കൊണ്ടോട്ടി/കരിപ്പൂര്: ( www.truevisionnews.com ) കരിപ്പൂര് വിമാനത്താവളത്തില് ഗ്രൗണ്ട് ഹാന്ഡ്ലിങ് ഏജന്സി സൂപ്പര്വൈസറുടെ സഹായത്തോടെ കടത്താന് ശ്രമിച്ച 1.14 കിലോ സ്വര്ണം എയര് കസ്റ്റംസ് ഇന്റലിജന്സ് വിഭാഗം പിടികൂടി.
സ്വര്ണം കടത്തിക്കൊണ്ടുവന്ന യാത്രക്കാരനെയും സൂപ്പര്വൈസറെയും അറസ്റ്റുചെയ്തു. 87.01 ലക്ഷം രൂപ വിലമതിക്കുന്ന സ്വര്ണമാണ് കടത്താന് ശ്രമിച്ചത്. ചൊവ്വാഴ്ച ജിദ്ദയില്നിന്നെത്തിയ മലപ്പുറം സ്വദേശിയാണ് സ്വര്ണം കടത്തിക്കൊണ്ടുവന്നത്.
ഇത് പുറത്തെത്തിക്കാന് ഇയാള് ഗ്രൗണ്ട് ഹാന്ഡ്ലിങ് സൂപ്പര്വൈസര്ക്ക് കൈമാറി. രഹസ്യവിവരത്തിന്റെ അടിസ്ഥാനത്തില് പരിശോധന നടത്തിയ കസ്റ്റംസ് ഇന്റലിജന്സ് വിഭാഗം സൂപ്പര്വൈസറില്നിന്ന് 1.26 കിലോഗ്രാം തൂക്കംവരുന്ന, പേസ്റ്റ് രൂപത്തില് സ്വര്ണമടങ്ങിയ രണ്ടു പായ്ക്കറ്റുകള് കണ്ടെടുത്തു.
തുടര്ന്ന്, പേസ്റ്റില്നിന്ന് 87.01 ലക്ഷം രൂപ വിലമതിക്കുന്ന 1.14 കിലോ സ്വര്ണം വേര്തിരിച്ചെടുത്തു. സ്വര്ണം കൊണ്ടുവന്ന യാത്രക്കാരനെ സൂപ്പര്വൈസറില്നിന്ന് ലഭിച്ച വിവരം അനുസരിച്ച് എക്സിറ്റ് ഗേറ്റില് തടഞ്ഞുവെച്ച് പിടികൂടി.
ജിദ്ദയില്നിന്ന് കൊണ്ടുവന്ന സ്വര്ണം സൂപ്പര്വൈസര്ക്ക് കൈമാറിയത് താനാണെന്ന് ഇയാള് ചോദ്യംചെയ്യലില് സമ്മതിച്ചതായി കസ്റ്റംസ് അറിയിച്ചു. കൂടുതല് അന്വേഷണം പുരോഗമിക്കുന്നതിനാല് ഇരുവരുടെയും പേരടക്കമുള്ള വിവരങ്ങള് പുറത്തുവിട്ടിട്ടില്ല.
#Gold #smuggling #Karipur #Agency #supervisor #passenger #arrested #1.14kg #gold #seized