---
title: "കനത്ത മഴ; ഇരുമ്പ് പാലം ഒലിച്ചുപോയി, ഡാർജിലിംഗിൽ മണ്ണിടിച്ചിലിൽ ആറ് പേർക്ക് ദാരുണാന്ത്യം, വിനോദസഞ്ചാരികൾ കുടുങ്ങിക്കിടക്കുന്നു"
english_title: "Six death in Darjeeling landslide tourists stranded"
publisher: "truevisionnews.com"
canonical_url: "https://truevisionnews.com/news/318857/six-death-in-darjeeling-landslide-tourists-stranded-new"
published_at: "2025-10-05T13:36:00+05:30"
category: "National"
language: "ml"
image: "https://cf.zdn.im/img/truevisionnews.com/0/image-uploads/68e22869103db_1.jpg"
keywords: []
---

# കനത്ത മഴ; ഇരുമ്പ് പാലം ഒലിച്ചുപോയി, ഡാർജിലിംഗിൽ മണ്ണിടിച്ചിലിൽ ആറ് പേർക്ക് ദാരുണാന്ത്യം, വിനോദസഞ്ചാരികൾ കുടുങ്ങിക്കിടക്കുന്നു

> **Lead Summary:** **ബംഗാൾ: ** ബംഗാളിൽ കനത്ത മഴയെത്തുടർന്നുണ്ടായ മണ്ണിടിച്ചിലിൽ ഡാര്‍ജിലിംഗില്‍ ആറ് പേർ മരിച്ചു. കനത്ത മഴയെത്തുടർന്ന് മിരിക്കിൽ ഉണ്ടായ മണ്ണിടിച്ചിലിലാണ് ആറ് പേർ മരിച്ചത്. രക്ഷാപ്രവർത്തനം തുടരുന്നതിനാൽ മരണസംഖ്യ ഇനിയും ഉയർന്നേക്കുമെന്ന് അധികൃതർ മുന്നറിയിപ്പ് നൽകി. മണ്ണിടിച്ചിലിനെത്തുടർന്ന് നിരവധി റോഡുകൾ തകർന്നു, ആശയവിനിമയം വിച്ഛേദിക്കപ്പെട്ടു. വിനോദസഞ്ചാരികൾ കുടുങ്ങിക്കിടക്കുന്നു. സിക്കിം, കലിംപോങ് എന്നിവയുമായുള്ള ആശയവിനിമയം പൂർണ്ണമായും വിച്ഛേദിക്കപ്പെട്ടതായി ഭരണകൂടം അറിയിച്ചു.

## Article Content

**ബംഗാൾ: ** ബംഗാളിൽ കനത്ത മഴയെത്തുടർന്നുണ്ടായ മണ്ണിടിച്ചിലിൽ ഡാര്‍ജിലിംഗില്‍ ആറ് പേർ മരിച്ചു. കനത്ത മഴയെത്തുടർന്ന് മിരിക്കിൽ ഉണ്ടായ മണ്ണിടിച്ചിലിലാണ് ആറ് പേർ മരിച്ചത്. രക്ഷാപ്രവർത്തനം തുടരുന്നതിനാൽ മരണസംഖ്യ ഇനിയും ഉയർന്നേക്കുമെന്ന് അധികൃതർ മുന്നറിയിപ്പ് നൽകി. മണ്ണിടിച്ചിലിനെത്തുടർന്ന് നിരവധി റോഡുകൾ തകർന്നു, ആശയവിനിമയം വിച്ഛേദിക്കപ്പെട്ടു. വിനോദസഞ്ചാരികൾ കുടുങ്ങിക്കിടക്കുന്നു. സിക്കിം, കലിംപോങ് എന്നിവയുമായുള്ള ആശയവിനിമയം പൂർണ്ണമായും വിച്ഛേദിക്കപ്പെട്ടതായി ഭരണകൂടം അറിയിച്ചു.

സിലിഗുരിയെയും സിക്കിമിനെയും ബന്ധിപ്പിക്കുന്ന ബദൽ പാതയായ ദേശീയപാത 717ഇ-യിൽ പെഡോങ്, ഋഷികോല എന്നിവിടങ്ങൾക്കിടയിലുണ്ടായ മണ്ണിടിച്ചിൽ ഗതാഗതം പൂർണ്ണമായി സ്തംഭിപ്പിച്ചു. റോഡ് ഗതാഗതം പുനഃസ്ഥാപിക്കാനുള്ള പ്രവർത്തനങ്ങൾ കനത്ത മഴ കാരണം ഏറെ വെല്ലുവിളിയാണെന്ന് അധികൃതർ അറിയിച്ചു.

ഡാർജിലിംഗ് ജില്ലയിലെ പ്രധാന നഗരങ്ങളെയും വിനോദസഞ്ചാര കേന്ദ്രങ്ങളായ മിരിക്കിനെയും കുർസിയോങ്ങിനെയും ബന്ധിപ്പിച്ചിരുന്ന ദുധിയ ഇരുമ്പ് പാലവും തകർന്നു. ഇത് മേഖലയിലെ ഗതാഗതത്തെ പൂർണ്ണമായി ബാധിച്ചു. ഇതിനുപുറമെ, കുർസിയോങ്ങിനടുത്ത് ദേശീയപാത 110-ൽ ഹുസൈൻ ഖോലയിൽ (Hussain Khola) മണ്ണിടിച്ചിൽ റിപ്പോർട്ട് ചെയ്തിട്ടുണ്ട്. ഇതോടെ പ്രധാന റോഡുകൾ അടഞ്ഞതോടെ ഗതാഗതം തടസ്സപ്പെട്ടു.

ഡാർജിലിംഗ് സന്ദർശിക്കുന്നവർക്ക് രോഹിണി റോഡ് ഒരു പരിചിതമായ പേരാണ്. ശനിയാഴ്ച രാത്രിയിലെ മഴ കാരണം ആ റോഡിന്റെ അവസ്ഥയും ദയനീയമാണ്. റോഡിന്റെ ഒരു ഭാഗം ഇടിഞ്ഞു നദിയിലേക്ക് വീണു. രാവിലെ ജിടിഎ ഒരു ദുരന്ത മുന്നറിയിപ്പ് നൽകിയിട്ടുണ്ട്. റോക്ക് ഗാർഡനും ടൈഗർ ഹില്ലും തൽക്കാലം വിനോദസഞ്ചാരികൾക്ക് അടച്ചിട്ടിരിക്കുകയാണെന്ന് അതിൽ പറയുന്നു. ദുരന്തമുണ്ടായാൽ വിനോദസഞ്ചാരികൾ ജാഗ്രത പാലിക്കണമെന്ന് ആവശ്യപ്പെട്ടിട്ടുണ്ട്.

### Related Links & Sources
- [Original Story Source](https://truevisionnews.com/news/318857/six-death-in-darjeeling-landslide-tourists-stranded-new)