---
title: "അഞ്ചുവർഷം വയറ്റിൽ കത്രികയുമായി വീട്ടമ്മ; വണ്ടാനം മെഡിക്കല്‍ കോളജ് ആശുപത്രിയിലെ ശസ്ത്രക്രിയയ്ക്കിടെ കുടുങ്ങിയതെന്ന് ആരോപണം"
english_title: "Housewife carries scissors in her stomach for five years"
publisher: "truevisionnews.com"
canonical_url: "https://truevisionnews.com/news/342997/housewife-carries-scissors-in-her-stomach-for-five-years"
published_at: "2026-02-19T22:34:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6997434270346_21.jpg"
keywords: []
---

# അഞ്ചുവർഷം വയറ്റിൽ കത്രികയുമായി വീട്ടമ്മ; വണ്ടാനം മെഡിക്കല്‍ കോളജ് ആശുപത്രിയിലെ ശസ്ത്രക്രിയയ്ക്കിടെ കുടുങ്ങിയതെന്ന് ആരോപണം

> **Lead Summary:** ആലപ്പുഴ പുന്നപ്ര സ്വദേശിയായ ഉഷ ജോസഫിന്റെ വയറ്റിൽ ശസ്ത്രക്രിയയ്ക്കിടെ കത്രിക കുടുങ്ങിയ നിലയിൽ കണ്ടെത്തിയത് നടുക്കുന്ന വാർത്തയായിരിക്കുകയാണ്.

## Article Content

ആലപ്പുഴ പുന്നപ്ര സ്വദേശിയായ ഉഷ ജോസഫിന്റെ വയറ്റിൽ ശസ്ത്രക്രിയയ്ക്കിടെ കത്രിക കുടുങ്ങിയ നിലയിൽ കണ്ടെത്തിയത് നടുക്കുന്ന വാർത്തയായിരിക്കുകയാണ്.

അഞ്ച് വർഷം മുൻപ് വണ്ടാനം മെഡിക്കൽ കോളേജിൽ നടത്തിയ ശസ്ത്രക്രിയയ്ക്ക് ശേഷമാണ് ഈ ഗുരുതരമായ പിഴവ് സംഭവിച്ചതെന്നാണ് സംശയിക്കുന്നത്. ശസ്ത്രക്രിയ കഴിഞ്ഞ കാലം മുതൽ വിട്ടുമാറാത്ത വയറുവേദന ഉഷയെ അലട്ടിയിരുന്നെങ്കിലും, പരിശോധിച്ച ഡോക്ടർമാർ അത് മൂത്രത്തിൽ കല്ലാണെന്ന് പറഞ്ഞ് മരുന്ന് നൽകി മടക്കി അയക്കുകയായിരുന്നു. അഞ്ചുവർഷത്തോളം കഠിനമായ ശാരീരിക വേദന സഹിച്ചാണ് ഇവർ കഴിഞ്ഞുകൂടിയത്.

കഴിഞ്ഞ ദിവസം നടത്തിയ എക്സ്റേ പരിശോധനയിലാണ് വയറ്റിനുള്ളിൽ കത്രികയുള്ള കാര്യം വ്യക്തമായത്. 2021-ൽ വയറ്റിലെ മുഴ നീക്കം ചെയ്യാൻ നടത്തിയ ശസ്ത്രക്രിയയ്ക്കിടെയാവാം ഇത് സംഭവിച്ചതെന്ന് ഉഷ പറയുന്നു.

വണ്ടാനം മെഡിക്കൽ കോളേജിലെ പരിശോധനയിൽ ഈ പിഴവ് കണ്ടെത്താൻ കഴിഞ്ഞില്ലെന്നത് വീഴ്ചയുടെ ആഴം വർദ്ധിപ്പിക്കുന്നു. നിലവിൽ എക്സ്റേ ഫലവുമായി ഉഷ ആശുപത്രി അധികൃതരെ സമീപിച്ചിട്ടുണ്ട്. വരും ദിവസങ്ങളിൽ ശസ്ത്രക്രിയയിലൂടെ കത്രിക പുറത്തെടുക്കാമെന്ന് ആശുപത്രി അധികൃതർ അറിയിച്ചിട്ടുണ്ടെങ്കിലും, ഈ നീതികേടിനെതിരെ വ്യാപകമായ പ്രതിഷേധമാണ് ഉയരുന്നത്.

### Related Links & Sources
- [Original Story Source](https://truevisionnews.com/news/342997/housewife-carries-scissors-in-her-stomach-for-five-years)