---
title: "ഗ്യാസ് ട്രബിൾ വിട്ടുമാറുന്നില്ലേ? പരിഹാരം ഭക്ഷണത്തിലല്ല, നിങ്ങളുടെ ശീലങ്ങളിലാണ്!"
english_title: "The solution to gas problems lies in your habits."
publisher: "truevisionnews.com"
canonical_url: "https://truevisionnews.com/news/337154/the-solution-to-gas-problems-lies-in-your-habits"
published_at: "2026-01-19T16:35:00+05:30"
category: "Health"
language: "ml"
image: "https://cf.zdn.im/img/truevisionnews.com/0/image-uploads/696e1007c81df_tru7.jpg"
keywords: []
---

# ഗ്യാസ് ട്രബിൾ വിട്ടുമാറുന്നില്ലേ? പരിഹാരം ഭക്ഷണത്തിലല്ല, നിങ്ങളുടെ ശീലങ്ങളിലാണ്!

> **Lead Summary:** **[[truevisionnews.com]] **എന്ത് കഴിച്ചാലും വയർ വീർക്കുന്നതും ഗ്യാസ് നിറയുന്നതും ഇന്ന് പലരെയും അലട്ടുന്ന പ്രശ്നമാണ്. ഇതിന് ഭക്ഷണത്തെ പഴി പറയുന്നതിന് മുൻപ് നമ്മൾ ഭക്ഷണം കഴിക്കുന്ന രീതി ഒന്ന് ശ്രദ്ധിക്കുന്നത് നന്നായിരിക്കും. ശരിയായ ദഹനം നടക്കാത്തതാണ് പലപ്പോഴും വില്ലനാകുന്നത്.

## Article Content

**[[truevisionnews.com]] **എന്ത് കഴിച്ചാലും വയർ വീർക്കുന്നതും ഗ്യാസ് നിറയുന്നതും ഇന്ന് പലരെയും അലട്ടുന്ന പ്രശ്നമാണ്. ഇതിന് ഭക്ഷണത്തെ പഴി പറയുന്നതിന് മുൻപ് നമ്മൾ ഭക്ഷണം കഴിക്കുന്ന രീതി ഒന്ന് ശ്രദ്ധിക്കുന്നത് നന്നായിരിക്കും. ശരിയായ ദഹനം നടക്കാത്തതാണ് പലപ്പോഴും വില്ലനാകുന്നത്.

ഈ അസ്വസ്ഥതകൾ ഒഴിവാക്കാൻ സഹായിക്കുന്ന അഞ്ച് ലളിതമായ വഴികൾ താഴെ പറയുന്നവയാണ്:

*1. ഭക്ഷണം കഴിഞ്ഞാൽ ഉടൻ കിടക്കരുത്*

ഭക്ഷണം കഴിഞ്ഞ് ഉടൻ തന്നെ ഇരിക്കുകയോ കിടക്കുകയോ ചെയ്യുന്നത് ദഹന പ്രക്രിയയെ മന്ദഗതിയിലാക്കും. പകരം ഒരു 10-15 മിനിറ്റ് വീടിനുള്ളിലോ മുറ്റത്തോ സാവധാനം നടക്കുന്നത് വയറ്റിലെ വായു എളുപ്പത്തിൽ നീങ്ങാനും ദഹനം വേഗത്തിലാക്കാനും സഹായിക്കും.

*2. നട്ടെല്ല് നിവർത്തി ഇരുന്നു കഴിക്കാം*

ടിവിക്ക് മുന്നിലോ മൊബൈലിലോ നോക്കി കുനിഞ്ഞിരുന്ന് ഭക്ഷണം കഴിക്കുന്ന രീതി ഒഴിവാക്കുക. നട്ടെല്ല് നിവർത്തി ഇരുന്നാൽ മാത്രമേ ദഹനനാളത്തിലൂടെ ഭക്ഷണം സുഗമമായി സഞ്ചരിക്കുകയുള്ളൂ. ഇത് ഗ്യാസ് ഉണ്ടാകാനുള്ള സാധ്യത കുറയ്ക്കുന്നു.

*3. വെള്ളം കുടിക്കുന്നതിൽ നിയന്ത്രണം*

ഭക്ഷണത്തിനൊപ്പം ധാരാളം വെള്ളം കുടിക്കുന്നത് ദഹനരസങ്ങളുടെ വീര്യം കുറയ്ക്കും. ഭക്ഷണം കഴിക്കുന്നതിന് അര മണിക്കൂർ മുൻപോ അല്ലെങ്കിൽ കഴിഞ്ഞ് അര മണിക്കൂർ ശേഷമോ വെള്ളം കുടിക്കുന്നതാണ് ഉത്തമം. ഇടയിൽ നിർബന്ധമാണെങ്കിൽ അല്പം ഇളം ചൂടുവെള്ളം മാത്രം കുടിക്കുക.

*4. നന്നായി ചവച്ചരച്ച് കഴിക്കാം*

തിരക്ക് പിടിച്ച് ആഹാരം കഴിക്കുമ്പോൾ വായുവും ഭക്ഷണത്തോടൊപ്പം ഉള്ളിലേക്ക് കടക്കും. ഇത് പിന്നീട് ഗ്യാസായി മാറും. ഓരോ ഉരുളയും നന്നായി ചവച്ചരച്ച് സാവധാനം കഴിക്കുന്നത് ഉമിനീർ ഭക്ഷണവുമായി കലരാനും ദഹനം സുഗമമാക്കാനും സഹായിക്കും.

*5. രാത്രിയിലെ ഭക്ഷണം ലഘുവാക്കുക*

രാത്രിയിൽ നമ്മുടെ ദഹനവ്യവസ്ഥയുടെ വേഗത കുറവായിരിക്കും. അതിനാൽ അമിതമായി ഭക്ഷണം കഴിക്കുന്നത് ഒഴിവാക്കണം. ലഘുഭക്ഷണം ശീലിക്കുന്നത് വഴി രാവിലെ ഉണരുമ്പോഴുള്ള വയറിലെ അസ്വസ്ഥതകൾ പൂർണ്ണമായും ഒഴിവാക്കാം.

### Related Links & Sources
- [Original Story Source](https://truevisionnews.com/news/337154/the-solution-to-gas-problems-lies-in-your-habits)