---
title: "കഷ്ടപ്പാട് കയ്യോടെ പൊക്കിയല്ലോ...! വിമാനത്താവളത്തിൽ വൻ ലഹരിവേട്ട; 6.5 കോടിയുടെ 'ഹൈബ്രിഡ്' കഞ്ചാവുമായി വയനാട് സ്വദേശി പിടിയിൽ"
english_title: "Huge drug bust at Nedumbassery airport, 'hybrid' worth Rs 6.5 crore, Wayanad native"
publisher: "truevisionnews.com"
canonical_url: "https://truevisionnews.com/news/324216/huge-drug-bust-at-nedumbassery-airport-hybrid-worth-rs-65-crore-wayanad-native"
published_at: "2025-11-04T08:20:00+05:30"
category: "Crime"
language: "ml"
image: "https://cf.zdn.im/img/truevisionnews.com/0/image-uploads/69096a1749104_nedumbassery.jpg"
keywords: []
---

# കഷ്ടപ്പാട് കയ്യോടെ പൊക്കിയല്ലോ...! വിമാനത്താവളത്തിൽ വൻ ലഹരിവേട്ട; 6.5 കോടിയുടെ 'ഹൈബ്രിഡ്' കഞ്ചാവുമായി വയനാട് സ്വദേശി പിടിയിൽ

> **Lead Summary:** **കൊച്ചി: **നെടുമ്പാശ്ശേരി വിമാനത്താവളത്തിൽ വൻ ലഹരിവേട്ട. ആറര കോടിയോളം രൂപയുടെ ഹൈബ്രിഡ് കഞ്ചാവുമായി വയനാട് സ്വദേശി അബ്ദുൽ സമദ് ആണ് പിടിയിലായത്. ബാങ്കോക്കിൽ നിന്ന് കൊച്ചിയിലേക്ക് കഞ്ചാവ് കടത്തുന്നതിനിടെയാണ് ഇയാളെ കസ്റ്റംസ് പിടികൂടിയത്.

## Article Content

**കൊച്ചി: **നെടുമ്പാശ്ശേരി വിമാനത്താവളത്തിൽ വൻ ലഹരിവേട്ട. ആറര കോടിയോളം രൂപയുടെ ഹൈബ്രിഡ് കഞ്ചാവുമായി വയനാട് സ്വദേശി അബ്ദുൽ സമദ് ആണ് പിടിയിലായത്. ബാങ്കോക്കിൽ നിന്ന് കൊച്ചിയിലേക്ക് കഞ്ചാവ് കടത്തുന്നതിനിടെയാണ് ഇയാളെ കസ്റ്റംസ് പിടികൂടിയത്.

ഇന്ന് പുലര്‍ച്ചെയാണ് ഇയാള്‍ ബാങ്കോക്കിൽ നിന്ന് നെടുമ്പാശ്ശേരി വിമാനത്താവളത്തിൽ വിമാനം ഇറങ്ങിയത്. വിമാനത്താവളത്തിൽ നിന്ന് യുവാവ് പുറത്തിറങ്ങിയ ഉടനെ സംശയം തോന്നിയ കസ്റ്റംസ് ഉദ്യോഗസ്ഥര്‍ പരിശോധന നടത്തുകയായിരുന്നു. സമദിന്‍റെ കൈയിലുണ്ടായിരുന്ന പെട്ടി പരിശോധിച്ചപ്പോഴാണ് വൻതോതിൽ ഹൈബ്രിഡ് കഞ്ചാവ് കണ്ടെടുത്തത്.

ആറര കിലോ കഞ്ചാവാണ് ചെറിയ പാക്കറ്റുകളിലാക്കി പെട്ടിയിൽ ഒളിപ്പിച്ചിരുന്നത്. ആറരകിലോ ഹൈബ്രിഡ് കഞ്ചാവിന് ആറര കോടിയോളം രൂപ വിലവരുമെന്നാണ് കസ്റ്റംസ് പറയുന്നത്. രണ്ടാഴ്ച മുമ്പാണ് ഇയാള്‍ വിദേശത്തേക്ക് പോയത്. ആദ്യം വിയറ്റ്നാമിലേക്കും അവിടെ നിന്നും ബാങ്കോക്കിലേക്കും പോയശേഷമാണ് കൊച്ചിയില്‍ തിരിച്ചെത്തിയത്. അടുത്തകാലത്തെ ഏറ്റവും വലിയ ഹൈബ്രിഡ് കഞ്ചാവ് വേട്ടയാണിത്.

### Related Links & Sources
- [Original Story Source](https://truevisionnews.com/news/324216/huge-drug-bust-at-nedumbassery-airport-hybrid-worth-rs-65-crore-wayanad-native)