---
title: "തദ്ദേശീയ എഐ വികസിപ്പിക്കാൻ ആഹ്വാനം ചെയ്ത് പ്രധാനമന്ത്രി; സാമ്പത്തിക സുരക്ഷയ്ക്ക് സ്വന്തം സാങ്കേതികവിദ്യ അനിവാര്യമെന്ന് മോദി"
english_title: "Modi calls for development of AI"
publisher: "truevisionnews.com"
canonical_url: "https://truevisionnews.com/news/337125/modi-calls-for-development-of-ai"
published_at: "2026-01-19T14:22:00+05:30"
category: "Tech-Info"
language: "ml"
image: "https://cf.zdn.im/img/truevisionnews.com/0/image-uploads/696df12c97ced_tru1.jpg"
keywords: []
---

# തദ്ദേശീയ എഐ വികസിപ്പിക്കാൻ ആഹ്വാനം ചെയ്ത് പ്രധാനമന്ത്രി; സാമ്പത്തിക സുരക്ഷയ്ക്ക് സ്വന്തം സാങ്കേതികവിദ്യ അനിവാര്യമെന്ന് മോദി

> **Lead Summary:** **[[truevisionnews.com] ] **ഇന്ത്യയുടെ സാമ്പത്തികവും തന്ത്രപരവുമായ താൽപ്പര്യങ്ങൾ സംരക്ഷിക്കാൻ തദ്ദേശീയമായ നിർമ്മിത ബുദ്ധി വികസിപ്പിക്കണമെന്ന് ഗവേഷകർക്കും സ്‌റ്റാർട്ടപ്പുകൾക്കും ആഹ്വാനം നൽകി പ്രധാനമന്ത്രി നരേന്ദ്ര മോദി.

## Article Content

**[[truevisionnews.com] ] **ഇന്ത്യയുടെ സാമ്പത്തികവും തന്ത്രപരവുമായ താൽപ്പര്യങ്ങൾ സംരക്ഷിക്കാൻ തദ്ദേശീയമായ നിർമ്മിത ബുദ്ധി വികസിപ്പിക്കണമെന്ന് ഗവേഷകർക്കും സ്‌റ്റാർട്ടപ്പുകൾക്കും ആഹ്വാനം നൽകി പ്രധാനമന്ത്രി നരേന്ദ്ര മോദി.

രാജ്യത്തിന്റെ സാമ്പത്തിക സുരക്ഷയ്ക്കും സ്വാശ്രയത്വത്തിനും സ്വന്തമായി എഐ സാങ്കേതികവിദ്യ ഉണ്ടാകേണ്ടത് അനിവാര്യമാണെന്ന് അദ്ദേഹം പറഞ്ഞു. ഇന്ത്യഎഐ മിഷൻ സംഘടിപ്പിച്ച ചടങ്ങിൽ സംസാരിക്കുകയായിരുന്നു പ്രധാനമന്ത്രി.

എഐ വികസനത്തിന് അത്യാവശ്യമായ ഗ്രാഫിക്സ് പ്രോസസിങ് യൂണിറ്റുകളുടെ എണ്ണത്തിൽ ഇന്ത്യ വലിയ മുന്നേറ്റം നടത്തിയതായി പ്രധാനമന്ത്രി വെളിപ്പെടുത്തി. നിലവിൽ 38,000-ത്തിലേറെ ജിപിയു രാജ്യത്ത് സ്‌ഥാപിച്ചുകഴിഞ്ഞു.

നൂതന സാങ്കേതികവിദ്യകൾ സ്‌റ്റാർട്ടപ്പ് കമ്പനികൾക്ക് ലഭ്യമാക്കാനാണ് സർക്കാർ മുൻഗണന നൽകുന്നത്. ഇന്ത്യയിലെ സെർവറുകൾ കേന്ദ്രമാക്കി, തദ്ദേശീയരായ ഗവേഷകർ എഐ വികസിപ്പിക്കണമെന്നും അദ്ദേഹം കൂട്ടിച്ചേർത്തു.

