മൊബൈല്‍ നമ്പര്‍ ആധാറുമായി ബന്ധിപ്പിക്കല്‍; അറിയാനുള്ളതെല്ലാം

കൊച്ചി: വരുന്ന ഫെബ്രുവരി വരെയാണ് മൊബൈല്‍ നമ്പറുകള്‍ ആധാര്‍ കാര്‍ഡുമായി ബന്ധിപ്പിക്കാനുള്ള സമയം സര്‍ക്കാര്‍ അനുവദിച്ചിരിക്കുന്നത്. അതിന് ശേഷം മൊബൈല്‍ നമ്പര്‍ കട്ടാകുമെന്നാണ് സര്‍ക്കാര്‍ പറയുന്നത്. രാജ്യത്ത് മൊബൈല്‍ ഉപയോഗിക്കുന്ന ആളുകളുടെ വേരിഫിക്കേഷന്‍ നടത്തണമെന്ന സുപ്രീംകോടതി ഉത്തരവിന്റെ അടിസ്ഥാനത്തിലാണ് കേന്ദ്രസര്‍ക്കാര്‍ ആധാര്‍ കാര്‍ഡും മൊബൈല്‍ നമ്പരും തമ്മില്‍ ബന്ധിപ്പിക്കണമെന്ന നിയമം കൊണ്ടു വന്നത്.

യുണീക്ക് ഐഡന്റിഫിക്കേഷന്‍ അഥോറിറ്റി ഓഫ് ഇന്ത്യ പറയുന്ന കണക്ക് അനുസരിച്ചാണെങ്കില്‍ ഇതുവരെ 25 ശതമാനം ആളുകള്‍ മാത്രമാണ് മൊബൈല്‍ നമ്പര്‍ ആധാര്‍ കാര്‍ഡുമായി ബന്ധിപ്പിച്ചിട്ടുള്ളത്. 128 കോടി മൊബൈല്‍ കണക്ഷന്‍ ഉള്ളതില്‍ 38 കോടിയില്‍പരം ആളുകള്‍ മാത്രമാണ് മൊബൈല്‍ നമ്പരുകള്‍ ആധാറുമായി ബന്ധിപ്പിച്ചിരിക്കുന്നത്. പാന്‍കാര്‍ഡ്, ബാങ്ക് അക്കൗണ്ട് തുടങ്ങിയവ ആധാറുമായി ബന്ധിപ്പിക്കാന്‍ ഓണ്‍ലൈന്‍ വഴി സാധിക്കുമെങ്കില്‍ മൊബൈല്‍ നമ്പര്‍ ബന്ധിപ്പിക്കണമെങ്കില്‍ സര്‍വീസ് പ്രൊവൈഡറുടെ സ്റ്റോറിലോ ആധാര്‍ കേന്ദ്രങ്ങളിലോ പോകണം.

സര്‍വീസ് പ്രൊവൈഡറുടെ ഫിസിക്കല്‍ സ്റ്റോറില്‍ ആധാര്‍ രേഖകളുടെ കോപ്പിക്കൊപ്പം ബയോമെട്രിക് രേഖകളും ശേഖരിക്കും. എന്നാല്‍, ഇവ എന്‍ക്രിപ്റ്റഡ് ഫോര്‍മാറ്റിലാക്കി വേണം സുക്ഷിക്കാന്‍. അല്ലാത്തപക്ഷം ആധാറുമായി ബന്ധപ്പെട്ട നിയമപ്രകാരം ക്രിമിനല്‍ കുറ്റമാണിത്.

ഇനി പഴയ നമ്പര്‍ മാറ്റി പുതിയ നമ്പര്‍ അപ്ഡേറ്റ് ചെയ്യാനാണെങ്കില്‍ ഇതിന് ഓണ്‍ലൈന്‍ സേവനം ഉപയോഗപ്പെടുത്താം. ഓണ്‍ലൈന്‍ അപ്ഡേറ്റ് ചെയ്യുന്ന സമയത്ത് പഴയ നമ്പരിലേക്ക് വണ്‍ ടൈം പാസ്വേഡ് ലഭിക്കും. ഈ പാസ്വേഡ് ഉണ്ടെങ്കിലെ അപ്ഡേറ്റ് പൂര്‍ത്തിയാകുകയുള്ളു. യുഐഡിഎഐ വെബ്സൈറ്റിലാണ് ഇത് ചെയ്യേണ്ടത്.

ചുവടെ കൊടുക്കുന്ന അഭിപ്രായങ്ങള്‍ ട്രൂവിഷന്റെതല്ല . സോഷ്യല്‍ നെറ്റ്‌വര്‍ക്ക് വഴി ചര്‍ച്ചയില്‍ പങ്കെടുക്കുന്നവര്‍ അശ്ലീലമോ അസഭ്യമോ തെറ്റിദ്ധാരണാജനകമോ അപകീര്‍ത്തികരമോ നിയമവിരുദ്ധമോ ആയ അഭിപ്രായങ്ങള്‍ പോസ്റ്റ് ചെയ്യുന്നത് സൈബര്‍ നിയമപ്രകാരം ശിക്ഷാര്‍ഹമാണ്. വ്യക്തികള്‍, മതസ്ഥാപനങ്ങള്‍ എന്നിവയ്‌ക്കെതിരേയുള്ള പരാമര്‍ശങ്ങള്‍ ഒഴിവാക്കേണ്ടതാണ്....ട്രൂവിഷന്‍ ടീം