കാഞ്ഞങ്ങാട്: ( www.truevisionnews.com ) 'ഒച്ചവെച്ചിരുന്നെങ്കിൽ ആ പൊന്നുമോളുടെ ജീവനെടുത്തേനെ. ആലോചിക്കാൻ കൂടി കഴിയുന്നില്ല... കിടന്നുറങ്ങുകയായിരുന്ന ബാലികയെ എങ്ങനെയാണവൻ എടുത്തുകൊണ്ടുപോയത്' -പ്രതിഷേധവും സങ്കടവുമെല്ലാം നിറയുന്നു പ്രദേശത്തുകാരുടെ വാക്കുകളിൽ.. ഒൻപതുവയസ്സുകാരി പീഡനത്തിനിരയായത് വിശ്വസിക്കാനാകുന്നില്ല ഇവർക്ക്.
അടുത്തടുത്ത് വീടുകളുള്ള പ്രദേശം. അച്ഛനും അമ്മയും സഹോദരിയും ഉറങ്ങിക്കിടന്ന മുറിക്ക് തൊട്ടടുത്തുള്ള മുറിയിൽനിന്ന് കുഞ്ഞിനെ എടുത്തുകൊണ്ടുപോകുകയെന്നത് അവിശ്വസനീയം.
ആളുകൾക്ക് ഇതേക്കുറിച്ച് സംസാരിക്കാൻപോലും പറ്റുന്നില്ല. സംഭവം അറിഞ്ഞവരെല്ലാം ആദ്യം ചോദിക്കുന്നത് വീട്ടിൽക്കയറി കൊണ്ടുപോകുകയോ എന്നാണ്. പോലീസ് നായയുമായുള്ള തിരച്ചിലിൽ പത്ത്, അൻപത് രൂപകളുടെ നോട്ടും പ്രദേശത്ത് നിന്ന് കണ്ടെത്തിയിരുന്നു.
ഹൊസ്ദുർഗ് പോലീസ് സ്റ്റേഷൻപരിധിയിൽ ബാലികയെ പീഡിപ്പിച്ചത് അപരിചിതനല്ലെന്ന് നാട്ടുകാർക്ക് ഉറപ്പ്. നടന്ന സംഭവം പരിശോധിച്ചാൽ നാട്ടുകാരുടെ നിരീക്ഷണം ശരിയെന്ന് ബോധ്യപ്പെടും. മുത്തച്ഛനും മുത്തശ്ശിക്കുമൊപ്പമാണ് കുട്ടി ഉറങ്ങാറുള്ളതെന്ന് അക്രമിക്ക് അറിയാം.
മുത്തശ്ശി തീർഥയാത്ര പോയതിനാൽ, മുത്തച്ഛൻ പശുവിനെ കറക്കുന്നസമയത്ത് കട്ടിലിൽ കുട്ടി തനിച്ചായിരിക്കുമെന്നും അക്രമിക്കറിയാം. പശുവിനെ കറക്കാൻ പോകുമ്പോൾ മുത്തച്ഛൻ മുൻവാതിൽ അടച്ചിരുന്നു. അകത്തുനിന്നോ പുറത്തുനിന്നോ വാതിൽ ലോക്ക് ചെയ്തിട്ടില്ലെന്ന് അറിയാവുന്നയാളാണ് അക്രമിയെന്ന് ഉറപ്പ്.
വീടിന്റെ അടുക്കള ഭാഗത്തുകൂടി പുറത്തിറങ്ങി കിഴക്കോട്ട് പോയാൽ വയലാണെന്നും അറിയാത്ത ആളല്ല അക്രമി. ആളുകൾ തിരച്ചിൽ നടത്തുമ്പോൾ ഈ വയൽപ്രദേശങ്ങളിലൊക്കെ അവരെത്തുമെന്നും അയാൾ മനസ്സിലാക്കിയിരുന്നു. ഒന്നിലേറെ വയലും റോഡും കടന്ന് അരക്കിലോമീറ്ററിനപ്പുറത്തേക്കെത്തിയതും സ്ഥലത്തെക്കുറിച്ച് പരിചമുണ്ടായതിനാലാണെന്ന് പോലീസ് സംശയിക്കുന്നു.
പീഡനശേഷം ‘നാലോ അഞ്ചോ വീട് കഴിഞ്ഞാൽ നിന്റെ വീടെത്തും പോയ്‌ക്കോ...’ എന്ന് അക്രമി പറഞ്ഞതും സ്ഥലത്തെക്കുറിച്ച് നന്നായി അറിയുന്നതുകൊണ്ടുതന്നെ. റോഡരികിൽ പടിഞ്ഞാറോട്ട് മുഖമുള്ള വീട്ടിൽ അകത്തുകയറുന്നിടത്ത് ഇടത്തും വലത്തുമായി രണ്ടുമുറികൾ. ഇതിൽ വടക്കുഭാഗത്തെ മുറിയിലാണ് കുട്ടി ഉറങ്ങിയിരുന്നത്.
#kasaragod #nine #year #old #girl #kidnaping #rape #theft
