---
title: "നൊസ്റ്റാൾജിയ ഉണർത്തും ആ പഴയ രുചി; ചുട്ടരച്ച ചമ്മന്തി തയ്യാറാക്കാം മിനിറ്റുകൾക്കുള്ളിൽ"
english_title: "Baked chammanti can be prepared in minutes."
publisher: "truevisionnews.com"
canonical_url: "https://truevisionnews.com/news/340822/baked-chammanti-can-be-prepared-in-minutes"
published_at: "2026-02-07T23:40:00+05:30"
category: "Cookery"
language: "ml"
image: "https://cf.zdn.im/img/truevisionnews.com/0/image-uploads/698780d7ccff9_25.jpg"
keywords: []
---

# നൊസ്റ്റാൾജിയ ഉണർത്തും ആ പഴയ രുചി; ചുട്ടരച്ച ചമ്മന്തി തയ്യാറാക്കാം മിനിറ്റുകൾക്കുള്ളിൽ

> **Lead Summary:** **നൊ**സ്റ്റാൾജിയ ഉണർത്തുന്ന മണവും രുചിയുമാണ് ചുട്ടരച്ച തേങ്ങാ ചമ്മന്തിയുടെ പ്രത്യേകത. തേങ്ങയും മുളകും തീയിൽ നേരിട്ട് ചുട്ടെടുക്കുന്നതിനാൽ സാധാരണ ചമ്മന്തിയേക്കാൾ ഇരട്ടി രുചി ഇതിന് ലഭിക്കുന്നു. കഞ്ഞിക്കും ചോറിനും ഒപ്പം കഴിക്കാൻ ഒരു ചുട്ടരച്ച ചമ്മന്തി ഉണ്ടാക്കിയാലോ.....

## Article Content

**നൊ**സ്റ്റാൾജിയ ഉണർത്തുന്ന മണവും രുചിയുമാണ് ചുട്ടരച്ച തേങ്ങാ ചമ്മന്തിയുടെ പ്രത്യേകത. തേങ്ങയും മുളകും തീയിൽ നേരിട്ട് ചുട്ടെടുക്കുന്നതിനാൽ സാധാരണ ചമ്മന്തിയേക്കാൾ ഇരട്ടി രുചി ഇതിന് ലഭിക്കുന്നു. കഞ്ഞിക്കും ചോറിനും ഒപ്പം കഴിക്കാൻ ഒരു ചുട്ടരച്ച ചമ്മന്തി ഉണ്ടാക്കിയാലോ.....

**ആവശ്യമായ ചേരുവകൾ**

തേങ്ങ: 1/2

വറ്റൽ മുളക്: 5 എണ്ണം

ചെറിയ ഉള്ളി: 4 എണ്ണം

ഇഞ്ചി: ഒരു ചെറിയ കഷ്ണം

പുളി: ഒരു ചെറിയ നെല്ലിക്ക വലുപ്പത്തിൽ

ഉപ്പ്: പാകത്തിന്

വെളിച്ചെണ്ണ: ഒരു ടീസ്പൂൺ

കറിവേപ്പില: ഒരു തണ്ട്

**തയ്യാറാക്കുന്ന വിധം**

ആദ്യം ഒരു വലിയ തേങ്ങാക്കഷ്ണം ഈർക്കിലിലോ ഫോർക്കിലോ കുത്തി അടുപ്പിലെ നേരിട്ടുള്ള തീയിൽ കാണിച്ച് എല്ലാ വശവും കറുത്ത നിറമാകുന്നതുവരെ നന്നായി ചുട്ടെടുക്കുക. ഇതേപോലെ തന്നെ വറ്റൽ മുളകും കരിഞ്ഞുപോകാതെ തീയിൽ വാട്ടി എടുക്കണം.

ചുട്ടെടുത്ത തേങ്ങയുടെ പുറത്തുള്ള കരിഞ്ഞ ഭാഗം ഒരു കത്തി ഉപയോഗിച്ച് ചുരണ്ടി മാറ്റിയ ശേഷം ചെറിയ കഷ്ണങ്ങളായി മുറിക്കുക. തുടർന്ന് മിക്സിയുടെ ചെറിയ ജാറിലേക്ക് ഈ തേങ്ങാക്കഷ്ണങ്ങൾ, ചുട്ട മുളക്, ചെറിയ ഉള്ളി, ഇഞ്ചി, പുളി, ഉപ്പ്, കറിവേപ്പില എന്നിവ ചേർക്കുക.

വെള്ളം ഒട്ടും ചേർക്കാതെ വേണം ഇത് അരച്ചെടുക്കാൻ. മിക്സിയിൽ പൾസ് മോഡിൽ ഒന്നോ രണ്ടോ തവണ അടിച്ച് തരിതരിപ്പായി അരച്ചെടുക്കുന്നതാണ് ഇതിന്റെ അസ്സൽ രുചി. അരഞ്ഞു കഴിഞ്ഞാൽ ഒരു പാത്രത്തിലേക്ക് മാറ്റി അല്പം പച്ച വെളിച്ചെണ്ണ കൂടി ഒഴിച്ച് നന്നായി കുഴച്ചെടുത്താൽ സ്വാദിഷ്ടമായ ചുട്ടരച്ച ചമ്മന്തി തയ്യാർ.

### Related Links & Sources
- [Original Story Source](https://truevisionnews.com/news/340822/baked-chammanti-can-be-prepared-in-minutes)