ബെംഗളുരു: (truevisionnews.com) ലൈംഗികാതിക്രമക്കേസ് നേരിടുന്ന ഹസ്സൻ എംപി പ്രജ്വൽ രേവണ്ണയെ ശ്രീകൃഷ്ണനോട് ഉപമിച്ച് വിവാദത്തിലായി കർണാടക എക്സൈസ് മന്ത്രി രാമപ്പ തിമ്മപ്പുർ.
ഭക്തികൊണ്ട് സ്ത്രീകളാൽ ചുറ്റപ്പെട്ട ശ്രീകൃഷ്ണനെ മറികടക്കാനാണ് പ്രജ്വൽ രേവണ്ണ ആഗ്രഹിക്കുന്നതെന്നായിരുന്നു രാമപ്പയുടെ വിവാദ പരാമർശം.
'ഇത്രയും വൃത്തികെട്ടയാളെ നമ്മൾ ഈ രാജ്യത്ത് കണ്ടിട്ടില്ല. ലോക റെക്കോർഡ് ഇട്ടുകളയാമെന്നാകും അയാൾ കരുതിയിരിക്കുക. ശ്രീകൃഷ്ണന് ചുറ്റും സ്ത്രീകളുണ്ടായിരുന്നത് അവരുടെ ഭക്തി കാരണമാണ്, ഈ രീതിയിലല്ല. പ്രജ്വൽ രേവണ്ണയ്ക്ക് കൃഷ്ണന്റെ റോക്കോർഡ് മറികടക്കണമായിരിക്കും' - എന്നാണ് രാമപ്പ പറ‍ഞ്ഞത്.
സ്ത്രീകളെ ലൈംഗികമായി പീഡിപ്പിക്കുകയും അത് തന്റെ ഫോണിൽ റെക്കോർഡ് ചെയ്യുകയും ചെയ്തെന്ന കേസിൽ പ്രതിയാണ് ജെഡിഎസ് നേതാവും എച്ച് ഡി ദേവഗൗഡയുടെ കൊച്ചുമകനുമായ പ്രജ്വൽ രേവണ്ണ.
ഏപ്രിൽ 28 ന് 47കാരി രേവണ്ണയ്ക്കെതിരെ പരാതി നൽകി. തന്നെയും മകളെയും ഉപദ്രവിച്ചുവെന്നായിരുന്നു പരാതി. പിന്നാലെ കൂടുതൽ സ്ത്രീകൾ ഇയാൾക്കെതിരെ രംഗത്തെത്തി.
ഏപ്രിൽ 30 ന് രേവണ്ണയെ പാർട്ടിയിൽ നിന്ന് സസ്പെന്റ് ചെയ്തു. 70 ലേറെ സ്ത്രീകളുടെ ദൃശ്യങ്ങൾ പകർത്തിയ 3000ഓളം വീഡിയോ ക്ലിപ്പുകൾ രേവണ്ണയുടെ കൈവശമുണ്ടെന്നാണ് ആരോപണം.
എഡിജിപിയുടെ നേതൃത്വത്തിലുള്ള പ്രത്യേക അന്വേഷണ സംഘം ഈ ആരോപണങ്ങൾ അന്വേഷിക്കും. നിലവിൽ പ്രചരിക്കുന്ന വീഡിയോകളിൽ ഉത്തരാവിദിത്തം ആർക്കാണെന്നും സംഘം അന്വേഷിക്കും. അന്വേഷണ സംഘത്തിന് മുന്നിൽ ഹാജരാകാൻ ആവശ്യപ്പെട്ട് രേവണ്ണയുടെ കുടുംബത്തിന് നോട്ടീസ് അയച്ചിട്ടുണ്ട്.
ഏപ്രിൽ 27ന് രാജ്യം വിട്ട പ്രജ്വൽ രേവണ്ണ, താൻ ബെംഗളുരുവിൽ ഇല്ലെന്നും അന്വേഷണ സംഘത്തിന് മുന്നിൽ ഹാജരാകാൻ സാധിക്കില്ലെന്നും അഭിഭാഷകർ മുഖാന്തിരം ഇക്കാര്യം അന്വേഷണ ഉദ്യോഗസ്ഥരെ അറിയിച്ചിട്ടുണ്ടെന്നും മെയ് ഒന്നിന് സോഷ്യൽ മീഡിയ പോസ്റ്റിലൂടെ അറിയിച്ചിരുന്നു. സത്യം വൈകാതെ തെളിയിക്കപ്പെടുമെന്നും പുറത്തുവരുമെന്നും ഇയാൾ പറഞ്ഞു.
#Revanna #likened #LordKrishna #Karnataka #minister #controversy
.jpg)
