---
title: "ധ്രുവദീപ്തിയുടെ രഹസ്യങ്ങൾ തേടി നാസ; അറോറകളെ 'സിടി സ്കാൻ' ചെയ്യാൻ റോക്കറ്റ് ദൗത്യം"
english_title: "Rocket mission to 'CT scan' auroras"
publisher: "truevisionnews.com"
canonical_url: "https://truevisionnews.com/news/341428/rocket-mission-to-ct-scan-auroras"
published_at: "2026-02-11T15:36:00+05:30"
category: "Tech-Info"
language: "ml"
image: "https://cf.zdn.im/img/truevisionnews.com/0/image-uploads/698c54db4186e_tech.jpg"
keywords: []
---

# ധ്രുവദീപ്തിയുടെ രഹസ്യങ്ങൾ തേടി നാസ; അറോറകളെ 'സിടി സ്കാൻ' ചെയ്യാൻ റോക്കറ്റ് ദൗത്യം

> **Lead Summary:** **[[truevisionnews.com] ] **ആകാശത്തെ വിസ്മയ കാഴ്ചയായ അറോറകളുടെ (ധ്രുവദീപ്തി) ഉത്ഭവത്തെയും പ്രവർത്തനങ്ങളെയും കുറിച്ച് പഠിക്കാൻ അത്യാധുനിക സാങ്കേതിക വിദ്യയുമായി നാസ രംഗത്ത്.

## Article Content

**[[truevisionnews.com] ] **ആകാശത്തെ വിസ്മയ കാഴ്ചയായ അറോറകളുടെ (ധ്രുവദീപ്തി) ഉത്ഭവത്തെയും പ്രവർത്തനങ്ങളെയും കുറിച്ച് പഠിക്കാൻ അത്യാധുനിക സാങ്കേതിക വിദ്യയുമായി നാസ രംഗത്ത്.

മനുഷ്യശരീരത്തിലെ ആന്തരികാവയവങ്ങളെ നിരീക്ഷിക്കുന്ന സിടി സ്കാൻ പരിശോധനയ്ക്ക് സമാനമായി അറോറകളുടെ വൈദ്യുത ഘടനയെ ത്രിമാന തലത്തിൽ വിശകലനം ചെയ്യാനാണ് നാസയുടെ പുതിയ റോക്കറ്റ് ദൗത്യം ലക്ഷ്യമിടുന്നത്.

അലാസ്കയിലെ പോക്കർ ഫ്ലാറ്റ് റിസർച്ച് റേഞ്ചിൽ നിന്ന് വിക്ഷേപിക്കുന്ന രണ്ട് 'സൗണ്ടിംഗ് റോക്കറ്റുകൾ' ഉപയോഗിച്ചാണ് ഈ പരീക്ഷണം നടത്തുക. സൗരവാതങ്ങളിൽ നിന്നുള്ള ചാർജ്ജിത കണങ്ങൾ ഭൂമിയുടെ കാന്തിക മണ്ഡലവുമായി സമ്പർക്കത്തിൽ വരുമ്പോഴുണ്ടാകുന്ന പ്രതിഭാസമാണ് അറോറകൾ.

ഇവ രൂപപ്പെടുമ്പോഴുള്ള ഊർജ്ജ കൈമാറ്റത്തെക്കുറിച്ചും പ്ലാസ്മയുടെ ചലനത്തെക്കുറിച്ചും കൃത്യമായ വിവരങ്ങൾ ശേഖരിക്കാൻ ഈ റോക്കറ്റുകളിലെ എട്ട് ചെറിയ സെൻസറുകൾക്ക് സാധിക്കും.

പ്ലാസ്മയിലൂടെ റേഡിയോ സിഗ്നലുകൾ കടത്തിവിട്ട് അവയിലുണ്ടാകുന്ന മാറ്റങ്ങൾ നിരീക്ഷിച്ചാണ് അറോറകളുടെ ഒരു 'ഇലക്ട്രിക്കൽ മാപ്പ്' ശാസ്ത്രജ്ഞർ തയ്യാറാക്കുന്നത്. ഭാരം കുറഞ്ഞതും എന്നാൽ അതീവ കൃത്യതയുള്ളതുമായ പ്ലാസ്മ സെൻസറുകളും റേഡിയോ ട്രാൻസ്മിറ്ററുകളുമാണ് ഈ ചെറു റോക്കറ്റുകളിൽ ഘടിപ്പിച്ചിരിക്കുന്നത്.

ഭൂമിയിൽ നിന്ന് നൂറുകണക്കിന് കിലോമീറ്റർ ഉയരത്തിൽ വെച്ച് നടക്കുന്ന ഈ പഠനത്തിലൂടെ ബഹിരാകാശത്തെ വൈദ്യുത സർക്യൂട്ടുകളെക്കുറിച്ചും അറോറകൾ വ്യത്യസ്ത നിറങ്ങളിൽ പ്രത്യക്ഷപ്പെടുന്നതിന്റെ ഭൗതിക സാഹചര്യങ്ങളെക്കുറിച്ചും കൂടുതൽ വ്യക്തത ലഭിക്കുമെന്ന് ഗവേഷകർ കരുതുന്നു.

കാലാവസ്ഥാ നിരീക്ഷണത്തിനും ബഹിരാകാശ സാങ്കേതിക വിദ്യയിലെ മുന്നേറ്റങ്ങൾക്കും ഈ കണ്ടെത്തലുകൾ നിർണ്ണായകമാകും.

### Related Links & Sources
- [Original Story Source](https://truevisionnews.com/news/341428/rocket-mission-to-ct-scan-auroras)