പാലക്കാട്: (truevisionnews.com) എലപ്പുള്ളി രാമശ്ശേരിയിലെ പാറക്കുളത്തിൽ തലയോട്ടി കണ്ടെത്തിയ സംഭവത്തിൽ ഞായറാഴ്ചയും അഗ്നിരക്ഷാസേനയുടെ മുങ്ങൽവിദഗ്ധർ കുളത്തിൽ തിരച്ചിൽനടത്തി.
കുളത്തിന്റെ അടിത്തട്ടിൽനിന്ന് ക്വാറിയാവശ്യത്തിനായി ഉപയോഗിച്ചതെന്നുകരുതുന്ന ഒരു കമ്പിപ്പാര മാത്രമാണ് ലഭിച്ചത്. ബുധനാഴ്ച വൈകീട്ട് തലയോട്ടി കണ്ടെത്തിയതിനെത്തുടർന്ന് വ്യാഴാഴ്ചമുഴുവൻ മുങ്ങൽവിദഗ്ധർ തിരച്ചിൽ നടത്തിയെങ്കിലും കാര്യമായ തെളിവൊന്നും ലഭിച്ചിരുന്നില്ല.
പിന്നീട് കുളത്തിലെ ജലംവറ്റിക്കാൻ മോട്ടോറുപയോഗിച്ച് നടത്തിയ ശ്രമം വിജയിച്ചിരുന്നില്ല. ഞായറാഴ്ച രാവിലെമുതൽ പാലക്കാട് അഗ്നിരക്ഷാസേനയിലെ നാലംഗ മുങ്ങൽവിദഗ്ധരടങ്ങിയ സ്കൂബാടീമാണ് കുളത്തിൽ തിരച്ചിൽ നടത്തിയത്.
മൃതദേഹാവശിഷ്ടങ്ങളെന്തെങ്കിലും ലഭിക്കുമോ എന്നറിയാനായിരുന്നു തിരച്ചിൽ. ഉച്ചയോടെ സംഘം തിരച്ചിൽ അവസാനിപ്പിച്ച് മടങ്ങി.
#incident #skull #found #rock #pool #Divers #searched #tried #drain #pool