കഴിഞ്ഞ 10 വർഷത്തിനിടെ ഇന്ത്യയിലെ സ്‌റ്റാർട്ടപ്പ് മേഖലയിലുണ്ടായ മാറ്റങ്ങൾ പ്രധാനമന്ത്രി എടുത്തുപറഞ്ഞു. സ്‌റ്റാർട്ടപ്പുകളുടെ വളർച്ച: പത്ത് വർഷം മുൻപ് 500-ൽ താഴെ സ്‌റ്റാർട്ടപ്പുകൾ ഉണ്ടായിരുന്ന സ്‌ഥാനത്ത് ഇന്ന് അവയുടെ എണ്ണം രണ്ട് ലക്ഷം കവിഞ്ഞു.

യൂണിക്കോണുകൾ: ഇന്ത്യയിലിന്ന് 125 ആക്ടീവ് യുണിക്കോണുകൾ (100 കോടി ഡോളറിന് മുകളിൽ മൂല്യമുള്ള കമ്പനികൾ) ഉണ്ട്. റെക്കോർഡ് രജിസ്ട്രേഷൻ: 2025-ൽ മാത്രം ഏകദേശം 44,000 പുതിയ സ്‌റ്റാർട്ടപ്പുകൾ രാജ്യത്ത് രജിസ്‌റ്റർ ചെയ്യപ്പെട്ടു. ഇത് ഒരു റെക്കോർഡാണ്.

മുൻപ് വലിയ ബിസിനസ് കുടുംബങ്ങളിലെ ഇളമുറക്കാർ മാത്രം സംരംഭങ്ങൾ തുടങ്ങിയിരുന്ന സ്ഥഥാനത്ത് ഇന്ന് സാധാരണക്കാരും മധ്യവർഗക്കാരുമായ യുവാക്കൾ സ്‌റ്റാർട്ടപ്പ് രംഗത്തേക്ക് കടന്നുവരുന്നത് വലിയ വിപ്ലവമാണെന്ന് മോദി അഭിപ്രായപ്പെട്ടു.

വരാനിരിക്കുന്ന കേന്ദ്ര ബജറ്റിൽ എഐ മേഖലയ്ക്കായി വൻ പ്രഖ്യാപനങ്ങൾ ഉണ്ടായേക്കുമെന്ന് വിവിധ മാധ്യമങ്ങൾ റിപ്പോർട്ട് ചെയ്യുന്നു. 2024 മാർച്ചിൽ അനുവദിച്ച 10,372 കോടി രൂപയുടെ ഇന്ത്യഎഐ മിഷൻ ഒരു തുടക്കം മാത്രമായിരുന്നു.

എഐയെ ഒരു വെറും സാങ്കേതികവിദ്യയായി കാണാതെ 'ദേശീയ ഇൻഫ്രാസ്ട്രക്‌ചർ' ആയിട്ടാണ് കേന്ദ്രം പരിഗണിക്കുന്നത്. രാജ്യാന്തര എഐ മോഡലുകൾ ഇംഗ്ലീഷ് ഭാഷയ്ക്ക് പ്രാധാന്യം നൽകുമ്പോൾ, ഇന്ത്യൻ പ്രാദേശിക ഭാഷകളിലെ ഡാറ്റാ സെറ്റുകൾ സൃഷ്ടിക്കാനും വോയിസ് കംപ്യൂട്ടിങ് വികസിപ്പിക്കാനുമുള്ള ശ്രമങ്ങൾക്ക് ബജറ്റിൽ ഫണ്ട് നീക്കിവച്ചേക്കും.

ഡാറ്റാ സെറ്റുകൾ, സ്കില്ലിംഗ് പ്രോഗ്രാമുകൾ, സുരക്ഷാ ഫ്രെയിംവർക്കുകൾ എന്നിവയ്ക്കും കൂടുതൽ പിന്തുണ ലഭിക്കാൻ സാധ്യതയുണ്ട്. 2025-ലെ ബജറ്റിൽ എഐ പദ്ധതികൾക്കായി ഏകദേശം 2,000 കോടി രൂപ മാറ്റിവച്ചിരുന്നു.

### Related Links & Sources
- [Original Story Source](https://truevisionnews.com/news/337125/modi-calls-for-development-of-ai)