---
title: "കാലുകൾ കെട്ടിയ നിലയിൽ...., ഹോട്ടൽ മുറിയിൽ യുവാവിനെ മരിച്ച നിലയിൽ കണ്ടെത്തിയ സംഭവം; ഒപ്പം മുറിയെടുത്ത രണ്ട് പേർ അറസ്റ്റിൽ"
english_title: "Young man found dead in hotel room  two people who shared the room with him arrested"
publisher: "truevisionnews.com"
canonical_url: "https://truevisionnews.com/news/327648/young-man-found-dead-in-hotel-room-two-people-who-shared-the-room-with-him-arrested"
published_at: "2025-11-24T16:10:00+05:30"
category: "Crime"
language: "ml"
image: "https://cf.zdn.im/img/truevisionnews.com/0/image-uploads/692436aabb584_crime.jpg"
keywords: []
---

# കാലുകൾ കെട്ടിയ നിലയിൽ...., ഹോട്ടൽ മുറിയിൽ യുവാവിനെ മരിച്ച നിലയിൽ കണ്ടെത്തിയ സംഭവം; ഒപ്പം മുറിയെടുത്ത രണ്ട് പേർ അറസ്റ്റിൽ

> **Lead Summary:** കസ്ബ: കൊൽക്കത്തയിലെ കസ്ബയിലുള്ള ഒരു ഹോട്ടൽ മുറിയിൽ യുവാവിനെ മരിച്ച നിലയിൽ കണ്ടെത്തിയ സംഭവത്തിൽ രണ്ട് പേരെ അറസ്റ്റ് ചെയ്തു. കഴിഞ്ഞ ശനിയാഴ്ച ഉച്ചയ്ക്ക് ഹോട്ടലിന്റെ അഞ്ചാം നിലയിലെ മുറിയിൽ വെച്ചാണ് യുവാവിൻ്റെ മൃതദേഹം കണ്ടെത്തുന്നത്.

## Article Content

കസ്ബ: കൊൽക്കത്തയിലെ കസ്ബയിലുള്ള ഒരു ഹോട്ടൽ മുറിയിൽ യുവാവിനെ മരിച്ച നിലയിൽ കണ്ടെത്തിയ സംഭവത്തിൽ രണ്ട് പേരെ അറസ്റ്റ് ചെയ്തു. കഴിഞ്ഞ ശനിയാഴ്ച ഉച്ചയ്ക്ക് ഹോട്ടലിന്റെ അഞ്ചാം നിലയിലെ മുറിയിൽ വെച്ചാണ് യുവാവിൻ്റെ മൃതദേഹം കണ്ടെത്തുന്നത്.

വെള്ളിയാഴ്ച കസ്ബയിലെ രാജ്ഡംഗ ഏരിയയിലുള്ള ഹോട്ടൽ കോൺസുലേറ്റിൽ മൂന്ന് പേർ ഒരുമിച്ച് മുറിയെടുത്തതായി പൊലീസ് അറിയിച്ചു. ഒരു സ്ത്രീയും പുരുഷനുമായിരുന്നു യുവാവിനൊപ്പം മുറിയെടുത്തത്. ഇവർ രണ്ടുപേരും രാത്രി വൈകി പുറത്തുപോയി. പിന്നീട് തിരിച്ചുവന്നില്ല. മൂന്നാമത്തെയാളെയാണ് പിന്നീട് മുറിക്കുള്ളിൽ മരിച്ച നിലയിൽ കണ്ടെത്തിയത്.

ആദർശിൻ്റെ മൂക്കിന് സമീപം രക്തമുണ്ടായിരുന്നു. കാലുകൾ കെട്ടിയ നിലയിലായിരുന്നു. കഴുത്തിൽ ഞെരിച്ചതിൻ്റെ പാടുകൾ ഉണ്ടായിരുന്നതായും പൊലീസ് വ്യക്തമാക്കി. ബിർഭൂമിലെ ദുബ്രാജ്പൂർ സ്വദേശിയായ 33-കാരനായ ആദർശ് ലോസൽകയാണ് മരിച്ചത്. ആദർശ് ലോസൽക ചാർട്ടേഡ് അക്കൗണ്ടൻ്റായിരുന്നു.

സംഭവവുമായി ബന്ധപ്പെട്ട് അറസ്റ്റിലായ സ്ത്രീയെയും പുരുഷനെയും തിങ്കളാഴ്ച കോടതിയിൽ ഹാജരാക്കി. അറസ്റ്റിലായവരും മരിച്ചയാളും തമ്മിൽ എന്തെങ്കിലും തരത്തിലുള്ള ശത്രുത ഉണ്ടായിരുന്നോ എന്ന് പൊലീസ് അന്വേഷിക്കുകയാണ്. പ്രാഥമിക പോസ്റ്റ്‌മോർട്ടം റിപ്പോർട്ട് പ്രകാരം, മരണത്തിന് മുമ്പ് ആദർശ് മദ്യപിച്ചിരുന്നതായി സൂചനയുണ്ട്.

അദ്ദേഹത്തിൻ്റെ വയറ്റിൽ ഏകദേശം 200 ഗ്രാം ഭക്ഷണത്തിൻ്റെ അംശങ്ങളും മദ്യത്തിൻ്റെ അംശങ്ങളും കണ്ടെത്തി. ഇത് വെള്ളിയാഴ്ച രാത്രി ഭക്ഷണം കഴിക്കുകയും മദ്യപിക്കുകയും ചെയ്തിരുന്നു എന്ന് സൂചിപ്പിക്കുന്നു. ശ്വാസംമുട്ടിയാണ് മരിച്ചതെന്നാണ് റിപ്പോർട്ടിലുള്ളത്. ഇതുപ്രകാരം പ്രതികൾ യുവാവിനെ കഴുത്തു ഞെരിച്ച് കൊലപ്പെടുത്തിയതായിരിക്കാം എന്ന് പൊലീസ് പറഞ്ഞു.

### Related Links & Sources
- [Original Story Source](https://truevisionnews.com/news/327648/young-man-found-dead-in-hotel-room-two-people-who-shared-the-room-with-him-arrested)