---
title: "ആശുപത്രിയിൽ അക്രമം; നാദാപുരത്തെ വളയം കുടുംബാരോഗ്യ കേന്ദ്രത്തിൽ സെക്യൂരിറ്റിക്ക് നേരെ അക്രമം"
english_title: "Violence at hospital; Violence against security at Valayam Family Health Center in Nadapuram"
publisher: "truevisionnews.com"
canonical_url: "https://truevisionnews.com/news/313728/violence-at-hospital-violence-against-security-at-valayam-family-health-center-in-nadapuram"
published_at: "2025-09-09T12:33:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/68bfd2321537b_kanarannadapuram.jpg"
keywords: []
---

# ആശുപത്രിയിൽ അക്രമം; നാദാപുരത്തെ വളയം കുടുംബാരോഗ്യ കേന്ദ്രത്തിൽ സെക്യൂരിറ്റിക്ക് നേരെ അക്രമം

> **Lead Summary:** വളയം ഗവ. കുടുംബാരോഗ്യ കേന്ദ്രത്തിൽ സെക്യൂരിറ്റി ജീവനക്കാരന് നേരെ അക്രമം. തിരുവങ്ങോത്ത് കണാരൻ നാണ് അക്രമത്തിൽ പരിക്ക് പറ്റിയത്.

## Article Content

വളയം ഗവ. കുടുംബാരോഗ്യ കേന്ദ്രത്തിൽ സെക്യൂരിറ്റി ജീവനക്കാരന് നേരെ അക്രമം. തിരുവങ്ങോത്ത് കണാരൻ നാണ് അക്രമത്തിൽ പരിക്ക് പറ്റിയത്.

ആശുപത്രി വളപ്പിൽ പാർക്ക് ചെയ്ത കാർ പുറത്തേക്ക് മാറ്റി നിർത്തിയിടാൻ ആവശ്യപ്പെട്ടതിൽ പ്രകോപിതനായ യുവാവാണ് കണാരനെ മർദ്ദിക്കുകയും പിടിച്ച് തള്ളിയിടുകയും ചെയ്തതെന്ന് ആശുപത്രി അധികൃതർ പറഞ്ഞു. തിങ്കളാഴ്ച്ച രാവിലെ 9.30 നാണ് സംഭവം. വളയം നിരവ് സ്വദേശി യുവാവിനെതിരെ കണാരൻ വളയം പൊലീസിൽ പരാതി നൽകിയിട്ടുണ്ട്. അക്രമത്തിൽ കണാരൻ്റെ കൈക്കും കാലിനും പരിക്കുണ്ട്.

അതേസമയം നാദാപുരത്ത് വീണ്ടും തെരുവുനായയുടെ ആക്രമണം. രണ്ട് പേർക്ക് കടിയേറ്റു. നാദാപുരം ചാലപ്രത്തും വെള്ളൂരിലുമാണ് തെരുവുനായയുടെ അക്രമണമുണ്ടായത്. ഇന്നലെ വൈകുന്നേരം ആറരയോടെ ചാലപ്രം കുളശ്ശേരി ക്ഷേത്ര പരിസരത്ത് ഷാജു (40), വെള്ളൂർ പറപ്പട്ടോളി ക്ഷേത്ര പരിസരത്ത് കണ്ണൻ (75) എന്നിവരെയാണ് നായ കടിച്ചത്. ഇരുവരുടെയും കാലിനാണ് കടിയേറ്റത്. രണ്ട് പേരും നാദാപുരം ഗവ. താലൂക്ക് ആശുപത്രിയിൽ ചികിത്സ തേടി.

കഴിഞ്ഞ മാസം ചെക്യാട് പഞ്ചായത്തിൽ തെരുവുനായ ആടിനെ ആക്രമിച്ച് കൊന്നു തിന്നിരുന്നു. ചെക്യാട് പഞ്ചായത്തിൽ നെല്ലിക്കാപറമ്പിൽ ബാലകൃഷ്ണന്റെ വീട്ടിലെ വളർത്തുമൃഗമായ ആടിനെയാണ് തെരുവുനായ ആക്രമിച്ച് കൊന്നു തിന്നത്. എട്ടിലധികം വരുന്ന തെരുവുനായ്ക്കൾ കൂട്ടമായി വന്ന് ആടുകളെ ആക്രമിക്കുകയായിരുന്നു. ഒരു ആടിനെയാണ് കൊന്നു തിന്നത്. മറ്റ് രണ്ട് ആടുകൾക്ക് സാരമായി പരിക്കേറ്റു. ശബ്ദം കേട്ട് പുറത്തിറങ്ങിയ ബാലകൃഷ്ണ കുറുപ്പ് ഓടിയെത്തിയതോടെ തെരുവ് നായ്ക്കൾ ഓടി രക്ഷപ്പെടുകയായിരുന്നു.

അതിനാലാണ് മറ്റ് രണ്ട് ആടുകളെ ജീവനോടെ കിട്ടിയതെന്ന് ബാലകൃഷ്ണക്കുറുപ്പ് പറഞ്ഞു. ചെക്യാട് പഞ്ചായത്തിൽ തെരുവ് നയ ശല്യം കൂടി വരുകയാണ്. വളർത്തുമൃഗങ്ങളെയാണ് കൂടുതലും തെരുവ് നായ്ക്കൾ ഈ പ്രദേശങ്ങളിൽ ആക്രമിക്കുന്നത്. അതിനുമുൻപ്‌ വാണിമേൽ, വളയം ഭാഗങ്ങളിലും തെരുവുനായയുടെ ആക്രമണത്തിൽ പത്തൊമ്പതോളം ആളുകൾക്ക് കടിയേറ്റിരുന്നു. പത്ര വിതരണക്കാരനും, ലൈൻമാനും, ഇരുചക്രവാഹനയാത്രക്കാരും ഉൾപ്പെടെ ആക്രമണത്തിന് ഇരയായിരുന്നു.

### Related Links & Sources
- [Original Story Source](https://truevisionnews.com/news/313728/violence-at-hospital-violence-against-security-at-valayam-family-health-center-in-nadapuram)