---
title: "വാട്‌സ്ആപ്പിലെ ഈ സെറ്റിങ്സ് ഓൺ അല്ലേ ...? പണം പോകും: ജാഗ്രതാ മുന്നറിയിപ്പുമായി കേരള പൊലീസ്"
english_title: "Are these settings on WhatsApp turned on Money will be lost Kerala Police warns"
publisher: "truevisionnews.com"
canonical_url: "https://truevisionnews.com/news/314622/are-these-settings-on-whatsapp-turned-on-money-will-be-lost-kerala-police-warns"
published_at: "2025-09-13T15:26:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/68c54025ad7df_YT.jpg"
keywords: []
---

# വാട്‌സ്ആപ്പിലെ ഈ സെറ്റിങ്സ് ഓൺ അല്ലേ ...? പണം പോകും: ജാഗ്രതാ മുന്നറിയിപ്പുമായി കേരള പൊലീസ്

> **Lead Summary:** **തിരുവനന്തപുരം: ( **[www.truevisionnews.com]** )** വാട്‌സ്ആപ്പ് അക്കൗണ്ടുകള്‍ ഹാക്ക് ചെയ്‌ത് തട്ടിപ്പ് നടത്തുന്ന രീതി വ്യാപകമാവുന്നതായി മുന്നറിയിപ്പുമായി കേരള പൊലീസ്. പൊതുജനങ്ങൾക്ക് സാമ്പത്തിക നഷ്‌ടവും മാനഹാനിയും ഉണ്ടാക്കുന്ന ഇത്തരം തട്ടിപ്പുകള്‍ക്കെതിരെ ജാഗ്രത പാലിക്കണമെന്ന് സ്റ്റേറ്റ് പൊലീസ് മീഡിയ സെന്‍റര്‍ കേരള മുന്നറിയിപ്പ് നല്‍കി.

## Article Content

**തിരുവനന്തപുരം: ( **[www.truevisionnews.com]** )** വാട്‌സ്ആപ്പ് അക്കൗണ്ടുകള്‍ ഹാക്ക് ചെയ്‌ത് തട്ടിപ്പ് നടത്തുന്ന രീതി വ്യാപകമാവുന്നതായി മുന്നറിയിപ്പുമായി കേരള പൊലീസ്. പൊതുജനങ്ങൾക്ക് സാമ്പത്തിക നഷ്‌ടവും മാനഹാനിയും ഉണ്ടാക്കുന്ന ഇത്തരം തട്ടിപ്പുകള്‍ക്കെതിരെ ജാഗ്രത പാലിക്കണമെന്ന് സ്റ്റേറ്റ് പൊലീസ് മീഡിയ സെന്‍റര്‍ കേരള മുന്നറിയിപ്പ് നല്‍കി.

വാട്‌സ്ആപ്പ് അക്കൗണ്ടുകള്‍ ഹാക്ക് ചെയ്യപ്പെടുന്നത് ഒഴിവാക്കാന്‍ ഏവരും വാട്‌സ്ആപ്പില്‍ 2-Step Verification ഉടൻ സജ്ജമാക്കണമെന്നും കേരള പൊലീസ് അഭ്യര്‍ഥിച്ചു. വാട്‌സ്ആപ്പ് ഹാക്കിംഗ് ശ്രമങ്ങള്‍ ഒഴിവാക്കാന്‍ സ്വീകരിക്കേണ്ട മറ്റ് മുന്‍കരുതലുകളെ കുറിച്ചും പൊലീസ് വിശദീകരിക്കുന്നു. വാട്‌സ്ആപ്പ് അക്കൗണ്ടുകള്‍ ഹാക്ക് ചെയ്‌ത് പണം തട്ടുന്നത് വ്യാപകമായ പശ്ചാത്തലത്തിലാണ് പൊലീസിന്‍റെ ഈ മുന്നറിയിപ്പ്.

