---
title: "സമുദ്രനിരപ്പിൽ നിന്ന് 1450 മീറ്റർ ഉയരത്തിൽ ഒരു സ്വർഗ്ഗം; പച്ചപുതച്ച പാതകളിലൂടെ വട്ടവടയിലേക്ക് ഒരു സ്വപ്നയാത്ര!"
english_title: "A trip to Vattavada"
publisher: "truevisionnews.com"
canonical_url: "https://truevisionnews.com/news/340339/a-trip-to-vattavada"
published_at: "2026-02-05T16:34:00+05:30"
category: "Travel"
language: "ml"
image: "https://cf.zdn.im/img/truevisionnews.com/0/image-uploads/69847989c769f_TRAVEL.jpg"
keywords: []
---

# സമുദ്രനിരപ്പിൽ നിന്ന് 1450 മീറ്റർ ഉയരത്തിൽ ഒരു സ്വർഗ്ഗം; പച്ചപുതച്ച പാതകളിലൂടെ വട്ടവടയിലേക്ക് ഒരു സ്വപ്നയാത്ര!

> **Lead Summary:** കോടമഞ്ഞും തേയിലത്തോട്ടങ്ങളും താണ്ടി എത്തുന്ന സഞ്ചാരികളെ കാത്തിരിക്കുന്നത് പച്ചപ്പിന്റെയും കുളിരിന്റെയും മറ്റൊരു ലോകമാണ്. മൂന്നാറിൽ നിന്നും 44 കിലോമീറ്റർ അകലെയുള്ള കാർഷിക ഗ്രാമമായ വട്ടവട ഇന്ന് വിനോദസഞ്ചാരികളുടെ പ്രിയപ്പെട്ട കേന്ദ്രമായി മാറിക്കഴിഞ്ഞു.

## Article Content

കോടമഞ്ഞും തേയിലത്തോട്ടങ്ങളും താണ്ടി എത്തുന്ന സഞ്ചാരികളെ കാത്തിരിക്കുന്നത് പച്ചപ്പിന്റെയും കുളിരിന്റെയും മറ്റൊരു ലോകമാണ്. മൂന്നാറിൽ നിന്നും 44 കിലോമീറ്റർ അകലെയുള്ള കാർഷിക ഗ്രാമമായ വട്ടവട ഇന്ന് വിനോദസഞ്ചാരികളുടെ പ്രിയപ്പെട്ട കേന്ദ്രമായി മാറിക്കഴിഞ്ഞു.

ഡിസംബർ മുതൽ ഫെബ്രുവരി വരെയുള്ള ശീതകാല സീസണിനായി വട്ടവടയിലെ ഗ്രാമവാസികൾ ഇപ്പോൾ തയ്യാറെടുപ്പിലാണ്. സമുദ്രനിരപ്പിൽ നിന്നും 1450 മീറ്റർ ഉയരത്തിൽ സ്ഥിതി ചെയ്യുന്ന ഈ പ്രദേശം തണുപ്പിന്റെ കാര്യത്തിൽ പലപ്പോഴും മൂന്നാറിനെപ്പോലും വെല്ലുന്ന കാഴ്ചയാണ് സമ്മാനിക്കുന്നത്.

തേയിലത്തോട്ടങ്ങൾക്കിടയിലൂടെയുള്ള പാതയിലൂടെ ആരംഭിക്കുന്ന യാത്രയിൽ ഫോട്ടോ പോയിന്റ്, മാട്ടുപ്പെട്ടി ഡാം, എക്കോ പോയിന്റ്, കുണ്ടള തടാകം തുടങ്ങിയ വിനോദസഞ്ചാര കേന്ദ്രങ്ങൾ പിന്നിട്ടാണ് സഞ്ചാരികൾ വട്ടവടയിലേക്ക് പ്രവേശിക്കുന്നത്.

പിന്നീട് വന്യമൃഗങ്ങളുടെ സാന്നിധ്യമുള്ള പാമ്പാടും ഷോല നാഷണൽ പാർക്കിന്റെ ഹൃദയത്തിലൂടെയുള്ള അഞ്ച് കിലോമീറ്റർ യാത്ര സഞ്ചാരികൾക്ക് അവിസ്മരണീയമായ അനുഭവമാണ് നൽകുക. പശ്ചിമഘട്ടത്തിലെ പഴനി മലനിരകളോട് ചേർന്ന് കിടക്കുന്ന ഈ അതിർത്തി ഗ്രാമത്തിൽ മലയാളത്തോടൊപ്പം തന്നെ തമിഴും സംസാരഭാഷയായി നിലനിൽക്കുന്നു.

തട്ടുതട്ടുകളായുള്ള കൃഷിരീതിയാണ് വട്ടവടയുടെ പ്രധാന ആകർഷണം. പച്ചക്കറികളും പഴവർഗ്ഗങ്ങളും സമൃദ്ധമായി വിളയുന്ന ഇവിടെ ഓരോ സീസണിലും കൃഷിയിടങ്ങൾ പുതിയ ഭാവം കൈക്കൊള്ളുന്നു. 12.27 ചതുരശ്ര മൈൽ വിസ്തൃതിയുള്ള ഈ ഗ്രാമത്തിൽ 901 കുടുംബങ്ങളിലായി ഏകദേശം മൂവായിരത്തോളം ആളുകളാണ് താമസിക്കുന്നത്.

കൃഷിയിടങ്ങൾക്ക് നടുവിലൂടെയുള്ള ചെറിയ റോഡുകളും ലളിതമായ വീടുകളും വട്ടവടയുടെ ഗ്രാമീണ ഭംഗി വർദ്ധിപ്പിക്കുന്നു.വിനോദസഞ്ചാരികൾക്കായി ഇവിടെ നിരവധി കാഴ്ചകളുണ്ട്. വട്ടവട ഗ്രാമത്തെ പൂർണ്ണമായും കാണാൻ കഴിയുന്ന വ്യൂ പോയിന്റും എട്ട് കിലോമീറ്റർ അകലെ പച്ചപ്പിന് നടുവിൽ സ്ഥിതി ചെയ്യുന്ന ചിലന്തിയാർ വെള്ളച്ചാട്ടവും സഞ്ചാരികൾ ഒഴിവാക്കാൻ പാടില്ലാത്ത ഇടങ്ങളാണ്.

കൂടാതെ, ഇന്ത്യയിലെ ആദ്യത്തെ 'ഹണി മ്യൂസിയം' വട്ടവട ടൗണിനോട് ചേർന്ന് പ്രവർത്തിക്കുന്നുണ്ട്. മൂന്നാറിലെ തിരക്കുകളിൽ നിന്ന് ഒഴിഞ്ഞ് പ്രകൃതിയുടെ ശാന്തത ആസ്വദിക്കാൻ ആഗ്രഹിക്കുന്നവർക്ക് വട്ടവട യാത്ര ഒരു മികച്ച അനുഭവമായിരിക്കും.

### Related Links & Sources
- [Original Story Source](https://truevisionnews.com/news/340339/a-trip-to-vattavada)