടത്തിനാണ് അഹമ്മദാബാദ് ഇന്ന് സാക്ഷ്യം വഹിക്കാൻ ഒരുങ്ങുന്നത്.

### Related Links & Sources
- [Original Story Source](https://truevisionnews.com/news/343462/india-south-africa-super-8-clash-in-ahmedabad-today)