**വാട്‌സ്ആപ്പ് അക്കൗണ്ട് ഹാക്കിംഗ്- മുന്നറിയിപ്പ്**

ജനപ്രിയ സമൂഹമാധ്യമമായ വാട്‌സ്ആപ്പ് അക്കൗണ്ട് ഹാക്ക് ചെയ്‌ത് തട്ടിപ്പു നടത്തുന്ന രീതി വ്യാപകമായിക്കൊണ്ടിരിക്കുകയാണ്. അക്കൗണ്ടുകൾ ഹാക്ക് ചെയ്‌ത് ദുരുപയോഗപ്പെടുത്തി, വ്യക്തിഗത വിവരങ്ങൾ കൈക്കലാക്കൽ, ആൾമാറാട്ടം നടത്തിയുള്ള സാമ്പത്തിക തട്ടിപ്പുകൾ തുടങ്ങി നിരവധി സൈബർ കുറ്റകൃത്യങ്ങൾ നടത്തുകയും പൊതുജനങ്ങൾക്ക് സാമ്പത്തിക നഷ്‌ടവും മാനഹാനിയും ഉണ്ടാക്കുകയും ചെയ്യുന്നു.

തട്ടിപ്പുകാർ സാധാരണക്കാരുടെ ഫോണിൽ വിളിച്ച് വിശ്വാസം നേടിയെടുക്കുകയോ, എസ്എംഎസ്/എപികെ പോലുള്ളവ ഫോണിൽ അയച്ചു ഒ.ടി.പി പോലുള്ള രേഖകൾ കൈക്കലാക്കുകയും തുടർന്ന് അക്കൗണ്ടുകൾ അവരുടെ ഫോണിലോ ലാപ്ടോപ്പിലോ ലോഗിൻ ചെയ്യുകയും ചെയ്യുന്നു. അക്കൗണ്ട് ഉടമ വീണ്ടും ഇൻസ്റ്റാൾ ചെയ്‌ത് തിരികെ ഉപയോഗിക്കാനുള്ള ശ്രമത്തിൽ ഒടിപി നൽകാൻ കഴിയാതെ 12 മുതൽ 24 മണിക്കൂർ വരെ വാട്‌സ്ആപ്പ് പ്രവർത്തനരഹിതമാകുന്നു.

ഈ സമയം ഹാക്കർമാർ ഉടമയുടെ പേരിൽ സുഹൃത്തുക്കൾക്കും ബന്ധുക്കൾക്കും പണം ആവശ്യപ്പെട്ടുകൊണ്ടുള്ള വ്യാജ സന്ദേശങ്ങൾ അയയ്ക്കുകയും, അപകടകരമായ എപികെ ലിങ്കുകള്‍ പ്രചരിപ്പിക്കുകയും ഇതിലൂടെ മറ്റുള്ളവരുടെ അക്കൗണ്ടുകൾ കൂടി ഹാക്ക് ചെയ്യുകയും ചെയ്യുന്നു.

ഇത്തരത്തിലുള്ള തട്ടിപ്പിനെ പ്രതിരോധിക്കാൻ വാട്‌സ്ആപ്പില്‍ 2-Step Verification ഉടൻ സജ്ജമാക്കുക. ഫോണിൽ വരുന്ന ഒടിപികൾ ഒരിക്കലും മറ്റാരുമായും പങ്കുവെക്കാതിരിക്കുക. അജ്ഞാതമായ ലിങ്കുകളിലോ APK ഫയലുകളിലോ ഒരിക്കലും ക്ലിക്ക് ചെയ്യാതിരിക്കുക, സംശയാസ്‌പദമായി തോന്നുന്ന സന്ദേശങ്ങൾക്ക് മറുപടി നൽകാതിരിക്കുക.

ഇത്തരത്തിലുള്ള ഓൺലൈൻ സാമ്പത്തിക കുറ്റകൃത്യങ്ങൾ നേരിടുകയോ, ശ്രദ്ധയിൽപ്പെടുകയോ ചെയ്‌താൽ ഉടൻ തന്നെ 1930 എന്ന സൗജന്യ നമ്പറിൽ വിളിക്കുകയോ, [https://cybercrime.gov.in](https://cybercrime.gov.in) എന്ന വെബ്‌സൈറ്റ് വഴി പരാതികൾ രജിസ്റ്റർ ചെയ്യുകയോ ചെയ്യാം.

### Related Links & Sources
- [Original Story Source](https://truevisionnews.com/news/314622/are-these-settings-on-whatsapp-turned-on-money-will-be-lost-kerala-police-warns)